¹ Nuulumo mwaha woothako onkhala vamotja niipahari. Phanka ephyoo enkwetjaka Neguebe, yena nkhumenla woothakoni, elapo yowoopiha. ² Kihovahiya yowoona yowoopiha: Namatumiha niira atumihaka ni namakwanhula niira akwanhulaka. Nawiiva, Elao; Media, naamaka; Kinaahala omaliha tjooteene. ³ Phimaana, erutthwaaka tjinootjara tjoweryaa; tjoowerya phanka nthiyana owakathi wooyara; kihomora mwaha weetthu yiiwalyaaka niile yonalyaaka. ⁴ Nrimaaka onaatthapa; nothukumela; ohiyu waapheelessaaka onaakoopopiha. ⁵ Ayenatja an'notthonkomaniha meetja, an'naatala matthatto, anaalya noovurya; nvuwatje, akhulupale, ni nttikitthele makhura mwinkitthotjinhu. ⁶ Apwiya phikihimeeryalyaaya: Orwee, wamweesse namakhalenla, nkoohimyatja enkoowa. ⁷ Namawehaweha awavale, naanakavalwaawe, naatthu niinamatjaya yena naahala okhala ootthonkomanyaa ni owiikhikitjera. ⁸ Vano, namakhalenla aahokhuwela: Apwiya, nphantte woowehaweha, kinaakhala nihuku nooteene, mahuku ooteene, ni kinaakhala nipuronaka ohiyu wooteene. ⁹ Naawa nlopwana naanakavalwaawe. Yena naakhuwela: Babilonia homora! attonttwaaya ooteene naanlukwaaya ahomorela vathi! ¹⁰ Assaanaaka, ooveeriya! Ewiiwalyaaka Apwiya, Nluku oIsrael, kihoottonkelani. ¹¹ Nuulumo nooDuma. Haavo ntthu nkiihana oSeir: Namakhalenla en'haleela essiyani yoohiyu. ¹² Namakhalenla en'haleela essiyani yoohiyu. Namakhalenla aahiira: Meelo onaassa ni onawiila. Wapheela okoha, vano, ohoklyee okohetho. ¹³ Nuulumo nooArabia. Moothakoni waArabia nvire ohiyu, nhu n'neettatja vamotja. ¹⁴ Mwaawiihereke maatji atthu nhu n'nokhala elapo yoTema, mwaaphwanhe ootthawa niiphaawu. ¹⁵ Kontha ayenatja ahotthawatja ekatana, mwaha wokhotto. ¹⁶ Apwiya phikihimeeryalyaaya: Womwaakha n'motja, phanka mwaakha wonanteko npokhera, waarya wooteene waQuedar naahala okwanhulatja. ¹⁷ An'hala ohala atthu vakaani, oolipessa aQuedar, kontha Apwiya, Nluku oIsrael, phuulumalyaaya.