¹ Okhuruwe ni wookome wantthupini, eharussi yoBabilonia; wookome vathi woohihitje, mwaana aacaldeu. Khunrowiihaniyatho omahala wala ooreeriya. ² Okusse nssilo ni ossile ephepa; orule nleessonaa nimwiila wovistiito, okhunule mettotjaa. ³ Onkoohala tjiitjo, khweeli, ohaayaniwaa onaahala woonyaa: Mi akinhala omoonela othunku ha ntthu n'motja. ⁴ Nkhaviherweehu, Apwiya, ntjinanaya, ttakattiifu oIsrael. ⁵ Wookome omaale ni orwee wiipiphini, mwaana aacaldeu; kontha khunkowiihaniyatho pwiyamwene moomweneni. ⁶ Kaanookassiriya naatthwaaka; kaahaakussa atthwaaka, phuuvaha n'matataniwaa, massi khuthoonherale ekiriri; waavahenrale amuluku eethiru. ⁷ Waahiira: Kinaakhala woohimala phanka pwiyamwene muulupale. Ni, npaka n'navaa, khukusserale ekhweeli tjitthun'nha, wala khupheelale phanka tjaapheelaaya. ⁸ Vano, mwiiwe n'navaa, nhu n'nofenta tjinootjivelani ni n'nokhala oolipa, nhu n'niira wanrimaniwinhu: Mi kihaavo, ni khaavo nkhwaawe phanka miivano; akinkhalatho nankhweeli, ni akinkhalakhalatho kikhweliyaka naassaanaaka. ⁹ Massi wanihukuni tjinaahala wookhumenlani tjitthun'nha: okhweliya naassaaneenhu nookhala nankhweli; tjinaahala owa woohipitja, n'nookhalaru ananhanka, tjintji tjinawookhumenlani. ¹⁰ Nhu n'hokhuluvela tjoonhalatjinhu ni n'hiira: Khaavo nkoona; otjuwelatjawinhu ohoohapussani, massi nhu wanrimaniwinhu mun'noolumatja: Mitimi ni khaavo nkhwaawe ookilikan'na. ¹¹ Tjookhuma tjinaahala wookhumenla; khun'hala okhwitiri waakihera niitjukutjaa. Okwanhuwatja onaahala woophwanha ni khun'hala okhwitiri otthawa, ni tjowoopiha tjinaahala wookhumenla, ohinaaya otjuwela omwaneene. ¹² Okhanhenre ovara tjoovaratjaa noonanhankooyo, tjen'nho tjiivahatjenryaa okhuma wayariyaa; on'nokhala otthapeliyaka, on'nokhala tjootakhala tjihoophwanhaka. ¹³ We ohootjyaa watjookohenra; yaayo atthwaayo yoovusse ni awoopole, yaayo an'wehaweha erimu no awehaka etthontto, yaayo ankhuwela tjooreera awoopole wotjitthu tjin'hala okhumenla. ¹⁴ Nkaweha, ayena an'hala okhala phanka mitathi ni mooro onaahala waapaha. Ayena khan'hala wiitjoopola wamalimini womooro. Khaavo makhala oopheela ayena woottha wala mooro woopheela ayena orukureerya! ¹⁵ Okhala wiira ayena an'hala okhala waayena, yaale yaavaranaleenhu nteko, aweettanaleenhu okhuma enanttonpe; khula ntthu waayena ahojussenra ovara tjitthu tjoohiloka; ni, wavekela nkhavihero, khaavo n'hala owoopola.