¹ Mwamaalihe, mwaamaalihe atthwaaka, Mulukweenhu phiniira. ² Muulume ninttittimiho oJerusalem; nkhuwele wiira ekhotto ehomala, tjookossatjinhu tjiholevenliya, watjookossatjinhu Apwiya ahaakhenla weemaara piili n'matatanimwaya. ³ Ntju nin'nokhuwela: Moothakoni, ntthonkomanihe nttala waApwiya; mookole eparapaara moothakoni yaMulukweehu. ⁴ Malikitti ooteene anaahala ovuhenliya; myaako tjooteene tjinaahala waapatthiya; mapuro ooteene anaahala waapatthiya; ⁵ waarya waApwiya wuunuwa ni ooteene nkhayi anaahala woona, kontha malaku aApwiya ahuuluma. ⁶ Ntju nikhwaawe niniira! Nikhwaawe ninawaakhula: Kaahala okhuwela essiyani. Enamayooteene malassi ni otjuwanyaa wooteene ori phanka ethutu n'mattani. ⁷ Malassi anawuuma ni ethutu enaanhaala ephumu tjaApwiya yapuusseraka; weekhweeli atthu malassi. ⁸ Malassi anawuuma, ethutu enaanhaala, massi nuulumo naMulukweehu ninaakhala woohimala. ⁹ Orwee mwaako woorekama, Siao, wookhalana moolumo ooreeressa. Okhuwele ventji, Jerusalem. On'mwiiha moolumo ooreera, ovusse ntjunaa, ohoove. Ohimeerye epooma tjooJuda: Mulukweenhu phuulavaa! ¹⁰ N'kawehani, Apwiya an'mwa phanka nakhotto ootthema, ni moonuwaaya woolipa onaahoolela. N'kawehani etthuvweenhu eri niyena, ni yaale awoopolalyaawe ari ohoolowawe. ¹¹ Ayena anaahala oliha enamatjaya nin'hakheli, anaahala othukumaniha, n'moononomwaya, ni anaahala oteessa weessa waattamenla wanrimaniwaya; wooreerela, anaahala weettihera epwipwitthi tjinaamwiha assaanaaya. ¹² Tupani phimale maatji n'matataniwawe, wala phimale erimu, wala helale ntthupi novathi ntthuttuni, wala elemelelo tjomwaako. ¹³ Tupani ntjuwelela muupuwelelo waApwiya, wala nonphwanhiha akhili. ¹⁴ Ayena tupani naahimeerya. Tupani naahimeerya opanka tjitthu tjooreera, wala naahimeerya otjuwelatja, wala aathoonherale nttala wootjuwelatja. ¹⁵ Nkawehani! Elapon'nho tjinkhala phanka ettoyi yopalti; tjinkhala phanka ntthupi n'mapalassani. Nkawehani! Ayena anaatjuwela elemelwaaya phanka ntthupi. ¹⁶ N'mafukhe khantessera tiigeli, wala enama tjon'mwini khatjintossera opahiya phanka tjoovaha. ¹⁷ Elapo tjooteene khatjinontossa; Ayena anaalaka ohikhala etthu. ¹⁸ Muluku n'nonlattaniha naani. Mulukuni eethiru nonlattaniheenhu. ¹⁹ Muluku eethiru, npankiya nintthu, npankiya niiwooru ni awarihiyaka ekwirinti tjoparatha. ²⁰ Woopheela ovaha tjoovaha, onthanliya nri ohinuntta phupheelatjiyaka ntthu ootjuwelatja wiira anpanke muluku eethiru. ²¹ Vano nhu khan'notjuwela. Khan'niiwaka. Khan'himeeryatjiye okhuma nankhuma. Khantjuwelenle wunpiyawaya etthayeela. ²² Yena phinookoma watjulu wotthaya; atthu ari phanka etjoroope oholowawe. Ayena antaphulela erimu phanka ekurtiina ni anaamwarya phanka heema wiira akhale mon'mo. ²³ Ayena khaanaakhaliha ahooleli etthu; ankhala oohipiihiya etthu aphuki olapo yovathi. ²⁴ Khaathipeliye ratta, khayaaliye ratta, massi an'nokhala nlaponi, Ayena anawaapuussera ni ephyoo enawaakussa phanka etthu yoohifaita. ²⁵ Tupani, vano, n'haleenhu okilattaniha. Tupani nkilikan'na. Ttakattiifu phin'himya. ²⁶ N'mwehe erimu! Tupani unpale etthontto tjooteene. Yena nawaakumiha anakhotto ni nawiihana ooteene nintjina. Mwaha weeyuulupalyaawe ni mwaha wokurutjawe, khaavo n'motjaaya nrimeela. ²⁷ Essiyani wiiraka, Jaco, ni okhuwelaka Israel: Nttalaaka onoovithiya waApwiya, ni Mulukwaaka khankutakuthyaa niitthu enpheelaaka. ²⁸ Maanaaya khuntjuwela. Khawiiwale. Muluku oohimala, Apwiya, yunpale n'malenle elapo, khanootjyaa wala khanssanka; khuuvo mwiinano nootjuwelatjawaya. ²⁹ Ntthu owootjyaa, Ayena anan'vaha ekuru, ni ntthu ootteethyaa, ananlipiha. ³⁰ Hata amwaavano an'nootjyaa ni an'nossanka, ni amwaavano an'nokakathuwa ni an'nomora. ³¹ Massi yaale ananriiha Apwiya anaahala ophwanhatho ekurutjaya; ayena anaahala owela nimapupha phanka enaka; anaahala otthawa ni khan'hala wootjyaa; anaahala weetta ni khan'hala otteetthyaa.