¹ Ola phinantekwaaka, nonlihaaka; nthanlalyaaka, nkihakalaliha. Kihonvaha n'nepaaka; Yena naahala owaana essariya nlaponi. ² Khan'hala okhuwela wala khan'hala wiiwiya ntjuunawe n'mittalani. ³ Atthu ootteethyaa yena khan'hala waahuviha; Yena n'hala ovaraa niissariya nin'nema. ⁴ Khan'hala wootjyaa, wala otteethyaa, npaka wan'halaawe ovahiya essariya nlaponi; niilapo tjoottayi tjin'hala otthara ekettelwaawe. ⁵ Apwiya Muluku aniira tjo, Yaale yunpale erimu ni ataphulenle, yuhpale etthaya nitjitthu tjooteene tjinruweriya, anaavaha ephumu atthu ankhala mon'mo niikumi. ⁶ Mi Apwiya kiwiihanale niissariya ni kinaahala ovarenla ntatanaa. Kinaahala woossunka ni kinaahala owaataaniha naatthu, phanka nthuko waamalapo, ⁷ wiira otthukule meetho aatthu oohoona, wiira waatthukule atthu ootthukeliya nkalapoosso, naale ari mwiipiphini. ⁸ Mi kaApwiya, n'na phintjinanaka; Waaryawaka akin'hala onvaha ntthu nkhwaawe, wala nttittmihwaaka waattontto. ⁹ Tjitthu tjowantjera tjihovira; vano, kinttonka tjitthu tjophiyaaru. Tjihinaaya wiiranyaa, kinaahala woottonkelani. ¹⁰ Mwiipele Apwiya ntjipo nophiyaaru, ninttittimihwaaya okhuma omalenle elapo; nhu, n'neeta n'mapahari jitjitthu tjooteene tjiri mon'mo; nhu atthu oottayi, naale ankhala mon'mo. ¹¹ Moothakoni ni n'mapooma nkhuwele, epooma yoQuedar ekhuwele nootteeliya! Atthu ankhala oSela akhuwele; akhuwele n'mamyaakoni. ¹² Yaahakalalihe Apwiya ni akhuwele n'mafukhe. ¹³ Apwiya an'hala okhuma phanka nakhotto; phanka ntthu nakhotto, Ayena anaahala ottawiha nfentonaya. Anaahala okhuwela khweeli, anaahala okhuwela weekhotto; Ayena anaahala othoonhera awanani oweryawaya. ¹⁴ Kihomaala okathi mwintji, vano kinaakhuwela phanka nthiyana omuntekoni mooyara; kinaahala opanka tjintikhineenhu. ¹⁵ Kinaahala wuumiha n'noruweryeenhu mooteene; kin'hala otatussa emuro ni wuumiha mooteene. ¹⁶ Kinaahala weettihera atthu oohoona nttala ohintjuwelaaya; kin'hala weettihera n'hintjuwelaaya. Epiphi kinaahala nthuko ohoolowayatja ni kinaahala wookola mittala tjootjikuwa. Tjitthun'nha kinaahala opanka ni akin'hala waatthawa. ¹⁷ Anaahala ohokolyaa, ni an'hala woonihatjiya ehaaya woomalela, yaale ankhuluvela elatarato tjoohemiya, yaale anuulumela elatarato: Nhu mwaamulukweehu. ¹⁸ Atthu oohiiwa, mwiiwe; moone, nhu, oohoona, wiira moone. ¹⁹ Tupani ohoona, woohikhala nantekwaaka. Wala oohiiwa phanka nrumeyi nveleelihalyaaka. Tupani hinoona phanka npwanaaka mwaataanalyaaka, wala oohoona phanka nanteko aApwiya. ²⁰ Onamoona tjitthu tjintji, massi khuntjuwelela; maarwaayo ari ootthukuwa, massi khiivo eniiwaa. ²¹ Ohaatjivela Apwiya ottittimiha essariyaaya ni okhaliha yowaarya ekettelwaaya. ²² Ala atthu owin'yiya ni owaakhatjiya; ooteene atthukeliye munlikittini, ootthukeliya n'makalapoosso; ayenatja athatuwale tjitthu tjoohala woohikhala ntthu oowoopola, ni khaavo iirale: Mwaahokolosse! ²³ Tupani wanhu n'hala wiiwa yeeyo. Tupani n'hala wiiwa nootjuwelela yoohoolo. ²⁴ Tupani nvahale Jaco phanka yoohala ni Israel waanamatuphela. Khaanakhala Apwiya, anaakossereehu, anookhotta n'mittalani niikettelo woohiiwelela. ²⁵ Phimaana, Ayena ahaamwaresselatja orussiyawaya, niikhotto, ni yaahaarukureerihatja mooro, massi khaatjuwelelale. Yaahaapahakatja, massi ayenatja khaahelatjale wanrimani.