¹ N'kiiwe nhu atthu n'nokhala nkissironi! Nkiiwe nhu atthu n'nokhala elapo tjoottayi. Apwiya ahokiihana nintjina kihinayariya, okjhuma n'mirimani mwaanumwanaka. ² Ayena aheethiha malakwaaka phanka ekatana yoononiya; ahokivitha muntthuutjini montatanaya; Ayena akipanakale nttheerenaya, ni, ahokissunka. ³ Ayena ahokiirela: We onantekwaaka, Israel, wayoole nonthoonheraaka waaryawaka. ⁴ Massi kaahaakhula: Hata kikupaleelaka wiira kin'novara nteko mahala, watjooteene, essariyaaka enkhuma waApwiya, ni etthuvwaaka eri waMulukwaaka. ⁵ Vano, Apwiya, phiniiraaya, yaale akunpale okhuma wayariyaaka wookhala nantekwaaya, npaka wiitjoopolelalyaaya Jaco, wiira antakanihere Israel. Kin'nottittimihiya wameethoni waApwiya ni Mulukwaaka phiikurwaaka. ⁶ Ayena aniira: Wahooyevela okhala nantekwaaka wiira woopole nloko naJaco naatthu oohala aIsrael. Kinaahala wookhaliha nthuko mwaamalapo, wiira okhale woopwaawaka npaka n'malenle elapo. ⁷ Apwiya phiniiraaya, nkhuluvelo aIsrael, yoole ootanhifwiya, hintthuniya nlaponi ni epottha yaakhulupale: Mamwene anaahala owoona ni anaahala ovuwa, mahooleli woottittimihiha mwaha waApwiya, owaamini, ttakattiifu oIsrael, oothanlale. ⁸ Apwiya phiniiraaya: Owakathi on'halaaka olakela woothoonhera n'nemanaka, kinaahala owaakhula, ni, nihuku nowoopwaa, kinaahala wookhavihera; kin'hala wookhavihera ni kinaahala wookhaliha nlipihero wowaataana, wiira ovussavusse elapo ni waakumiha atthu. ⁹ Onaahala owiirela anantthukiya: Yaale ari ootthukeliya, akhume: Nthoonhere. Ayena anaahala weetta n'maparapaarani ni anaahala weetta mooteene. ¹⁰ Ayena khin'hala waavola etala wala ntthona; wala vakaani nttukuttha nontjuwa khanin'hala waapaha, kontha yaale anoonela ekiriri anaahala weettihera; Ayena anaahala weettihera npaka mapuro ari maatji. ¹¹ Ni kinaahala otatussa mittala myaakotjaka tjooteene; Kinaahala orehenrya eparapaaratjaka tjooteene. ¹² Nkaweha, atthwaala an'hala owa elapo yoottayi; akhwaawe an'hala okhuma onkela ephyoo akhwaawe onkhuma ephyoo, akhwaawe akhumaka elapo yo Sinim. ¹³ Mwiipe erimu, ntthape etthaya; mwiipe, myaako! Kontha Apwiya anawaamaliha atthwaaya ni anaahala woonela ekiriri atthu oohuva. ¹⁴ Siao aahiira: Apwiya ahokitthawa ni ahokiliyala. ¹⁵ Wan'niiranyaa, nthiyana onliyala mwaamwanawe, aamwaka, hata himoonele ekiriri nan'yarale. Massi, hata anliyalaka, Mi akinooliyalatjani. ¹⁶ Matjineenhu kantikhale n'matatanimwaka ni elipiherotjinhu tjiri nimiivano. ¹⁷ Assaaneenhu anaahala owa woohipitja, hata yaale yookwanhulatjani aniira arwaaka. ¹⁸ Nkaweheehani, ooteenetjaya aniira awaatjaka wariinhu. Khanpa tjinkalaaka phiniiraaya Apwiya, weekheeli n'naahala owara phanka tjoowara, ni phanka oopheela otheliya, nhu n'nohala okhala naayena. ¹⁹ Onookhalaru othako woothamiya, elapo yookwanhuwatja, vano onkookhala mwankaani waatthu ankhala, ni yaale yookhuurale an'hala okhala ottayi. ²⁰ Assaana yaayaralya, okathi wowunla, anaahala owuulumatjera; Nipuron'na ophunhyaa; n'nivahe nipuro nuulupale wiira nikhale. ²¹ Vano, nhu n'naahala okoha tjo: Tupani kiyarenle assaanaala. Khayaayara ni oohipheeliya, yaakhala ootthawiya. Tupani oonuwihale assaanaala. Nkawehani, kaahin'nhe veekha; ankhumenla vayi. ²² Apwiya phiniiraaya: Kinaahala otaphulela ntatanaka nlaponi; kinaahala waavaha nthonhero atthu. Ayena anaaahala woowiiherani assaaneenhu n'matataniwinhu ni n'naahala waateessa wanikhatani. ²³ Mamwene an'hala okhala an'nathumwaninhu ni mapwiyamwene an'nanumwaninhu; anaahala owooromihelani vathi ni anaahala olata ntthupi non'nhaanimwinhu; ni nhu n'naahala otjuwela wiira kaApwiya; yaale ankanriiha khan'hala woona ehaaya. ²⁴ Tjinaavukuliya tjookhalana tjanakhotto, ni ootthukelia okhala ootaphulatjiya. ²⁵ Massi Apwiya phiniiraaya: Khweeli ootthukeliya anaakussiya wanakhotto ni tjitthutjawe tjinaakussiya, kontha kin'hala okhala naawananiinhu ni kinaahala owoopola assaaneenhu. ²⁶ Kinaahala waaliha anoohuvihani niiinamaaya; anaahala ohapaliya niiphomyaaya, phanka nipha. Ni ooteene anaahala otjuwela wiira Mi, Apwiya, Kimoopoliinhu, oowerya tjooteene oJaco.