¹ Mwiiwe atthu aJaco, nhu n'niihaniya nintjina naIsrael, nri n'hokorokho naJuda; nhu n'noluphela nintjina naApwiya ni n'nokhuwela Muluku oIsrael, masso woohikhweeli wala woohissariya. ² Maana aniitjiihana atthu opooma ttakattiifu ni anonkhuluvela Muluku oIsrael; Apwiya phintjinanaya. ³ Kihokhuwela mahuku oottuli; tjikhumale mwaanomwaka ni kihotjuweliha; vano wawaakuvyaatja, tjihiranyaa. ⁴ Kontha kaanotjuwela wiira waari oolipa, mitinka tjonssikonimwaa tjaari phanka eyuuma ni eyuutji, phanka eporontji. ⁵ Phimaana koohimeeryale tjitthun'nha, tjihinaaya wiiranyaa, koohimeeryale wiira ohuulumatje: Nlukwaaka phipankale, wala: Elataratwaaka yowiitthiya ni mulukwaaka phipankale tjitthun'nha. ⁶ We ohiiwa tjen'nho, ohoona tjooteene, ni khunthamala wiira yuulumalyaaka ekhweeli. Okhuma nen'nava, kinaahala woothonhera tjitthu tjophiyaaru, tjoovithiya, tjahaatjuwelaa. ⁷ Nen'nava, ohiya mahuku avirale, tjihokhala tjookhala, ahinaaya mahuku olelo, khawiiwale tjuuulumeliyaka wiira ohiire: Khweeli mi kaanotjuwela. ⁹ Mwaha wonfento nintjinanaka, kinaahala wunteelela orussiyawaka, ninttittimihwaaka akin'hala wookwanhula. ¹⁰ Nkaweha, kihooreeriha, massi kahi phanka eparatha; Kihoottarussa n'mwaapuni momahuviho. ¹¹ Mwaha wonfentwaaka, mwaha wonfentwaaka, kinaahala otthuniha wiira ntjiananaka nihittittimihiye. Akin'hala onvaha ntthu waaryawaka. ¹² Okiiwe, Jaco! Israel, yoole mwiihanlyaaka: Mitimi oopatjera ni oomalihera. ¹³ Khweeli, ntatanaka nihunpa etthaya, Ntatanaka noolopwana nihunpa erimu; kiihanaka, tjiniiwa tjooteene. ¹⁴ Nthukumane, nhu ooteene, ni mwiiwe! Tupani wanhu uulumenle tjitthun'nha. Otthuna waApwiya onamwiiranyaa oBabilonia. Otthuna waApwiya ayena anaweettihera acaldeu. ¹⁵ Mi, Mi kihuuluma! Khweeli, kihuuluma. Kihon'waana, ni yena naahala otthema. ¹⁶ Nkaattamenle ni nkiiwe; okhuma nankhuma, akuulumale nssiirini; tjiiranyaavale, Kin'hala okhala woowu. Vano, Apwiya ahokiveleeliha nin'nepaaya. ¹⁷ Apwiya ttakattiifu, oIsrael phiniiraaya: Timi Apwiya, Mulukweenhu, noofunttani tjoopheela otthema, n'weettiherani nttala woopheela weetta. ¹⁸ N'niiwenlale tjoorumatjaka! Nrettelyaa ni wanriihawaa tjinari phanka maatji, niissariyaa, enari phanka mawinpi oopahari. ¹⁹ Amutjiinhu yaahala okhala entji phanka npuussu, assaana on'mirimanimwinhu entji phanka npuussu; ntjinaninhu khanaathikiliya wala khanaarimeela ohoolowaka. ²⁰ Nkhume oBabilonia! Mwaatthawe acaldeu! Nookhuwela wootteeliya, nkhuwele! Ntjuwelihe! Nrweehe npaka n'malenle elapo! Mwiiraka: Apwiya ahomoopola nrumeyaaya Jaco. ²¹ Ayena khanaavola ntthona okathi weettihiyaaya moothakoni naApwiya; yaahaatjaliheratja maatji; Ayena yaahopwessa mwala ni yaahomwaryaa maatji. ²² Khuuvo nrettele waatthu ootakhala, Apwiya phaniira.