¹ Nen'ne nihukun'ne, Apwiya, niikatanaaya yuulupale, yoolipa, anaahala onttarussa Leviata, enuaa yootthawessa, Leviata, enuaa yuulupale ni anaahala wiiva, npahari. ² Nen'no nihukun'no, mwiipele atthu oIsrael. ³ Mi, Apwiya, kinkhaviherweenhu; kin'noomitjerani woohihiyenra. Phimaana, khaavo nkwanhula, kontha kinaawehaweha ohiyu noothana. ⁴ Akirusiye. Okhottoni yakhala paassi atthu kinaahala weetta niyaayo; Kinaahala waapaha ooteene nkhayi, ⁵ yeehirweele nkhavihero noowaana nrettele. Akiwiihere nrettele. ⁶ Nihuku naphiya, Jaco naahala oriha mitithaari; Israel naahala wintjivihana, atjarihaka mihokorokho elapo yooteene. ⁷ N'nava, Apwiya ahonkhumela Israel phanka tjirakalihiyaaya elapo tjaakhumenlale. Yaari atthu oIsrael akhwale phanka ekhotto tjeelapon'nho, tjiivakatjiye niyaayo. ⁸ Weenan'na yoophwanela, mwaahomoomola Israel; n'homoomola phanka ephyoo. ⁹ Weenan'na yeela, tjoonhala tja Jaco tjin'hala okhala n'hokorokho wookumihiya tjootthekatjaya: yapwessakatja maluku owaataare, khaavotho altaare ankookhala oweemela. ¹⁰ Kontha epooma yoolipihatjiya ehomala, mapuro ankhaliya ari phanka othako. Vaavale, enama phun'halaaya olya; vaava phun'halaawe orupa noolya erittatjaya. ¹¹ Miritjaya tjinaahala okwanhuwatja tjuumavale. Athiyana anaahala owa noorema ekhuni, kontha khaanakhala atthu ootjuwelatja. Pjimaana, Mukukwaaya, khan'hala owoonela ekiriri; Yoole wunpale khan'hala owoonela ekiriri. ¹² Ni anaahala owa Apwiya nihuku nin'halaaya okumiha ekwirintitjaya n'muro Eufrates npaka Egito; ninhuuvaatja, atthu oIsrael, n'nohala othanliya nan'motja n'motja. ¹³ Nen'no nihukun'no, nipenka nuulupale ninaahala oruma; ankookhala arimeelaka elapo yo Assiria ni Egito anaahala owa waakokhorela Apwiya omwaako ttakattiifu oJerusalem.