¹ Apwiya phimwiirelalyaaya Ciro, ntthapelalyaaya, nonvarenlaaka moono woolopwana, kakumiha elapo ohoolowawe, emotja niikhwaaya, wakwanhulatka mamwene nootthukula mikhora, mikhoran'nho tjin'hala okhala tjootthukuwa: ² Kinaahala woohoolelatjani ni kinaahala okwanhulatja myaako; Kinaahala okwanhulatja mikhora tjoolipessa ni kinaahala okwanhulatja tjoyuuma, ³ ni kinaahala woovaha tjoosunkiya tjonpiphini ni mihakhu tjoovithiya munttalani; ni onaahala otjuwela wiira Timi, Apwiya, Awiihanale nintjina. Mi, Muluku aIsrael. ⁴ Mwaha wonfento waJaco, nantekwaaka, oIsrael, nthanlalyaaka, kiwiihanale nintjina: kihoovaha nttittimiho, onookhalaru wiira khunkitjuwela. ⁵ Mi kaApwiya, ni khaavo nkhwaawe; khaavo Muluku nkhwaawe woohikhala Mi. Kinaahala wootthonkomanihera okhottoni, hata ohikitjuwele; ⁶ wowiira atthu atjuwele wiira, okhuma ntjuwa npaka okela, khaavo Muluku nkhwaawe woohikhala Mi. Timi Apwiya, ni khaavo nkhwaawe. ⁷ Kinaapanka nthuko niipiphi; Kinaapanka nrettele niiwaniwani; Timi Apwiya, kinpanka tjitthun'nha tjooteene. ⁸ N'mwaresse wiirimu epula; nkurusse wiirimu essariya. N'hiye etthaya etaphuwe ni eruwerye woopwaa, ni, nkhayi, akhalane n'nema. Mi Apwiya, kihunpa. ⁹ Hotakhaliya yoole n'hala on'nhakulihan'nana yoole munpale! Yooyo, khankhala ekhalako yooloko wokhalako tjooloko vathi! Oloko onamwiirela namapanka ekhalako: Onpankani. Wala: Oniirani. Ntekweenhu khawaarina matata okathi waapankiyaaya. ¹⁰ Hotakhaliya yoole niirela athumwaane: Onlelani. wala nthiyana: On'yarani. ¹¹ Apwiya phiniiraaya, yooyo paassi ttakattiifu oIsrael, wunpaleni: Essiyani okikohaka en'halaaka wiiriha assaanaaka. Onaahala okihimeerya en'halaaka ovara ninteko won'matataniwaka. ¹² Kihunpa etthaya ni kihomunpa ntthu. Yaari matataaka ataphulenle ota erimu ni kaahiirela etthontto wiira tjikhale tjowaarya. ¹³ Kihonvussa Siro nssariyanimwaka ni kinaahala wookolola mittalatjaya. Yena naahala oteka epoomaaka; yena naahala waahiya atthwaaka arwaaka owaani, woohihissapu wala woohaakhatjiya, Apwiya phaniira. ¹⁴ Apwiya phaniira: Etjaaira tjoEgito nimihakhu tjoEtiopia, naatthu ootjuwanyeessa onaahala owiiheriya. An'hala okhala awaa. Ayenatja anaahala wootthara, ootthukiyeene. Ayena anaahala okokhora ni anaahala woolepela yiira: Weekhweeli Muluku riniwe ni khaavo nkhwaawe onvikana Yena. ¹⁵ Weekhweeli, oMuluku oniipitha, Muluku oIsrael, Moopoli. ¹⁶ Ayenatja anaahala woonihatjiya ehaaya ni khan'hala ottittimihiya; yaala anaakokhorela attontto anaahala woona ehaaya. ¹⁷ Massi Israel naahala woopoliya naApwiya, niwoopoliya woohimala; we khun'halatho woonihatjiya ehaaya wala othanhiya. ¹⁸ Apwiya yunpale erimu aniira tjo, Muluku eekhweeli upale etthaya, yunpale ni ataphulenle; Ayena ahunpa, woohinhoonhiya, massi aholokiha wiira ekhaliye: Timi Apwiya, khaavo nkhwaawe. ¹⁹ Khiivo yuulumalyaaka yowiipithiyiya; akuulumenle amutjaawe Jaco: Nkirweele mahala. Timi Apwiya, kinuuluma niikhweeli; kinuuluma tjitthu tjokhweeli. ²⁰ Nthukumane ni n'mwe! Nthukumane ooteenetjinhu, ootthawa ootayi! Khiivo entjuwelaaya anteessa elatarato ni anaakokhorela amuluku ahinoopola. ²¹ Mwaattamenle ni nkikhuwele; nttonke tjirineenhu! Mwaahiye yuulume nkhayi. Tupani ttonkale tjitthun'nha nen'ne nokhalayi. Tupanin himyale. Akinakhala Timi, Apwiya. Khaavo Muluku woohikhala Mi, Muluku ossariya ni Moopoli; Khaavo nkhwaawe woohikhala Mi. ²² Nkihokoleele ni n'naahala woopwaa, nhu, n'nokhala omalenle elapo; maana Timi Muluku, khaavo nkhwaawe. ²³ Kinawiiluphela, kinkhuwela ekettelotjaka tjossariya ni akin'hokoleela ottuli: makutha ooteene anaahala okokhora, nimalimi noteene aanaahala olaphulula. ²⁴ N'naahala okiirela: Mwaapwiya paassi ohaavo woopwaa niikuru. Yaale arussiye ooteene niyeneni anaahala onkokhorela, niihaaya. ²⁵ Mwaapwiya amutji ooteene naIsrael ninaahala otaphulatjiya; Mwaayena, anaahala otthapatja.