¹ Apwiya nhu mwaMulukwaaka! Kinaahala woottittimihanai! Kinaahala wiipela ntjinaninhu, kontha n'n'aapankakatjitthu tjomiiriirya, tjitthu tjoolakeliya khalayi, wooreerela. ² Kontha nhuuva n'hokhaliha epooma nimaluku, niipooma yoolipihatjiya, n'hokwanhulatja, nimapuro aanan'mwa, n'hokwanhulatja. ³ Phimaana, atthu oolipessa anaahala woovuwihani; epooma tjaatthu oohaamini anaahala owoovani. ⁴ Kontha n'nankhavihera massikhini, n'nanpheelela nikhuku ntthu oothweeiya, ntthawenlo wophyoo tjuulupale ni ntthuutji mwaha wooviha. Kontha ephumu tjantthu oohaamini tjinkhala phanka kutakutho wassirini, ⁵ phanka nttukuttha nipuro nowuuma. Nhu n'hokhwitiri tjoonhakhula; tjitjon'mo phanka nttukuttha ninkhalaaya nimahutte, tjitjon'mo etjipo tjantthu oohaamini tjinaahala omala. ⁶ Yooyo mwaakooyo, Apwiya anaahala opanka essukuhuulu waatthu ooteene ni tjitthu tjulupaleru, womapha oothanleliya, wonama tjooreerela, esskuhuulu yooreeressa. ⁷ Wayooyo mwaakooyo, Ayena anaahala okwanhula yoowara enaakhuneela atthu ooteene niilapo tjooteene. ⁸ Ayena anaahala on'mirya nookhwe; Apwiya anaahala waavunla meethori atthu ooteene, Ayena anaahla waakumiha mahuviho ooteene, kontha Apwiya phiiralyaaya. ⁹ Nen'ni nihukun'no, onaahala wiiriya: Ola phiMulukweehu! Phaamwanriiheehu ni Yena naahala onoopola. Ala phaaPwiya! Phaawanriiheehu, ninaahala waatthapela noonoopolawaya. ¹⁰ Kontha ntata naApwiya nin'hala okhala wamwaako vaava, ni Moabe naahala ottin'ya wanipuroniwawe, tjitjon'mo phanka nkhutta tjin'nhakeliyaaya wamuro wootjara yowunttela. ¹¹ Ayenatja anaahala otaphula matataaya phanka ntthu nranpa tjintaphulaawe; massi Apwiya anaahla waamoriha wiikurumatjawaya, mwaha womiteko tjon'matataniwaya. ¹² Eluwanitjaya tjoolipessa, Ayena anaahala omorihela vathi, okhala ntthupi.