¹ Vano, ookusse ekatana yoweetha phanka elaamina yoomettha ekharari; ovirihe n'murumwaa ni nrorinimwa ni okusse epalanssa ophime ni okawanihe ekhararitja. ² Opahe nphantte woneeraru nimooro eriyari epooma, mahuku oorukureerya yamalelavale; okusse nphantte woneeraru wokharari ni othikile niiikatana woorukureerya epooma. Vano, nphantte woneeraru omwaressele ophyooni ni Mi kinaahala opurula ekatana wiira yoomolnihe atthu. ³ Massi okumihe ekharari emotja nkhararinimwaa ni otthuke wookhunaniha ekuwotjaa. ⁴ Vano, okusse vakaani ekhararin'nho ni orihele eriyari womooro; opahe. Vaava, onaahala okhuma mooro wontthoko nooteene naIsrael. ⁵ Apwiya Muluku aniira tjo: Eriyari womaloko ola Jerusalem, waweesseenralyaaka, orukureeriya niilapo tjikhwaawe. ⁶ Massi yena, naakhottaka malamulwaaka ventji woovirikana maloko, nookhotta ekettelotjaka woovikana elapo tjinrukureerya. Atthu ahaakhotta anassariyaaka ni khayeettelale ekettelotjaka. ⁷ Phimaana, Apwiya Muluku aniira tjo: Kontha khuniiwelela woovirikana nimaloko yoorukurenrye, ni khaweettelale ekkettelotjaka, wala khaweettelale moolumwaaka weettelale ekettelo tjomakhoto yoorukureeryale, ⁸ phimaana, Apwiya Muluku niira tjo: Kimwaneene kinaahala woovarela nteko! Kinaahala waakumiha aphuki eriyaryaa, wowiira malokwaayo yoone. ⁹ Kinaahala woopanka etthu ehinaayaaka woopanaka ni akin'hala owaakulelihatho, mwaha watjoovaratjaa. ¹⁰ Phimaana, ayari anaahala waakhura assaanaaya ni assaana anaahala waakhuura an'nathumwanaya, okhala wiira kinaahala onkumiha nphuki ni kinaahala waamwaressela munvira atthu mooteene. ¹¹ Phimaana, wahoreeressa phanka tjinkhalaaka n'na nlamulo naApwiya Muluku kontha ohonanariha enupaaka nitjitthu tjoohikhala nitjoovaratja tjooteene, phimaana, Kinaahala woovukula. Kinaaahala wookumiha, woohikiriri meethwaa ni akin'hala owoovenliha. ¹² Nphantte woneeraru onaahala okhwa naassanttuuttu; eriyaryaa, ayenatja anaahala oliya niitala; nphantte woneeraru on'hala omorela nkatanani yoorukureeryale, vano, kinaala omwaressela nphantte woneeraru n'mittalani mooteene ni kinaahala owiiha ekatana wiira yoomolanihe. ¹³ Vano, orussiyawaka onaahala omalela ni okassiriyawaka on'hala okhala naayena. Wanaahala okitjivela ni anaahala otjuwela wiira Mi, Apwiya, kihuuluma moorussiyaniwaka owakathi waamaliheralyaaka okassiriya. ¹⁴ Kinaahala owoonihatja ehaaya womaloko anoorukureerya, wameethoni waatthu ooteene envira. ¹⁵ Vano, Jerusalem n1hala okhala etthu yowaalamula akhwaawe ni waathanha, nlipihero womaloko anrukureerya. Kinaahala waawiiha aphuki nooruussiya; noohiihiya wuulupale. Mi, Apwiya, kihuuluma tjon'mo. ¹⁶ Kinaahala wookurusselani mattheere otala, on'hala okhala wookwanhulaniwaka. Kontha kinaahaka wintjenra etala ni kinaahala omaliha tjinphwanheenhu ephaawu. ¹⁷ Kinaahalaokurussa etala niinama tjuulupale wiira tjaakhuure assaaneenhu. Omwaryaa wophome onaahala woophwanhani, Mi, Apwiya, kihuuluma tjon'mo.