¹ Okusse etitjolu emotja wiitjeessenre ohoolowa. Vaava, opanke epooma yooJerusalem. ² Woottharenlana, walipihatje epooma yooteene. Weessenre mapuro oopheela oweliya epoomeeyo ni opanke mapuro oothukumaniya woorukureerya. ³ Vano, wakusseke ekhalako yoyuuma ni okhalihe phanka eluwani yoyuuma we niipoomeeyo ni orukunussele ekhovyeeyo won'wo, maana enaahala okhaliya, ni onaahala orukureerya yeeyo. Eyo en'hala okhala nthoonhero wontthoko naIsrael. ⁴ Vano, wiitjaatalele moonuaa woothiyana ni weessenre etanpi yo Israel; onaahala okussa etanpitjaa womahuku an'halaa wiitjaatalela, ohoolo wantthoko naIsrael. ⁵ Kinawoovahatjera niuku nimotja noothoonhera khula mwaakha wonttarusswa: mahuku emiya tthaaru wohanssiini naarupayini. Weenan'na yeeyo, onaahala oteessa etanpi tjotthoko naIsrael. ⁶ Wamaliheraka mahukwaala, onkowiitjaatalelatho wonayeeli, womoono woolopwana. Vano, onaahala oteessa etanpi tjotthoko naJuda womahuku arupayini. Ni kinaahala woovaha nihuku nimotja wakhula mwaakha. ⁷ Ekhovyaa wawehihe nphantte wooJerusalem, okhanle woorukureeriya, nimoonuaa wootjuweleliya, nawoonela. ⁸ Kiniira koohelelaka mikhoyi. Tjon'mo, khun'halatho orukunuwa nphantte ninphantte nkhwaawe, npaka omalihera mahuku oorukureerya. ⁹ Okusse etiriku, ekhutte nitjitthu tjikhwaawe; ohele nipuro ni wiipankele ephaawu, yonayeeli mahuku yiitjaatalenlyaa nphanttyaa. Womahuku emiya tthaaru wohanssiini naarupayini, onaahala olya tjen'nho. ¹⁰ Eyoolya en'halaa olya en'hala okhala yoophimiya, ekiilu ssiriini khula nihuku, ni on'hala olya nookathi woovahatjeriya khula nihuku. ¹¹ Vano, onaahala ovurya maatji oophimiya enuuss ni on'hala ovurya okathi woovahatjeriya. ¹² On'hala olya phanka nkatthe, massi on'hala opankatja weepinaatamu, ohoolowayatja! ¹³ Apwiya aniira tjo: Eyo en'himyatjera wiira ephaawu en'hala okhura atthu oIsrael en'hala okhala yontuniyani n'makhotoni, on'halaaka waarweehela. ¹⁴ Vano, kaahiira: Ah, Apwiya! Akinaakhala oohiloka! Ni akinalya etthu yookhwa, wala etthu yowiiviya niinama. Okhuma emwaavanuaaka npaka n'nava, mwaanomwaka khinakela enama! ¹⁵ Vano, Ayena yaahokiirela: Nkaweha! Kinoovaha eleeti yomope ohiya yeepinaatamu; tjitjon'mo onaahala otthonkomaniha ephaawaa niyeeyo. ¹⁶ Yena tootho aahiira: Kiniira kikumihaka eyoolya yoophaawu oJerusalem, nooomaalelyaa, an'hala wuupuwela ephaawu, woohikhuluvela, anaahala ovurya maatji oohuveliya. ¹⁷ Kontha tjinaahala waathwaa ephaawu nimaatji, khula ntthu n'hala okhala oorussiya ni mun'nawe nianaahala orimeela mwaha watjoovaratjaya.