¹ Mwene Ezequias wiiwalyaawe moolumwaayo, yena ahaaahula ekuwotjawe, aahowara essaakho ni aahorwaa npaani mwaApwiya. ² Yena aahonveleeliha Eliaquim, aahoolela enupa yuulupale; Sebna, mayowantikha, mahumu naanankuttho, ooteene yaawarale essaakho, wa Isaias, mwaana aAmoz, nrumeyi. ³ Ayenatja yaahomwiirela: Ezequias iirale: Nihikun'na nihuku nomahuviho, otthukeliya noohontjwaatja, phanka mwaana iipheelaka oyariya, massi anumwaane khankhwitiri oyara. ⁴ Wanaakhalaka Apwiya, Mulukweenhu, yiiwaka moolumo ankhulupale, yooyo, mwene oAssiria, nveleelihalyaawe wiira amoonan'ne Muluku nkumi, ni atthukele moolumo Apwiya, Mulukweenhu, yiiwalyaaya. Vano, orweehele ohoolo mavekelwaa wayaale ahanleva. ⁵ Vano, anantekwaawe mwene Ezequias yaahowa npaka Isaias, ⁶ ni Isaias aahowiirelatja: Mwaattonkelatje amweneenhu Apwiya en'himyaaya: N'hoovatje moolumo yiiwaleenhu, yaayo anantekwaawe mwene oAssiria ankiruwanelaawe. ⁷ Kinaahala omweessenra n'nepa, ni yena, iiwakavale, naahala ohokoleela elapwaawe. Kin'hala omorihela owanuwawe niikatana. ⁸ Vano, nkhulupale aahohokolyaa ni anphwanhale mwene oAssiria awanaka niilapo yooLibna, kontha aahiiwa wiira mwene aahokhuma oLaquis. ⁹ Tjo, Senaqueribe aahiiwa wiira Tiraca, mwene oEtiopia ni Egito, aahotthonkomaniha ekhotto; vano, yena aahaaveleeliha arumeyi wa Ezequias nin'na ntjunraatjin'na: ¹⁰ Mwanttonkele Ezequias mwene ooJuda: Wiira Mlukwaa, nonkhuluvelaa, ohiithepye wiiraka: Jerusalem khankoovahenriya n'matatani mwamwene oAssiria. ¹¹ Ohiiwa tjitthu tjipankalyaaya mamwene oAssiria elapo tjooteene, akwanhulaka woomalela. Vano, onooniha wiira onaahala otaphuliya. ¹² Wakhalaka tjon'mo, amuluku onlaponi anaahala owoopola an'nathumwanaka yaakwanhulalyaaya: Okhuma Goza, Hara, Rezefe naatthu oEden, oTelassar. ¹³ Mwene oHamate rivayi, mwene oArpade, mwene opooma tjooSefarvaim, oHena ni Iva. ¹⁴ Ezequias aahaakhenla nikhanta n'matatani mwaarumeyi ni aahossoma. Vano, aahorwaa npaani mwaApwiya aahotthukula ohoolowaya. ¹⁵ Ezequias aahovekela waApwiya: ¹⁶ Apwiya, Muluku oIsrael, nhu mookomale watjulu wotjitthu tjooteene, nhu nri Muluku n'motja paassi weehooleli tjooteene nlaponi, nhu munpale erimu niitthaya, ¹⁷ nthetyee maarweenhu, Apwiya, ni mwiiwe. Ntthukule meethweenhu, Apwiya, n'wehe; mwiiwe moolumo aSenequeribe, yaayo aveleelihalyaawe wiira antarawatje Muluku nkumi. ¹⁸ Eyo ekhweeli, Apwiya: mamwene oAssiria ahokwanhulatja elapo tjooteene niitthayatjaya. ¹⁹ Ayena ahaapaha amulukwaaya, maana khayaari amuluku, massi waari nteko waatthu, miri nimaluku. Phimaana, assiria ahaakwanhulatja. ²⁰ Vano, Apwiya, Mulukweehu, n'noopole nooweryawinhu, wowiira owene wooteene onlaponi otjuwele wiira Phinhu paassi, Apwiya. ²¹ Vano, Isaias, mwaana