¹ Nuulumo naApwiya naahokiweela niiraka: ² Mwaana antthu, ekhovyaa enaahala okhumela n'mamyaako oIsrael ni olalyee. ³ Ni wiire: Myaako tjo Israel, mwiiwe nuulumo naApwiya Muluku! Apwiya Muluku aniiratjo n'mamyaako ni mapuro ooteene. Kinaawoowiiherani ekatana ni kinaahala waakwanhulatja altaareenhu. ⁴ Vano, altaareenhu anaahala othamiya ni altaareenhu olunpani anaahala okwanhulatjiya; kinaahala waariha atthweenhu ookhwa ohoolo waamulukweenhu eethiru. ⁵ Kinaahala waariha ookhwa oIsrael ohoolo waamuluku eethiru ni kinaahala omwaressela makhuva woorukureerya altaareenhu. ⁶ Wakhula nipuro nin'halaaya okhala, epooma tjinaahala okwanhulatjiya ni altaare anaahala okwanhulatjiya, wotjitjon'mo altaareenhu tjin'halaaya okwanhulatjiya noothamiya. Ohoolowaya, amulukweenhu eethiru anaahala opwessakatjiya ni anaahala orimeela, altaareenhu olunpani anaahala othikiliya nimitekotjinhu tjinkookhala tjoohiitthu. ⁷ Ookhwa an'hala omorela eriyariinhu ni n'naahala otjuwela wiira Mi kaApwiya. ⁸ Massi kinaahala onssunka nkoohala wanhu ni ahaavo ankookhumenla ootthawa ekatana n'malokoni, mwakookawanihatjiya n'malaponi. ⁹ Vano, ankootthawa, anaahala okuupuwela n'malokoni mon'mo mun'halaaya otthukeliya, tjikhanlyaaka ootjukula mwaha womirimatjaya akikhottale, ni nmeethoniwaya ahoraruwa yaatttharaka amulukwaaya eethiru. Ohoolowaya anaahala othoonhera ekhove yoohikhala mwaha wotjitthu tjoohikhala. ¹⁰ Tjon'mo, anaahala otjuwela wiira Mi kaApwiya. Yeela phinthoonhera wiira kaanaahala waawiihera yootakhaleela. ¹¹ Apwiya Muluku aniira tjo: Watte nimatata ninhaa. Ni waahimeerye: Mwaha watjootakhala tjooteene ntthoko noIsrael, ayena anaahala okhwa, etala. ¹² Nkookhala ottayi naahala okhwa nimwanttuuttu ni nkookhala wakhiviru nkookhwa niikatana. Nkoohalooyo nkookhwa niitala. Weenan'na yeela, kinaahala waavirihela orussiyawaka. ¹³ Vano, onaahala otjuwela wiira Mi kaApwiya, anankhwaayo yakhala oowaresseliya eriyari yaamulukwaa eethiru, woorukureerya altaaryaa, wakhula mwaako woorekama, ni wakhula nlootho womwaako ni vathi wokhula nri, mapuro ooteene yaapahaa elunpani waamulukwaa eethiru. ¹⁴ Kinaahala waataphulela ntata ni kinaahala okwanhul elapweeyo, moothakoni oDibla, mapuro ooteene ankhalaaya. Vano, ayena anaahala otjuwela wiira Mi kaApwiya.