¹ Waahiiranyaatho, mwaakha wonassiita, nihuku noneethanu womweeri yooyo, kinookomale owaani ni mahumu oJuda anookomale ohoolowaka, naanaanoru, ntata naApwiya Muluku naahokimorela. ² Kaahoweha, ni yaahaavo etthu yoolikana ekhovyaaya nintthu. N'yuununi woorwaa vathi, waari mooro ni, n'yuununi woorwaa ntjulu, yaari etthu yowaarya, phanka phanka etthu yowaarya. ³ Vano, ayena yaahokitaphulela yoolikana nintata ni yaahokivara ekharari tjon'muruwaka; N'nepa waahokeessa eriyariru erimu nivathi, ni tjowoona tjaMuluku, ayena yaahokikussa oJerusalem, omakhumenloni wonkhora won'hina onkela ephyoo, nipuro naari elatarato yonveeha Muluku. ⁴ Waarya wa Muluku owiIsrael waari vaava, weenan'na tjaawehalyaaka omuro. ⁵ Vano, Ayena yaahokiirela: Mwaana antthu, owehe onkela ephyoo. Vano, kaahoweha nkhora onrwaa waaltaare; omakhumenloni waari elatarato yohatje. ⁶ Vano Ayena yaahokiirela: Mwaana antthu, on'noona etthu envaratjaaya. N'nha tjitthu tjinvaratjaaya tjuulupaleru ntthoko naIsrael tjinpankaaya wiira ahuluwe npaanimwaka. Massi weeyova onaahala woona tjitthu tjintjiru. ⁷ Vano, Ayena yaahokiwiiha wankhora wonipuwa ni kaahoona; yaahaavo ephaa wassirini. ⁸ Ayena yaahokiirela: Mwaana antthu, othipe essiriiyo. Vano, kaahothipa essiri ni waahaavo nkhora. ⁹ Vano, Ayena yaahokiirela: Orwee ni wawehe tjitthu tjoohiloka tjinpankaaya va. ¹⁰ Vano, kaahokela ni kaahoona, ni taahaavo eparakha tjooteene tjonama tjeetta, ni wakhula enan'na yonama, ni elatarato tjooteene tjontthoko naIsrael tjaakhomeliye wassirini mooteene. ¹¹ Mahumu sapiini ontthoko naIsrael yaari mon'mo ni Jazanias, mwaana Safa, eemelale eriyaryaayatja. Ayenatja yeemelatjale ohoolo walatarato ni khula ntthu aarina elunpani n'matataniwawe wowiira ephyootjaya tjiweleke nimahutte. ¹² Ayena yaahokiirela: Mwaana antthu, on'noweha mahumu ontthoko naIsrael tjinvaraaya mooripela. Khula ntthu niitjipithiha wanlukwaawe, kontha aniira: Apwiya khan'noona! Apwiya ahohiya elapo. ¹³ Vano, Ayena yaahokiirela: Orukunuwetho ni owehe tjitthu tjuulupaleru tjinpankaaya. ¹⁴ Woottharenlana, yaahokikussa onkhumenla nkhora waApwiya, waari nphantte onkhuma ephyoo, athiyana yookomatjale won'wo, mwaha wookhwa Tamuz. ¹⁵ Vano, yaaahokiirela on'noona, mwaana antthu. Orukunuweketho wooneke tjitthu nanlelo tjuulupaleru tjoovikana n'nha. ¹⁶ Yaahokirweeha npaani mwaApwiya ni, omakhumenloni monupa yaApwiya, wankhora naaltaare, yaahaavo alopwana siriini nathanu oorerya ettulu enupa yaApwiya; niikhovetjaya onkhuma ntjuwa, ayenatja yaakokhorela ntjuwa. ¹⁷ Ayena yaahokiirela: On'noona eyo, mwaana antthu. Etthu yankaani ntthoko naJuda opanka tjitthu tjootakhala tjinpankaaya. Kontha ahotjariha tjootakhala nlaponi ni antholathola orussiyawaka, ahelaka nritta nphulanimwya. ¹⁸ Tjitjon'mo niMi kin'hala olakela tjitjon'mo; meethwaaka khan'hala okhalana ekiriri wala othunku. Hata akhuwele ventji n'maarunimwaka, akin'hala owiiwa.