¹ Massi n'nava, Apwiya phiniiraaya. Yena phiwunpaleni nhu atthu oJaco; Yena phookhalihaleni: N'hoove, kontha kihootaphulatjani; Kihowiihanelani matjineenhu. Mwaawaka. ² Mweetta n'maatjini, Kin'hala okhala ninhu; mwavira n'mamoolokoni, khan'nohala otjama; mwavira wamooroni khun'hala woopahani, wala malimyaaya khan'hala owiirihani etthu. ³ Kontha Mi kaApwiya, Mulukweenhu, ttakattiifu oIsrael, moopoliinhu. Kihon'vaha Egito wiira awoopoleni, oEtiopia ni Seba nipuronaa. ⁴ Onawoonya wiira phiyooreerela ni yoophwanela wameethoniwaka, kontha kinawoofenta; phimaana, kinaahala waavaha atthu nipuronaa naatthu akhwaawe wowaakakhaniha ekumyaa. ⁵ Ohoove, kiri niweeyova. Kinaahala waawaana assaanaa onkhuma ntjuwa, ni kinaahala wootakanihan'nana onkela ntjuwa. ⁶ Kinaahala wiirela onrwaa ephyoo: Mwaavahe, ni okuussini: N'himwaateelihe ntthu! Waawaane assaanaaka mapuro ootalivyaana ⁷ ooteene yaale yiihaniye nintjinanaka, yaale awuunuwihalyaaka ni waaryawaka, yaale awunpalyaaka, khweeli, yaale yaakhalihalyaaka. ⁸ Mwaawaane atthu arinimeetho, massi khaanoona, arina maaru, massi khaaniiwa. ⁹ Athukumanatje atthu ooteene. Tupani waayena uulumenle attonkaka tjitthu tjokhalayi. Yaawaane anamoonaaya wowiira yoonyee wakhala wiira ekhweeli, wowiira yiiwe ni akupaleele: Eyo ekhweeli. ¹⁰ Nhu mwaanamoonaaka, Apwiya phaniira; ni nantekwaaka, nthanlalyaaka, wiira ntjuwele ni nkaamini ni ntjuwele eryaaka. Mi kihinaaya, khaavotho Muluku nkhwaawe, ni khan'halatho okhala kinavirale. ¹¹ Mi Timi Apwiya ni khaavo moopoli woohikhala Mi. ¹² Kihohimyatja, kihoopola ni kihokhuwela ni khaavo muluku nkhwaawe wariinhuvaa. Nhu mwaanamoonaaka, Apwiya phaniira; Timi Muluku. ¹³ Okhuma khalayi, kihokhala ni khaavo oopheela onkussa ntthu n'matatanimwaka. Tupani npheela okihiiha envaraaka. ¹⁴ Apwiya phin'himyaaya, nkhaviherweenhu, ttakattiifu oIsrael: Mwaha wawinhu, kihoveleeliha nphwinko waanakhotto oBabilonia ni kihoweettihera anamatthawa ooteene kaahiyaka ootjukulatja ni oohuvela otteeliya atthu ooBabilonia. ¹⁵ Timi Apwiya, ttakattiifweenhu, munpale Israel, mweneenhu. ¹⁶ Apwiya phiniiraaya Yaale ahulale nttala n'pahari, ¹⁷ Yaale yeettihenre, ikukuttha ninphwinko waanakhotto okuru. Ayo yaahomoratja nkhayi, khan'hala ovuwatho; aholiyaliya, ofuttiya phanka etthu yoopahiya. ¹⁸ N'huupuwele tjitthu tjokhalayi, wala n'hiwehawehe tjitthu tjivirale. ¹⁹ Nkawehani, kiri thayaari woopheela ovara etthu yophiyaaru; vano, ehantja wiiranyaa; nhu khan'notjuwelela. Kinkoopanka eparapaara etthaya yowuuma niikwirinti tjomaatji moothakoni. ²⁰ Enama tjon'mwiini tjinaahala okittittimiha, ni tjoovava, kontha kihovaha maatji moothakoni ni emuro etthaya yowuuma, wowiira avurye oothanliyaaka, ²¹ atthu awunpalyaaka wowira akhuwele nttittimihwaaka. ²² Massi nhu khankiihanale, atthu oJaco n'nookootjyaa, atthu oIsrael. ²³ Khankiwiiherale epwittipwitthiinhu hateemotja, phanka tjoovaha tjoopahiya, wala khankittittimihale nookuttho. Akoovahatjenreni tjoovaha tjotthaka, wala akiwootjyaale tjoovaha tjolunpani. ²⁴ Khanthumale n'hali woonukhela onaa, wala khankimwaressenle makhura omikutthotjinhu; massi n'hokilemeliha nitjookossatjinhu, n'hokootjeeha nitjoovaratjinhu. ²⁵ Mwaha womiivano, Timi kinlevenla tjookossatjinhu; niMi akin'hala owiiha n'muupuwelelonimwinhu tjookossa. ²⁶ N'kuupussere yiiranyaale. Niwatjihane nkhayi; nthoonhere nlattweenhu wiira nkhale oovira. ²⁷ Athumwaninhu ahokossa ni ahooleliinho owantjera ahokitanhifu. ²⁸ Phimaana, kaahaavahenra anankuttho; ni kaahowoonihatja ehaaya atthu oIsrael.