¹ Nen'no nihukun'no, ninaahala wiipiya ntjipon'na elapo yoJuda: Nihaana epooma yoolipa; Muluku hoopola eluwanitjaya. ² Ntthukule, mikhora tjaatthu oophwanela, arina waamini. ³ Wayoole nooreerelani nrima, n'naahala onvaha nrettele, kontha yena nawookhuluvelani. ⁴ Mwaakhuluvele Apwiya woohimala, kontha Apwiya phaapwiya, ntthawelo woohimala. ⁵ Ayena anaahala waamoriha ankhala yiittottopaka; anaahala omoriha epooma yoolipihatjiya; Anaahala otatussa ntthupi. ⁶ En'hala onhakelatjiya naamassikhini naatthu oothweiya. ⁷ Nttala wanassariya onkhala wooreera; Niissariyatjinhu n'naarehenrya nttala wantthu oophwanela. ⁸ Kweeli, moophukaniwinhu ninaawanriihani, Apwiya; Nthinaninhu nootthunawinhu phinpheeleehu. ⁹ Ohiyu wooteene nrimaaka onkhala ninhu; kweeli mweekuminiwaka n'nepaaka on'noorweelani ventji. Kontha olamulawinhu waphiya elapo yovathi, atthu ooteene anaatjuwela essariya. ¹⁰ Hata wanthoonheriyaawe n'nema ntthu oohiphwanela, yena khan'hala otjuwela essariya. Elapo yeepiphi yena, yena npanka tjootakhala, khanvara wootthuna Apwiya. ¹¹ Apwiya, ntataninhu n'hotaphula massi ayenatja khantjuwelela. Phimaana anaahala woona nfento orineenhu naatthu ni anaahala woona ehaaya; kontha mooro otthonkomanihiye waawananiinhu onaahala waapaha. ¹² Apwiya, nhu n'naahala onivaha nrettele. Weekhweeli, tootho nhuuva n'honivarela tjooteene. ¹³ Apwiya, Mukukweehu, amuluku akhwaawe woohikhala nhuuva ahonikhwitiri; massi hiivano ninkokhorela ntjinaninhu paassi. ¹⁴ Ayena ahokhwatja ni khanvuwatjatho. Weekhweeli, n'waale waalamula ni n'haakwanhula; ni n'horimeeliha muupuwelelwaaya. ¹⁵ N'hintjenra elapo, Apwiya, n'hintjenra elapo! Mun'nottittimihiya! N'otaphulela mwiinano tjooteene tjonlaponiwihu. ¹⁶ Apwiya, ayena, oossankeene, yaahoowehani ni yaahovekela mwaha watjoohimyatjinhu. ¹⁷ Phanka erukulu epheelaka oyariya, awereiyaka ni akhuwela woopheela oyara, tjitjon'mo niri ohoolowinhu, Apwiya. ¹⁸ Naahorupala, ni naari muntekoni mooyara, massi naakhanle phanka naayarale ephyoo. Khaniwaanala woopwaa nlaponi, wala khaamorale atthu ontuniyani. ¹⁹ Anankhwaaya anaahala okhala; erutthutjaya tjinaahala ovuwenla. Mwiipe noohakalala, nhu n'nokhala vathi, kontha okameenhu okame wonthuko, ni etthaya enaahala waahokolossa anankhwaaya. ²⁰ Nkarwaani, atthwaaka, nkele n'mapaanimwinhu ni ntthuke mikhoratjinhu; mwiipithaka okathi vakaani, npaka wanviraaya tjoorika. ²¹ Kontha Apwiya anphookhuma nipuronaya wiira yaahukhumu atthu ovathi mwaha watjoovaratjaya; etthaya enaahala okussa ephome emwaresseliyaaya ni khan'halatho ovithiya ale akhwale.