¹ Vano, Ayena yaahokikhumenla, yiiraka: Waahiye anamakhalenla awele, khula n'motja niyuumaawe yookwanhula n'matataniwaya. ² Yaanowa alopwana sita nkhora muulupale onkhuma ephyoo, khula n'motja awaanaka eyuumaawe yookwanhula. Aahaavo nlopwana n'motja eriyaryaaya owaara ekuwo yoovevyaala ni yoopheela wantikhela n'yuununi. Yaahokelatja ni yeemelale nphantte waaaltaare woporontje. ³ Vano, waarya waMuluku waahovuwa, nipuro naaryaaya, ni yaahorwaa omakhumenloni wonupa. Ayena yaahomwiihana nlopwana aawarale ekuwo yoovevyaala, aarina yoopheela wantikhela n'yuununi. ⁴ Ni Apwiya yaahiira: Ovire eriyari epooma yooJerusalem ni waahiyane nthoonhero wayuutji waatthu anoova mwaha watjoovaratjaya tjinpankaaya. ⁵ Wiiraaka kiiwaka, Ayena yaahaahimeerya akhwaawe: Ovire eriyari epooma, ni wiive. Ohaahiye atthwaa awoonelaka othunku wala ekiriri, ⁶ atthu oolupale, amwaavano, mimwaaruussi, assaana wala athiyana. Owiive ooteene! Massi ohimwaattamenle ntthu rina nthoonhero wayuutji. Okhumane npaanimwaka! Vano, ayenatja yaakhumanale mamwene yaari ohoolo wonupa yaMuluku. ⁷ Ayena yaahowiirelatja: Okwanhulatje enupeeyo, waatjarihe wapuwaniva athu ookhwa. Nrwee! Vano, ayenatja yaahorwaa ni yaahokwanhula epooma. ⁸ Wakwanhulalyaaya, kiiphwanhale veekha, kaahooromela vathi kiiraka: Pwiya, n'naahala waakwanhula amutji aIsrael mwaha woorussiyawinhu oJerusalem. ⁹ Ayena yaahokiirela: Tjootakhala tjotthoko naIsrael ni Juda tjuulupale. Etthaya enootjara ephome niipooma, anootjara atthu oovara tjootakhala; yiiraka: Apwiya aholiyala etthaya, Apwiya khaanoona! ¹⁰ Phimaana, Meethwaaka khankoowoonela ekiriri wala othunku. Ohiyavaa, kin'hala waawaanela tjooteene n'murumwaya. ¹¹ Ni nlopwana aawarale ekuwo yoovevyaala, aarina yoopheela wantikha n'yuununimwawe, aahohokolyaa. Yena aahohokolyaa ni yootjipwiya iiraka: Kihovara tjooteene tjaakirumaleenhu.