¹ Oweha wa Isaias, mwaana aAmos, aahissimwiya oJuda ni Jerusalem, mahuku aUzias, Joao, Acaz ni Ezequias, mwene oJuda. ² Erimu niitthaya ekiviriyane, kontha Apwiya ahohimya: Kihaakhalana ni kihoonuwiha assaana, massi ayena ahokitanhifu. ³ Emope enawaatjuwela aneene, niinama, massi Israel khiivo entjuwelaawe, Israel khantjuwela. ⁴ Yootakhaliya elapo yookossa! Atthu owintjivana tjoovara, nloko naatakhali, assaana anvara tjoololo! Ayenatja ahaahiya Apwiya, anontanhifu ttakattiifu Israel ni ahon'huluwatja. ⁵ Mun'hala ottarusseliya essiyani. Essiyani ohitthunaka yoohimeeriya. Nru wooteene onaaweren'nha, nrima wooteene onootteetthyaa. ⁶ Nvahe nlipihero n'nhaani npakha wiimuru, khuuvo nphantte wooreera, ohikhanle nikhwatta, mapuro ootthukuwatja, ahiri ooreera wala ootthukiya, wala oohitthukiya wala tjootafitiya nimakhura. ⁷ Elapweenhu ehotankanhyaa, epoomatjinhu tjihopahiya, emattatjinhu ohoolowinhu, tjikwanhuliye naatthu oottayi. ⁸ Mwaana aSiao hohin'nha phanka enupa yan'mattani, phanka missiri tjoohin'nha, phanka epooma yoolukamiya. ⁹ Apwiya ahinihiyenre assimutjeehu, naahala okhala phanka Sodoma, noolikan'na Gomora. ¹⁰ N'hiiwa nuulumo naApwwiya, nhu ahooleli ooSodoma; mwiiwelele ekettelo tjanlukweenhu, nhu atthu ooGomora: ¹¹ Tjoovahatjinhu tjookuttho khatjinakhala etthu, Apwiya phaniira. Tjihokitossa tjoovahatjinhu ni makhura onama; khinkitjivela ephome yomope, niinama tjikhwaawe. ¹² Wakiwewehaleenhu, tupani oovekelaleni wiira nvire vapuwaniwaka. ¹³ N'haakulele oiwiihera tjoovaha tjoohiloka; elunpani khinkitjivela, munkumanatjeenhu ni munthukumanoni mosaapatu. Akinvilela mithukumanotjinhu, tjoovaratjinhu tjooteene tjoohiloka. ¹⁴ Okikassiri tjootthapenlatjinhu niissukuhulutjinhu. Khatjinkitjivela; kihootjyaa oviriyana! ¹⁵ Tjitjon'mo, mwavussa matateenhu nimavekelo, kinaahala owiipithani; hata wanvekeleenhu ventji, akin'hala wiiwa, kontha matateenhu anootjara ephome. ¹⁶ Mwiirapihatje ni mwiirehenryatje! Nkumihatje tjoovaratjinhu tjooteene ohoolowaka! Nttharuwe tjoovaratjinhu; ¹⁷ nfuntte ovara yooreera; nrweele essariya; nttharuwe tjotakhala; nvare niissariya ekhwaatjuni; mwaakihe anankhweli. ¹⁸ N'mwe phiyaaru, nikhale nkhayi Apwiya phaniira hata tjootthekatjinhu wankhalaaya phanka nankuttho, ayena an'hala okhala ootteela phanka nihutte; hata wankhalaaya oosseerya phanka carmesim, ayena an'hala okhala ootteela phanka nihutte. ¹⁹ Mwakhala owiiwelela, n'naahala olya yooreeressa yonlaponi, ²⁰ massi mweehitthune ni mweehiiwelele, ekatana enaahala woovirani, kontha Apwiya ni malakwaaya ahuuluma. ²¹ Phanka epooma yokhweeli ekhanlyaaya yooluvaluva! Yeeyo yaari niissariya, yaatjanre nin'nema vano anootjara atakhali. ²² Eparathaaya ehokhala yoohinteko, niphanaya nihotakaneela maatji. ²³ Ahoolelyaaya khaaniiwenla ni apatthani aattapaya; ooteene anfenta ohukha ni antthawenla tjoovahiya. Khanaakiha ekhwaatjuni, wala anakhweli anaarweela. ²⁴ Phimaana, n'no okhuwela waApwiya, Apwiya aatthu ooteene, oowerya tjooteene owiisrael: Wayaayo! Kinaahala wakhumenla awananyaaka. Kweeli, kinaahala waakhumenla awananyaaka! ²⁵ Kinaahala wootaphulelani ntatanaka, kinaahala oreeriha n'neetteenhu ni kinaahaka okumiha tjoovaratjinhu. ²⁶ Kinaahala waavoniha aphuki phanka khalayi, ni anamalakalaka phanka woopatjeroni; waviravo, n'nohala wiihaniya epooma yon'nema, epooma yokhweeli. ²⁷ Siao n'hala ovariya niissariya; nin'nema, owiituthuwa. ²⁸ Oohiiwelela naanatanpi anaahala ossiliya nkhayi, naale yaatthawale Apwiya ari nttala yooyo. ²⁹ N'naahala woonihatjiya ehaaya wotjitthu tjin'vareenhu ni n'nahala woonihatjiya ehaaya niile ethanlaleenhu. ³⁰ Kontha n'nohala okhala phanka nri woohimataakhuru, ni phanka etjartim yoohimaatji. ³¹ Ntthu oolipa n'hala okhala phanka oovara mooro, nintekwaawe, an'hala opahatjiya nkhayi, ni khaavo n'hala ottipiha moorooyo.