¹ Mahuku yaale, Ezequias aahoweren'nha woopheela okhwa. Vano, Isaias, mwaana aAmoz, nrumeyi, aahonkhumenla ni aahomwiirela: Apwiya aniira: Otthonkomanihatje etthokwaa, kontha onaahala okhwa; khun'hala okhala! ² Vano, Ezequias aahorukunuwela ossirini ni aahaavekela Apwiya. ³ Yena aahiira: Sontte, Apwiya, muupuwele tjoovarenlyaakani, ninrimaaka wooteene, ni tjivaralyaaka tjoorera wameethoniwinhu; ni Ezequias aahunla tjinene. ⁴ Vano nuulumo naApwiya naahowa wa Isaias niiraka: ⁵ Orwee wan'himeerye Ezequias n'hooleli aatthwaaka: Apwiya, Mulukwaa aniira tjo: Kihiiwa mavekelwaa, ni kihoona meethoryaa. Kinaahala wintjenra eyaakha khuumi nathanu mweekuminiwaa. ⁶ Kinaahala wookumiha epoomeela mwooweryani wamwene oAssiria ni kinaahala waakiha epoomeela. ⁷ On'hala okhala nthoonherwaa, nphantte waApwiya, kinaahala opanka ekhuluvelihalyaaka: ⁸ Nkaweha! Kinaahala opanka ntthuutji moowelelani mwa Acaz weemaara khuumi. Vano, ntthutji weemaara khuumi moowelelani, yiira enarwaale ohoolo. ⁹ Mavekelo owantikhiya aEzequias, mwene oJuda, waaweren'yaawe avonaka: ¹⁰ Kiirale wiira, ekhipantte yeekumyaaka, yaahala ovira wankhora womahiye; ni kinveleeliheriya woowu woyaakhatjaka tjihanle. ¹¹ Kiirale wiira akin'hala owoonatho Apwiya elapo yaatthu akumi. ¹² Ekumyaaka yaahokumihiya ni yaahokussiya, phanka heema an'hakheli; ekumiyaaka yaanookhunakhuniya phanka ekuwo. Nhu n'hokithikila nkuwonimwinhu; othana noohiyu, Nhu n'niira n'malihaka ekumyaaka. ¹³ Kihokhuwela npaka ossa; phanka kharamu, apwessakatjaka makhuvaaka ooteene. Othana noohiyu, Nhu n'niirra n'malihaka ekumyaaka. ¹⁴ Kinkhala phanka leeketja; wiirukureeryatja phanka ekhuntta; meethwaaka ankhala owootjyaa mwaha wooweha ntjulu. Apwiya, kinkhala oohuva nkikhavihere. ¹⁵ Kipankeke essiyani. Yena aahokuulumana ni yene aahopanka tjitjon'mo; kinaahala wiikhikitjera eyaakhatjaka tjooteene, kontha kinoolemeliya nimahuviho. ¹⁶ Apwiya mahuviho akiveleelihaleenhu phookitjivela; ekumyaaka ekhale yoorapihiya. Nhu n'hoopola ekumyaaka. ¹⁷ Waari nreerelwaaka waattehattehalyaaka mahuviho mentji. Nhu n'hokikumiha munlikittini mookwanhuwatja, kontha tjootthekatjaka tjooteene n'horihela ottuliinhu. ¹⁸ Kontha ekhapure khinoossukhuruni; nookhwe khanoovuwihani; yaale ankhuruwela n'mahiye khaananriiha n'nemaninhu. ¹⁹ Ntthu nkumi, ntthu nkumi, phinoossukhuruni, phanka tjinpankaaka nihukun'na; thumwaane nawaatjuweliha assaanaawe n'nema. ²⁰ Apwiya ari mookoopola, nitthapelaka niitjipo, mahuku ooteene mwiikuminiwihu, npaani mwaApwiya. ²¹ Isaias aahohimya: Owaane nrupa wopomata, wootte onaahala ovona. ²² Ezequias tootho aahokoha: Onkookhala nthoonheroni on'halaaka owela npaani mwaApwiya;