¹ Mwaakha wonakhuumi natjesse wa mwene Ezequias, Senaqueribe, mwene oAssiria, aahokwanhula epooma tjooteene tjoolipihatjiya oJuda ni aahokhwitiri. ² Vano, mwene oAssiria aahonveleeliha nkhulupale ooLaquis oJerusalem, wamwene Ezequias naanakhotto entji. Yena aahaattamela epissina yuulupale, nparapaarani ninphantte waatthu yaakattha, ni aahokhala vaavale. ³ Akhulupale oIsrael yaakhumale opooma wiira yawuulumane yaari phaala: Eliaquim, mwaana aHilquias, nssatoro onupa yuulupale; Sebna, mayowantikha amwene ni Joa, mwaana aAsafe, antikhale tjootthuna tjaatthu. ⁴ Nkhulupale aahowiirelatja: N'mwiirele Ezequias wiira mwene muulupale, mwene oAssiria, niira: Ekhuluvelwaa erivayi. ⁵ Onuuluma moolumo oohikhala, mwiiraka ahaavo moolumo niikuru okhottoni. Vano, ononkhuluvela pani. Tupani oovahaleni ekuru tjoopheela okipatjapatja. ⁶ Nkawehani! Nhu n'nokhuluvela Egito, yoole onkhuluveleenhu woopheela wookhaviherani, massi, ntthu akhavihera, nkookhala phanka nkopo onkoottenla ntataninhu. Farao phin'halaawe onpanka ntthu nonkhuluvela. ⁷ Massi, mwakiirela: Ninaakhuluvela Apwiya, Mulukwaahu; khanakhala yaayo mapuro ttakattiifu ni altaare Ezequias yakussalyaawe, ni awiirelaka Juda ni Jerusalem: Nhu n'haana nkokhorelaka altaaryaala o Jerusalem. ⁸ Vano, kinpheela woovaha etthuvo yooreera yaapwiyaka, mwene oAssiria: Kinaahala woovaha ekavalo ekonto piili, wakhala ookhwitiri waaphwanha atthu oopheela weettiha. ⁹ Onkokhala tjani nin'hooleli ooyevessa aananteko ankunhaa. Ekhuluvelotjaa weessale oEgito mwaha wokaarotja naattho oweettiha ekavalo! ¹⁰ Vano, miivano, kiheetta npaka ophiyavaa woohikhala Apwiya, wiira kiwane niilapweele nookwanhula. Apwiya ahokireela: Waattakan'ne elapweelyo ni okwanhule! ¹¹ Vano, Eliaquim, mwaana aHilquias, Sebna ni Joa yaahomwiirela nkhulupale: Sontte waahimeerye anantekwaa niiluuka yaarameu, aramaico, wiira niiwe. N'hinuulumane niiluuka yooJuda naatthu arineehu. ¹² Massi nkhulupale aahiira: Apwiiyaaka ahokiiwa naapwiiya ninhuuvaatja wiira nuulumatje moolumwaala. Khaakiveleelihale waatthwaala yookomatjale, wiira ahaana alyaaka ehalahalatjaya noowurya minhotjotjaya vamotja ninhuuvaatja. ¹³ Vano, nkhulupale aahovuwa ni aahokhuwela niiluuka yooJuda, iiraka: Mwiiwe moolumo amwene muulupale, mwene oAssiria. ¹⁴ Mwene niira: N'hin'hiye Ezequias oothepyatjakani, kontha yena khan'hala okhwitiri owoopolani. ¹⁵ N'hin'hi'ye Ezequias ookhuluvelihakani waApwiya iiraka: Apwiya weekhweeli anaahala owoopolani; epoomeela khin'hala ovahenriya n'matatani mwamwene oAssiria. ¹⁶ N'hinviriyane Ezequias, kontha mwene oAssiria phiniiraawe: Nkikhalele nrettele ni nkitthare miivano. Vano, khula ntthu wanhu n'hala olya n'hokorokhwaawe, ni n'hala owurya maatjyaawe. ¹⁷ N'nohala opanka tjitjon'mo npaka wanooweelaakani koorweehakani elapweenhu, onkookhala etjoolya tjooteene. ¹⁸ N'hin'hiye Ezequiel oothepyatjakani iiraka: Apwiya anaahala onopola. Haavo nkuku n'motjaaya woopolale atthu mooweryani mwamwene oAssiria. ¹⁹ Arivayi amuluku a Hamate ni Arpade. Arivayi amuluku aSefarvaim. Yaayo ahomoopola Samaria mooweryaniwaka. ²⁰ Amuluku ooteene eelapweela haavo muluku oopolale elapwaawe n'matatanimwaka, phanka Apwiya tjoopolalyaaya Jerusalem mooweryaniwaka. ²¹ Massi atthu yaari oomaala ni khayaakhulale, kontha nuulumo namwene naari: N'haakhulatje. ²² Vano, Eliaquim, mwaana Hilquias, aawehaweha enupa yuulupale; Sebna, mayowantikha; Ni Joa, mwaana Asafe, nkhulupale amayowantikha, yaahorwaatja wa Ezequias niikuwotjaya tjoowaahuwatja ni aahohimeeriya moolumo ankhulupale.