Amoz, aahoveleeliha ntjunraatji wa Ezequias, iiraka: Apwiya, Muluku oIsrael, aniira: Waakivekelelani mwaha wa Senequeribe, mwene o Assiria, ²² n'na phinuulumo Apwiya nimuulumenlyaaya: Mwaana eharussi oSiao nawootanhifu ni nawoothyaa, mwaana ooJerusalem noottikinhera muru ootarawatjaka. ²³ Yooyo hinontthunaa ni nonruwanaa. Ni yooyo ankhuwelaa, ovussaka meethwaa niwiittittimiha. Wattakattiifu oIsrael. ²⁴ Eriyari waanantekweenhu, n'haavirikhula Apwiya, ni n'hiira: Ninphwinko wokaarotjaka, kihowela watjulu myaako, nimapuro ootepessa orekama. Kinaahala othikila tjithanlelaleenhu ni kinaahala okela mapuro oorekamessa, mooruweryessiya. ²⁵ Kihothipa emuro ni kihowurya maatji; kihuumiha mwaamuro tjooteene oEgito vathi enhaatjaka. ²⁶ Khamwiiwale tjaahimyalyaaka khalayi ni kitthunelaka yeeyo okathi ovirale. Vano, kinpanka wiira yiiranyee. We oriva woopheela ovukula epooma tjoolipihatjiya watjootakhala tjintji. ²⁷ Atthweenhu, okuru vakaani, anaakwanhulatjiya niwoonihatjiya ehaaya. Ayenatja miri tjon'mattani, tjoopipilela, tjinkhupiya niiphyoo. ²⁸ Massi kinaatjuwela mookomelwaa, makhumelwaa, maphiyerwaa noorussiyawaa. ²⁹ Mwaha woorussiyawaa, ni moolumwaa ahokiphwanha, kinaahala omweessa tjonlwaaka nphulanimwaa, n'mwaanomwaa; kinaahala woohokolossera nttala oweelalyaa. ³⁰ On'hala okhala nthoonherwaa: Mwaakha yoola, on'hala olya en'hala wuunuwa nlaponi, ni, mwaakha wonayeeli, en'hala wuunuwa okhuma nen'na. Massi, mwaakha woneeraru, n'naahala waala noohepha, waala noolya mihokorokhotjaya. ³¹ N'koohala akhalaka ntthoko naJuda naahala orihela ntithaari tootho, ni naahala oruwerya n'hokorokho. ³² Kontha okhuma oJerusalem, oohala anaahala okhum; atthu oohala ankookhumenla omwaako Siao. Mwaha wonfentonaya Apwiya anaahala opankeeyo. ³³ Phimaana, Apwiya phiiralyaaya tjon'mo mwaha wamwene oAssiria: Yena khan'hala okela epoomeela, wala khan'hala ovonhera nttheere. Wala khan'hala owa ninkhavihero wala okhumenla. ³⁴ Nttala oweelalyaawe phunttala on'halaawe ohkoleela; yena khan'hala okela epoomeela n'na nuulumo naApwiya. ³⁵ Kinaahala waakiha epoomeela ni kinaahala woopola, mwaha wonfentwaaka ninfento wanrumeyaaka Davi. ³⁶ Vano nlaikha naApwiya naahokhuma ni naahaakhumenla atthu oAssiria, awiivaka anakhotto emiya wotusswiini nathanu. Atthu wavuwalyaaya owitjissu, yoonanyaa atthu ookhwa miphantte tjooteene. ³⁷ Vano, Senaqueribe, mwene oAssiria, aahon'hiya Israel ni aahorwaa owaani. Aahohokoleela oNinive won'wo phwaakhalalyaawe. ³⁸ Weeraawe Senaqueribe avekelaka npaani mwanlukwaawe Nisroque, assaanaawe Adrameleque ni Sarezer yaahomwiiva niikatana. Vano, ayenatja yaahotthawatja arwaatjaka elapo yoArarate. Esar-Hadom, mwaamwanawe, aahohoolela nipuronawe.