¹ Tjitthu tjoonalyaawe Isaias, mwaana aAmoz, oJuda ni oJerusalem. ² Woomalani mahuku, mwaako ontthoko naApwiya on'hala okhala mwaako wootepessa orekama tjomwaako tjooteene, on'hala ottittimihiya naatthu, ni atthu ooteeene an'hala otthawenla yooyo. ³ Atthu entji anaahala woona ni wiira: N'mwe! Niwele omwaako waApwiya, ntthoko naNluku aJaco. Ayena anaahala onifunttiha mittalatjaya ni ninaahala weetta mun'nemaniwaya. Kontha Siao phun'hala okhuma ekettelo, nuulumo naApwiya nin'hala okhuma oJerusalem. ⁴ Ayena anaahala olamula elapo tjooteene ni okhala nphuki aatthu; ayenatja anaahala okhaliha ekatanatjaya amatjatto; khiivo elapo en'hala okussa ekatana weelapo ekhwaawe, ni khan'hala otthonkomanelatho ekhotto. ⁵ Nkawaani, ntthoko na Jaco, neette munthukoni mwa Apwiya. ⁶ Kontha nhu n'haahiya atthweenhu, ntthoko na Jaco, kontha ayenatja anootjaranatja elamalelo naanamaxintta, phanka mafilisteu, ni anssikissana naassaana aatthu oottayi. ⁷ Elapwaaya enootjara ewooru niiparatha, ni khuuvo mwiinano nimihakhutjaya; ni anootjaranatja ekavalo, ni khuuvo mwiinano niikaarotjaya. ⁸ Elapwaaya anootjara anluku eethiru; ayena ankokhorela tjoovara tjon'matataniwaya, tjitthu tjivaralyaaya nimatataaya. ⁹ Yaayo atthwaayo anaahala woona ehaaya ni anaahala omora; phimaana,, n'haavusse. ¹⁰ Okhume orwee npakha mapuro ari mwala ni wiipithe mwaha wopaluwa yaApwiya en'mwa, waaryawaya ni ophwanela. ¹¹ Oweha wuulupale wantthu anaahala oyevihiya, olipa waatthu onaahala omorihiya, ni Apwiya paassi phan'hala ovuwihiya nen'ne nihukun'ne. ¹² Kontha ninaahala okhala nihuku Apwiya aatthu ooteene anaahala okhala naale aniikukhuliha ni owaatjivela okokhoreliya niyoole niitjoona olipa yoola naahala oyevihiya; ¹³ Tjinaahala omorihatjiya miri tjooteene, tjuulupale ni tjoorekama, ni tjootjuwanyeessa. ¹⁴ Nen'no nihukun'no, Apwiya aatthu ooteene an'hala okhala ni myaako tjooteene tjoorekama, ¹⁵ nimiri tjooteene tjuulupale, nitjitthu tjooteene tjoorekama, niluwani tjooteene tjoolipihatjiya, ¹⁶ naanaviyu ooteene oTarsis ni mapuro ooteene ooreera. ¹⁷ Wiikukhuliha wantthu naahala oyevihiya ni olipawawe onaahala omora. Apwiya paassi phan'hala okokhoreliya nihukun'ne. ¹⁸ Anluku eethiru anaahala ovira woomalela. ¹⁹ Atthu anaahala otthawela n'makhukuni, n'mamwala ni n'mamiitheni movathi, mwaha wopaluwa yaApwiya en'mwa wokuru ni waaryawaya, yakhumenlavale wiira atankanhe elapo. ²⁰ Nihuku nen'no, atthu anaahala waariha anluku eethiru owooru niiparatha yaapankalyaaya wiira akokhoreliye. Ayena anaahala waarihela anakhuku. ²¹ Atthu anaahala otthawela n'makhukuni n'mamwala ni mapuro makhwaawe owiipithyaa, mwaha wopaluwa yaApwiya en'mwa, yawavale woopheela otankanha elapo. ²² Nttharuwe onkhuluvela ntthu, kontha omumula weekumyaaya ori nphulani, vano arina efaitani.