¹ N'maale ohoolowaka, athu on'mafukhe; atthwaayo tjikhale oowaakulela ekurutjaya; nkaattamenle ni muulume niwatjihane mwaha n'motja. ² Tupani nvussale ntthu ossariya onkhumantjuwa, khun'vaha owerya maloko ooteene. Yena nawaamwaressa mamwene; niikatanaawe, ninttheerenawe, Yena naakhaliha phanka ntthupi. ³ Yena naawoomola ni nvira ohoolowaya ninlipihero, aakuvaka weetta enhaatjawe woohinhakela vathi. ⁴ Tupani pankale ni maliherale tjoovariyan'nho. Tupani eetthihenre maloko okhuma nankhuma. Mi, Apwiya, oopatjera ni oolmalihera, Timiivano. ⁵ Atthu on'mafukhe an'noona ni an'noova; atthu oottayi an'noova. ayena an'naattamela ni aniira awaaka. ⁶ Khula ntthu nankhavihera nkhwaawe ooteene yiiraka n'motja ninkhwaawe: Nlipe nrima. ⁷ Tjitjon'mo namassararya n'naalipihera akhwaawe, ni ntthu nvara nteko nimarteelo n'nolipihera nvara nteko niitthu ekhwaawe, iiraka mwaha wayoolipiha: Yooreera. Ayena ankhomela niipereku wiira eheenheenhe. ⁸ Isarel, nantekwaaka, Jaco, nthanlalyaaka, nloko naAbraao, npwanaaka, ⁹ n'hokolossalyaaka moomalela elapo, yooyo mwiihanalyaaka elapo yoottayi ni yooyo mwiirelalyaaka: We onantekwaaka, Kinowoothanla ni akookhottale. ¹⁰ Ohoove, kontha kiri niweeyova. Ohikutakuthyee, kontha Timi Mulukwaa. Kinaahala wookhavihera; Kinaahala wooliha nintatanaka noolopwana niissariya. ¹¹ Nkaweha, ooteene yooviruwenle anaahala woona ehaaya ni ohittittimihiya; yaale anoolupattha an'hala okhala woohiitthu ni anaahala omora. ¹² Onaahala waatholathola yaale yaawoomolaniha ni khun'hala waaphwanha; yaale yoowanana khan'hala okhala etthu. ¹³ Kontha Mi, Apwiya, Mulukwaa, kinaahala ovarenla ntatanaa noolopwana ni kinaahala owiirela: Ohoove; kiniira kookhaviheraka. ¹⁴ Ohoove, Jaco, ni nhu, atthu oIsrael; Kinaahala wookhaviherani, n'na nuulumo naApwiya, nkhaviherweenhu, ttakattiifu oIsrael. ¹⁵ N'kaweha, kin'hala wookhaliha pahnka elaamina, enphya yoweetha n'no nin'no; onaahala opwessakatja myaako. ¹⁶ Onaahala waaveera ni ephyoo enaaahala waakussa; ephyoo enaahala waavavaressa. Onaahala otthapa waApwiya ni onaahala ohakalala ottakattiifu wa Israel. ¹⁷ Oohuva ni oothweeiya anpheelatja maatji, massi khaavo; malimyaaya anowuuma nintthona. Mi, Apwiya, kinaahala waakhula mavekelwaaya; Mi, Muluku oIsrael, akin'hala waatthawa. ¹⁸ Kinaahala otjarihatja maatji, moothakoni kinaahala otatussa ehime yomaatji niitthaya yowuuma, tjinaahala otjara maatji. ¹⁹ Moothakoni, kinaahala ophattyaa mipila nimikhatju mikole nimimanka. ²⁰ Kin'hala opanka wiira atthu ooteene yoone atjuweleehe nkhayi wiirantata naApwiya phipankale eyo, ttakattiifu oIsrael phunpale tjooteene. ²¹ Nthoonhere mwaheenhu, Apwiya phaniira: N'mwiihe moolumo ootjuwanyaa, Mwene aJaco phiniira. ²² Ayena awiihe moolumwaaya ootjuwanyaa ni anihimeerye wiira onaahala wiiranyaa, wiira nitjuwele ratta mwaha wotjithhu tjen'nha. Anittonkele tjoohoolo, wowiira nuupuwele mwaha wotjen'nho ni nitjuwele tjin'halaaya ovareliya nteko. ²³ Nttonke yoohoolo, wowiira nitjuwela wakhala wiira mwaamuluku; npanke tjittthu tjooreera wala tjootakhala, wowiira nikhale oothamala. ²⁴ N'kawehani, amulukweenhu khaanakhala etthu; tjoovaratjinhu khatjinakhala etthu; yoole oothanlaleni tootakhaliya. ²⁵ Kihonvussa ntthu onkela ephyoo; onkhuma ntjuwa, kinaahala onlattula yoole niihana ntjinanaka, ni yena naahala waanhakela ahooleli, phanka namuupa ekalako tjin'nhakelawe oloko. ²⁶ Tupani ttonkale yeeyo okhuma woopatjeroni wiira nitjuwele. Wala okathi ohinaaya, wowiira niniirale: Yena nassariya. Weekhweeli, khaavo n'motjaaya uulumatjenre yeeyo; khweeli, khaavo wiiwaleni muulumaka etthu hata emootja. ²⁷ Timi kantjerale ohimya oSiao. N'kawehani alatjava, kihonveleeliha oJerusalem. ²⁸ Kawehakavale, khaavo eriyaryaayatja nuuluma yooloka, ni kakohaka khaavo naakhula. ²⁹ N'kaweni, ooteenetjaya khaanakhala etthu ni tjoovaratjaya khatjinakhala etthu; elataratotjaya khatjinakhala etthu phanka ephyoo.