¹ Yna aahokiirela: Olye en'halaa ophwanha, olye eliivurwiila; orwee ni wuulume ntthoko naIsrael. ² Vano kaahotthukula malakwaaka ni Ayena yaahokivaha eliivuru wiira kilye. ³ Ayena yaahokiirela, olihe eroohwaa ni orupale wayeela yoovahalyaaka! Vano kaaholya, ni, mwaanomwaka, yaanoonaa kanpa oravo. ⁴ Vano, Yaahokiirela: Orwee ntthoko naIsrael ni waattonkela moolumwaaka. ⁵ Kontha khunaaveleelihiya waatthu owuuluma eluuka yoohitjuwanyaa wala eluuka yoorika, massi ntthoko naIsrael; ⁶ woohikhala elapo yooweryessa, wuulumatjawaya woohitjuwanyaa wala eluuka yoorika, maana moolumwaaya khawaahala wiiwa! Kinoorumale waayenatja, yaanaahala owiiwa. ⁷ Massi ntthoko naIsrael khanin'hala owiiwa, kontha khantthuna okiiwa, kontha Israel ooteene khaniiwenla noolipa nrima. ⁸ Kihokhaliha ekhovyaa yookhanhenra phanka ekhovetjaya ni eyuutjyaa yoolipa phanka ayenatja. ⁹ Eyuutjyaa kihokhaliha phanka nluku nowaarya, yoolipa tjinene phanka nluku! Ohoove, ohikhale ookuthakuthyaa mwaha, kontha ntthoko noohiiwelela. ¹⁰ Vano, Ayena yaahokiirela: Moolumo ooteene an'halaaka woohimeerya, weesse wanrimani ni, maarwaa aviriyane. ¹¹ Vano, orwee waatthu ootthukeliya, onaahala owiirela: Apwiya muluku phiniiraaya, owiiwa, noohiwiiwa. ¹² N'nepa waahokivussa ni ottuluwaka kaahiiwa etetere yuulupale: Woottottopeliya okhale waarya waApwiya munkhalaaya! ¹³ Waari oruma womapupha aatthu akumi waakwanhanaaya nimotja ninikhwaaya, oruma womarootha yaari naayena nooruma wotetere yuulupale. ¹⁴ N'nepa waahokivussa, waahokikumuha kirwaaka wootikinihiya nrimaaka; ntata naApwiya naanokikhavihera tjinene. ¹⁵ Vano, kaahorwaa waatthu ootthukiya oTel-Abibe, yaakhala vamotja nimuro Quebar, ni woowu kaahokhala mahuku ssaapa, wootjariya nimiiriirya. ¹⁶ Anavirale mahuku saapa, nuulumo naApwiya naahokikhumenla, niiraka: ¹⁷ kihookhaliha nlipihero ntthoko naIsrael; vano wiiwe moolumwaaka ni waatttonkele. ¹⁸ Kamwiirelaka n'malapo: Weekhweeli onaahala okhwa', ni waahaahimeerye mwaha watjoovaratjaya, wowiira yena akhale, n'malapo naahaka okhwa ntanpiniwawe, massi kinaahala okussenra ephomyaawe n'matataniwaa. ¹⁹ Vano, wan'himeeryaka ni yena hitthunaka ohiya tjoovaratjawe tjoonhala, yena naahala okhwa mwaha wotanpyaawe, massi we onaahala woopwaa mwiikuminiwaa. ²⁰ Nassariya ahiya onassariyaawe avaraka woohissariya, kinaahala onkakathuwiha ni luku ohoolowawe, ni naahala okhwa. Kontha khaweettihenre, yena naahala okhwa niitanpyaawe ni Mi akin'hala omuupussera mitekotjawe tjossariya tjivaralyaawe, massi kin'hala okussenra ephomyaawe n'matataniwaa. ²¹ Vano, wamwiirelaka nassariya wiira hikosse, yena hivaraka yotanpi, yena weekhweeli naahala okhala, okhala wiira hohineeriya, ni we onaahala woopola ekumyaa. ²² Ntata naApwiya naari nimiivano ni naahokiirela: Ovuwe ni orwee omwaamuroni! Kinaahala owuulumana woowu. ²³ Kaahovuwa ni kaahorwaa; waarya waApwiya phwaaryaaya, phanka waarya woonalyaaka omuro Quebar; vano kaahokokhorela vathi. ²⁴ Vano, n'nepa waahokikela ni waahokeemessa, ni waahokuulumana wiiraka: Orwee ni wiitthukele npaanimwaa, ²⁵ kontha n'nava, onaahala weessenriya mikhoyi ni onaahala otthukiya wowiira ohikhume waryaaya. ²⁶ Nlimi nonmwaanomwaa kinaahala omaaliha, on'hala okhala oohuulumatja ni khun'hala waatthukela, kontha ntthoko noohiiwelela. ²⁷ Massi, Kawuulumanavale, kinaahala otthuka malakwaa wowiira waahimeeryatje: Apwiya Muluku aniira tjo: Npheela wiiwa iiwe; hinpheeloole hiiwe, kontha mwaatthu oohiiwelela!