¹ Apwiya aatthu ooteene ari thayaari woohikhaviheraho oJerusalem ni Juda: nkhavihero wonkatthe ninkhavihero womaatji; ² ni ntthu okuru, nakhotto, nphuki, namalalyaa, nahako, humu; ³ n'hooleli, ntthu oohissimwiya, namalakalaka, nkhulupale ni attharenli. ⁴ Kinaahala wiirela amwaavano woohoolelani, ananttonpe anaahala waahoolela. ⁵ Atthu anaahala ohuvihana yaayoru, khula ntthu nimwaattaman'nwaawe; anamwane ahaala waaruwana atthu olupale atthu oohihissima anaahala waaveeha atthu ohissima. ⁶ Ntthu naahala onvara mwaamun'nawe ntthoko naathumwanawe ni naahala wiira: We ohaana nikatjako, okhale n'hoolelyeehu. Tjookhumenlan'nha tjikhale n'matataniwaa. ⁷ Nihukun'ne, yena naahala okhuwela iiraka: Akinakhala namaloola, akinayoolya wala yoowara. N'hikivahe waahoolela atthwaala. ⁸ Kontha Jerusalem hotankanhyaa, ni Juda homora, kontha moolumelwaaya ni mitekotjaya tjinkhala tjowaawanana Apwiya, owanana waarya won'meethoniwaya. ⁹ Oweha woowiithowaya onawaahimya; ni ayena anuulumela etanpitjaya phanka atthu ooSodoma, ayena khanvitha. Ahotakhalatjiya! Ahiiwiiheratja yootakhala. ¹⁰ Mwaahimeerya anassariya wiira phiyooreera waayenatja, kontha an'hala olya n'hokorokho womitekotjaya. ¹¹ Hotakhaliya ntakhali! Tjooteene tjinantakhala, kontha yena n'hala waakhela yoovikana tjinvaraaya n'matataniwaya. ¹² Atthwaaka, anamwane phaatthu naathiyana anawaahoolela. Ooh, atthwaaka, ahoolellyeenhu anawoothepyani ni anawoohapussani nttala. ¹³ Apwiya anaakhuma wiira alamule; anaakhumenla wiira alamule elapo. ¹⁴ Apwiya anaahala waalamula mahumu ni ahooleli aatthu. Nhu n'nawaakhuura atthwaaka. Tjikussiye tjaamassikhini tjiri n'mawan'nhinhu. ¹⁵ Essiyani waahononaka atthwaaka ni waahukhumu amassikhini. N'na nuulumo naApwiya, Apwiya aatthu ooteene. ¹⁶ Apwiya an'himya wiira assaana assithiyana ooSiao anawiittottopa, aneetta anooromihale muru, maweherwaaya nimeethwaaya, weettawaya khaanaakuvihatja, anhakulihaka tjiwaralyaaya n1nhaani. ¹⁷ Kontha ayena phiikhalelwaaya, Apwiya anaahala okhaliha makhwatta n'muruniwaya assaana ooSiao, Apwiya anaahala okwassa n'muruwaya. ¹⁸ Nihuku nen'no, Apwiya anaahala okumiha tjoowaratjaya n'nhaani, mikhova nimissanka, ¹⁹ tjoowaratjaya tjon'manharuni, epulusseera ni ²⁰ maleesso on'muru, tjowiiphwanelihatja tjon'nhaani, essuntu, tjitthu tjoonukhela ni tjookhalana tjoparakha. ²¹ Ayena anaahala waakumiha anela ni tjowaarya tjovaphulani, ²² tjoowara tjonssukuhuuluni ekuwo, malaya nimirupa, ²³ esssupelhu tjon'matatani, ekuwotjaya tjooreera ekoffiyo tjon'murumwaya. ²⁴ Woohikhala tjitthu tjoonukhela onaahala onukha; woohikhala essuntu, onkookhala nkhoyi, woohikhala ekharari tjoovatjiya ratta, onkookhala nputu, woohikhala ekuwo yoowara, ankoowara eessaakho, khankooreera ankookhalana mirala. ²⁵ Atthwaaya ankookhwatja ni anakhottwaaya annkookhwa okhottoni. ²⁶ Mikhora tjooJerusalem tjinaahala otjukula ni wunla. Ankootthawiya, Siao nkowookoma vathi.