¹ Nuulumo mwaha womwaamuro watjowoona: Nlattuni ooteene arwaaka watjulu enupa. ² N'nopheela wiiwa onhakula wopooma, epooma yootjara atthu atthapaka. Atthweenhu khayiiviye niikatana, wala khaakhwale okhottoni. ³ Ahoolelyeenhu ooteene ahotthawa nkhayi, massi ahovarakatjiya woohinreko; ooteene ahovarakatjiya nkhayi, yaanootthawelaru ottayi. ⁴ Phimaana, kaahiira: N'hikiwehe miivano, kinaahala wunla tjinene; n'himananihe okimaaliha mwaha waatthwaaka. ⁵ Kontha nihaavo nihuku nomikatjamiho, nomanhakunhaku, akhumaka waApwiya, mwaamuro watjowoonyaa; nihuku nookwanhulatjiya tjaalipale ni atthu akhuwelaka omwaako. ⁶ Elao naakussa mattheere, niikaaro naatthu naanakavalo, ni Quir nawoonenla mwinkittho. ⁷ Mapurweenhu owoolweela anaahala otjarana ekaaro, ni anakavalo an'hala weemela wankhora. ⁸ Yena hokumiha nlipihero wooJuda, ni nen'ne nihukun'ne, mwaahaaweha akaputthi onupa yontakhwani. ⁹ Ohoona tjitthu epooma yaDavi, wiira tjaari tjintji, ni mwaahotthonkomaniha maatji mentji. ¹⁰ Nhu n'haalikela enupa tjoJerusalem ni n'hopanka wiira nlipihere nviralyaaya. ¹¹ N'holokihatja mapuro meeli oossunka maatji, massi aateka khan'moonale opoomeele, aalakelale khalayi. ¹² Apwiya yaahowiihanani nihukun'ne wiira munle, ntjukule, nkasse ekhararitjinhu ni wiira n'ware ekuwo tjossaakho. ¹³ Massi, ohiyavaa, ohaavo otthapa nootteeliya, wiiviya womihuwo niinama; okhuura enama noovurya nipha; nilye noovurya, kontha meelo ninaahala okhwa. ¹⁴ Phihimeeriyaaka naApwiya n'maaruniwaka. Weekhweeli yootakhaleela khin'hala olevenliya, hata nkhwaaka, Apwiya phanuulumatja. ¹⁵ Apwiya aniiratjo: Orwee wansssatoroola, oSebna, yooyo nkhala ntthoko namwene, ni wiire: ¹⁶ Onvara essiyanivaa, ni tupani ootthunihale wiira okhalihe ekhapuro nipuro noorekama, othipaka wamwala nipuro noopheela omumula omwaneene. ¹⁷ Nkan'wehe, nlopwana oolipa: Apwiya ari thayaari, woopheela woorihela vathi; Ayena anaahala woovaressessa. ¹⁸ Weekheeli, Ayena anaahala woorukureerihatja ni anaahala wooriha phanka nikaatthi elapo yooteene. Onaahala okhwa, tjin'hala okhala won'wo ekaarotjaa tjowaarya; on'hala okhala ehaaya ntthoko naapwiyaa! ¹⁹ Kinaahala owaakha ntekwaa. Onaahala omorihiya. ²⁰ Kinaahala omwiihana nantekwaaka Eliaquim, mwaana Hilquias. ²¹ Kinaahala on'wariha ekuwotjaa ni kinaahala omweessa nipuronaa; ni kinaahala owaakha ntekwaa kinvahaka yenani. Yena n'hala okhala thumwaane oJerusalem nintthoko naJuda. ²² Etthukulo yantthoko naDavi kin'hala omweessenra wanikhataniwawe; yena naahala otthukula ni khaavo n'hala otthuka; yena naahala otthuka ni khaavo n'hala otthukula. ²³ Kin'hala omweessa nipuro nonteko nookhuluvelyaa, ni yeba n'hala okhala ehitja yowaarya nontthoko naathumwaane. ²⁴ Naahala weesenriya waarya wooteene wontthoko naathumwaane, wotjitthu tjooteene tjovapuwani, okhuma mikhuki npaka etjaaro. ²⁵ Nihuku nen'ne n'na nuulumo naApwiya epereku yookhomeliya nipuro noolipa enaahala omora, nrintti waarinaawe onaahala ohokolyaa. Kontha Apwiya ahuuluma.