¹ Bel nawooroma, Nebo naakohora; amulukwaaya eethiru anteessiya niinama tjuulupale. Amuluku eethiru anaateesseenhu mirintti tjoolemela weenama tjuulupale. ² Nkhayi, an'nokokhora; khan'hiyatho elataraton'nho ni ayena ahokhaa ootthukeliya. ³ Nkiiwe etthoko ya Jaco, ooteenetjinhu, oohala mwa etthoko ya Israel, yaakussalyaaka n'hinayariya, okhuma n'mirimani. ⁴ Ni, hata mowuuluvalanimwinhu, timiivano nanlelo; npaka ekhararitjinhu tjinkhaaya tjootteela, Kinaaahala wooteessani. Kihowunpani ni kiinaahala woolihani ni wookhaviherani. ⁵ N'nohala okilikaniha nipani. N'nomooneenhu okilikan'nana tupani. ⁶ Atthu an'nokumia eweeru munrupaniwaya nootjuwela elemelelwaaya eparatha; ayena anaamuulumana nphitalaata, n'hala onpanka muluku; nonkokhorelaaya ni nonvuwihaaya. ⁷ Ayena anonkussa wanikhatani; amweessaka nipuronawe; phukhalaka vaavaa, khaneenheenha. Phunonkhuwelaaya yooyo. massi yoola khanaakhula walaani khaaavo oopheela woopola mikatjamihotjaya. ⁸ Muupuwele tjitthun'nha, n'hikhalakhale nkhottaka, nhu atthu oohanhurihavaa! ⁹ Muupuwele tjitthu tjivirale, tjokhalayi, kontha Timi Muluku ni khaavo nkhwaawe, Timi Muluku ni khaavo ookilikan'na. ¹⁰ Kin'nokhuwela omalela okhuma woopatjeroni, ni kin'nohimya yeele ehiniiranyaa. Mi kin'nohimya: Enpheelaaka en'niiranyaa, ni kin'nopanka tjinpheelaaka. ¹¹ Kin'nomwiihana mwaanuni muulupale onkhuma ephyoo, ntthu nthanlalyaaka elapo yoottayi; khweeli kihomwiihana, ni kinaahala onvarela nteko; kivarale nootthunawaka, ni kinaahala opanka. ¹² Nkiiwe, nhu, oohiiwava n'hintthuna ovara yooreera. ¹³ Kiniira kiikhaliheraka wakhiviru essariyaaka; yeeyo khiri ottayi woopheelawaka woopola khinpitja; kinaahala owiiha woopwaa oSiao, ni waaryawaka , oIsrael.