¹ Nlamulo nooTiro: Munle atthu oTarsis, kontha khan'nanipuro; elapo yoChipre, yaahooniheriya. ² N'maalatje, nhu n'nokhala nkurukuru epahari; anamatumiha oSidom, aneetta n'maatjini, yaahootjarihani. ³ N'maatjin mentji tjaahaavo tjooruweriya oSior, tjoohephiya tjooNilo phitjaari etjoolyatjaya; ni yeeyo phaari nakosso onlaponi. ⁴ Woone ehaaya, Sidom, kontha epahari ehuuluma, yooweryessa wopahari tjooteene. Yena niira: Akivarale nteko woyara, wala akiyarale, wala akinaassaana, wala akaalelale assaana. ⁵ Moolumo yaphiya elapo yowigitu, onaahala wunlatjiya oTiro. ⁶ Nlapuwatje npakha Tarsis; munle, nhu n'nokhala nkurukuru epahari. ⁷ Phiilapo yaakhaleenhu ntteeliyaka, nimakhalelweenhu okhalayi, niinhaatjinhu tjihoorweehani ottayi, wiira mweette ota. ⁸ Tupani vahatjenre oTiro, namavaha etthuvo, anamatumiha akhulupale, ni anamathuma phoottittimihiya ovathi. ⁹ Apwiya aatthu ooteene phaalakenle wiira yaavulusse wiikurumatjawaya ni waaryawaya wooteene, wiira yoonihatje ehaaya ooteene olapo yovathi. ¹⁰ Tiro kharinatho owerya. ¹¹ Apwiya yaahotaphulela n'tatanaya opahari, Ayena yaahomalihatja omwene; hata Canaa, Ayena yaahuulumatja wiira akwanhulatjiye mapuro yaakhalaaya. ¹² Ayena yahiira: Khun'halatho otthapa, mwaana Sidom; ovuwe, orwee Chipre; massi hata woowu khun'hala omumula. ¹³ Nkawehani elapo yaaCaldeu. Atthwaala ahohiya okhala; assirio yaapankale othako wonama tjontakhwani. Ayenatja yaahotekatja tjowaatjivela, yaahokwanhulatja enupatjaya, yaahokwanhulatja tjitthu. ¹⁴ Munlatje, atthu oTarsis, kontha ntthawenlweenhu ohokwanhuliya. ¹⁵ Nihuku nen'ne, Tiro naahala oliyaliya woyaakha sapiini, phanka mahuku eekumi amwene. Tjamala eyaakha sapiinin'nho, oTiro onaahala okhume'nla phanka ntjipo nanthiyana oweetta oluva. ¹⁶ Okusse yooruma orwee opooma, nluvi ooliyaliya; woope ratta, wiipe etjipo tjintji wowiira, on'nokhala, wuupuweliyaka. ¹⁷ Wanaahala wiiranyaa, tjinavirale eyaakha sapiinin'nho, Apwiya anaahala onkhavihera Tiro ni naahala ohokolyaaa, noophwanha nssurukhu nintekwaawe wooluva ni naahala ovaha ntekwaawe weehooleli tjooteene tjovathi. ¹⁸ Etjaairatjaya ni tjoophwanhatjaya tjin'hala ovahenriya waaApwiya. Khatjin'hala weessiya wala ossunkiya n'nikhupini, kontha an'hala ovahiya yaale ankhala ohoolo waaPwiya, ni tjin'hala ovareliya ventji ni wowiira akhalane ekuwo tjooreeressa.