¹ Nuulumo naApwiya naahokiweela, niiraka: ² We, mwaana antthu, elapo yoIsrael Apwiya aniira tjo: Woomaleloni, woomaleloni ohophiya malootho oomatjesse onlaponi. ³ Omala ohoophwanha, kinaahala woomwaressea orussiyawaka, ni kin'hala woolamula wonayeeli mittalatja; ni kinaahala woowiihera tjoovaratja tjooteene. ⁴ Meethwaaka khan'hala owoonela ekiriri, ni akin'hala owoonela ohunku. Woovirikanaaya, kinaahala woowiihera mittalatjaa, ni tjoovaratja tjin'hala okhala eriyaryaa. Vano, onaahala otjuwela wiiraMi kaApwiya. ⁵ Apwiya Muluku aniira tjo: Okwanhuwatja! Okwanhuwatja omotja ohinankhwaaya! Nkaweha, oniiira owaaka. On'nowa. ⁶ Omala weekhweeli oniira owaaka. Omala ohoophwanha. Oniira owaaka! ⁷ Otthukeliya onawooweela onkhala elapo yovathi. Owakathi ohophiya! Nihuku nookwanhuwatja iri wakhiviru ni myaako khatjin'halatho otthapa. ⁸ Wowaakuvyaatja kinaahala wookurussela orussiyawaka; koolamulavale nimittalatja ni mwaha watjoovaratjaa. ⁹ Kontha niithonaka khanin'hala owoonela ekiriri noothunku. Kin'hala oweettihera wonayeeli mittalatjaa; tjivaralyaa eriyaryaa. Ni onaahala otjuwela wiira Mi kaApwiya, yoole nkhala oohukhumwakani. ¹⁰ Nihuku nookwanhuwatjawaa nihophiya, tjoovaratjinhu tjihoyarana. ¹¹ Yootakhala ehuunuwa wiira avire aaraka tjitthu tjoohikhala; khaavo n'motjaaya wala waatthu; wala n'hakhu, khiivo en'halaaya okhalana. ¹² Okathi oniira owaaka; nihuku nihaattamenla. Ohin'hiye namathuma atthapaka wala namatumiha atjukulaka, kontha orussiyawaka ori naatthu ooteene! ¹³ Phimaana namatumiha khankookhalatho yeele etumihiyalyaawe, hata akhale, kontha olalyeeliya phuwaatthu ooteene. Ayena khan'hatho waakulela, kontha khaavo ntthu, akhalaka ntanpinimwawe, nkookhala oolipiheriya! ¹⁴ Yaahoopa nipenka ni yaahotthonkomaniha tjooteene, massi khaavo neetta arwaaka okhottoni; kontha orussiyawaka ori naatthu ooteene. ¹⁵ Ekatana eryuuta, massi assinttuuttu, niitala tjiri npaani. Ari omattani an'hala okhwa niikatana, massi etala naassinttuuttu tjin'hala owiiva atthu ari opooma. ¹⁶ Massi ankoohala ankootthawela omwaako. Anaahala woova mwaha watjoovaratjaya. ¹⁷ Matata ooteene ankookhala oohitjuwanyaa ni makuthaaya ankokhala phanka maatji; ¹⁸ ni ankoowara esaakho, woova onaahala waakhuneela, ehaaya tjinkookhala owiithowaya, ni n'murunimwaya. ¹⁹ Anaahala oriha eparathaaya niiwooru tjinkookhala phanka ekokhola. Ewooru niiparatha khatjin'hala owoopola nihuku noorussiya Apwiya. Ekumitjaya khatjin'hala woopwaa niitala khin'hala waamalela, kontha tjoovaratjaya nihokhala nluku noowaakakathula. ²⁰ Wiitjoonawaya, yaahokussa tjitthutjaya, ni tjen'nho, yaahaapanka amulukwaaya eethiru nitjitthu tjoonanara. Phimaana, kinkhaliha tjitthu tjoohikhala waayena. ²¹ Ohoolowaya, kinaahala waavahenra n'matatani mwaatthu oottayi, khanpa anantthukiya, ni, atthu oovavarya onlaponi, phanka anantthukiya, ni ayena anaahala okussa. ²² Vano, kinaahala waatthawihera ekhovyaaka yakussaka nipuronaka; attapaya anaahala okela ni anaahala win'nha. ²³ Nteke ekalapoosso; kontha nlaponi ahotjara atthu owiiva niipooma tjihotjara tjoonanara. ²⁴ Phimaana, kinaahala waawiiha ootakhalessa nrima owaavikana ooteene, yaayo anaahala okussa etthokotjaya ni kinaahala omaliha wiitjoonawaya mwaatthwaaya oolupale, nimapurwaaya ttakattiifu anaahala okussiya! ²⁵ Onaahala okhala ossanka! Anaahala orweela nrettele, massi khunkookhala nrettele hata n'motja. ²⁶ Yootakhala enaahala okhumenla watjulu ekhwaaya, moolumo owoopiha nimakhwaaya. Anaahala othola yowoona yaanamalalyaa, massi ekettelo yanankuttho enaahala orimeela ni moolumo omahumu anaahala orimeela. ²⁷ Mwene naahala wunla ni nkhulupale nkoowara otthawiya, matata aatthu onlaponi athukumelaka woova. Tjitjon'mo, kinaahala waahukhumu mwaha watjoovaratjaya. Ni tjoophukatjaya, Kinaahala waalamula, npaka wantjuwelaaya wiira Mi kaApwiya.