¹ Etthuvo yowiikurumatjiya naananipha oEfraim, watjowiiphwanelihatjaya, yoweessiya wanru, waatthu ookhwitiriya ninipha! ² Apwiya ananveleeliha ntthu okuru ni oolipa; phanka epula yomaluku, niiphyoo yookwanhula, Ayena anaahala otankula khula etthuvo. ³ Etthuvo yowiikurumatjeliya naananipha oEfraim enaahala onhakeliya. ⁴ Ettuva yoorithiya yowaareerelessa yeessenriya wanru wathatjiri, en'hala okhala phanka mooro wowantjera elimwe: ntthu awehakavale, narina n'matataniwawe, enan'mirya. ⁵ Nen'ne nihukun'ne, Apwiya aatthu ooteene an'hala okhala etthuvo yooreera waamutji aatthwaawe; ⁶ n'nepa wossariya wayoole ookomale wiira alamule niikuru wayaale anaakhaliha awananiaaya ohokoleele n'mikhoraniwaya. ⁷ Massi hata yaayo anaahala omoramora ninipha ni khan'hala olipa ninipha noowaawa. Nnkuttho ni n'rumeyi naahala omoramora ninipha noowaawa ni anaakhwitiriya ninipha. Ayena anaakhala ookhwitiriya ninipha noowaawa, an'nomoramora ni tjowoona ni anvara tjotakhala ni tjootthunatjaya. ⁸ Weekhweelikhweeli, meetja ooteene anoorapheeliya, nihukhalaka nipuro nooreera. ⁹ Tupani n'halaawe onssomiha yootjuwelatja ni tupani n'halaawe on'himeerya nuulumo. Wayaale ahiihiye nipele wala anamwane. ¹⁰ Kontha yooruma watjulu yooruma, yooruma watjulu yooruma; ekettelo watjulu wokettelo; vakaani va, vakaani wu. ¹¹ Weekhweeli, Ayena an'hala waahimeerya atthu nimalaku ookokomela niiluuka yoottayi. ¹² Mahuku avirale, Ayena yaahowiirelatja: N'na phinipuro noomumula, nipuro noomumula wantthu ootjyaale; ni watja phuryaayavaa, massi ayenatja khaatthunatjale. ¹³ Vano, nuulumo naApwiya nin'hala okhala yoorumaaya watjulu yooruma; yooruma watjulu yooruma, ekettelo watjulu wokettelo; vakaaniva vakaani wu; wowiira arwee noomora tootho, nookwanhulatjiya noovarakatjiya. ¹⁴ Mwiiwe, nuulumo naApwiya, nhu n'nokhottavaa, n'naahoolela atthu oJerusalem. ¹⁵ N'nawuulumatjaka: Nihaataana ninookhwe, niikhapure nihopanka nkhikitjero. Yavira mahuviho khan'hala oniphwanha. Kontha wootha ntthawenlweehu ni niniipitha mwatjoonhala. ¹⁶ Phimaana, Apwiya aniira: Kinaahala weessa nluku nuulupale oSiao, nluku noolawihiya, nluku noopheelessiya, ekhalelo yoolipa. Yoole naamini, khan'hala woonihatjiya ehaaya. ¹⁷ Kinaahala okhaliha essariya nkopo wonphimo ni, n'nema, nlipihero. Tjookhuma tjinaahala okwetja ntthawenlo wowootha ni maatji anaahala otjara n'niipithaaya. ¹⁸ Waataanawinhu ninookhwe onaahala omalihiya, ni nkhikitjerweenhu niikhapure khun'hala okhala. Eluuvi yavira, phin'hala woomiryani. ¹⁹ Wanvirelaaya, enaahala woomiryani, khula owitjissu, onaahala ovira ni, othana noohiyu, onaahala owa. Nuulumo nakhala nowiiwiya, enaahala okhuma yowoopiha. ²⁰ Kontha nkori phuwookhuvyaa tjinene woopheela wiitjookola ntthu ni nkhuneelo phiwowookwaa woopheela wiivilikenla. ²¹ Apwiya anaahala ovuwa phanka mwaako Perazim; Ayena anaahala othoonhera orussiyawaya phana mwaamuro Gibeao, wiira avare ntekwaaya, nteko wootanhifyaa, noopheela omalihera ntekwaaya, wootanhifyaa. ²² Vano, n'hitanhifu, wala maluttweenhu anaahala olipihiya. Kinaawiiwaka Apwiya nlamulo nookwanhuliya elapo yooteene. ²³ Nviriyane ni mwiiwe ntjuunaka; nkhale ootthonkomaniaa ni n'viriyane moolumwaaka. ²⁴ Nanteko aavira nihuku nooteene aalaka, woohihiyenra. Yena, naalima woohihiyenra. ²⁵ Natthonkomanihaleene etthaya, khan'hiya paassi, nawaala, eessaka khula etthu nipuronaya. ²⁶ Naafunttiya niMulukwaawe; mootjuwelatja. ²⁷ Ohiyavaa, tjowaaliyan'nho tjineettiheriya weenan'na yookhalela, wala khatjinphitiya watjuluwaya, massi tjinawaattiya ninkopo. ²⁸ Etthakaaya enaassiliya, woohitepessa oyevatja, wanookhalaru mikukutthatjaya wala apuuru anaavavaressa, khatjinpwetessa. ²⁹ Yeela tootho enkhuma waApwiya aatthu ooteene, oophwanelessa an'himya woophwanela mootjuwelatja.