¹ Ni Yena aahokiirela: Mwaana antthu, weemele, kinaahala owuulumana. ² Vano, wiiraawe akuulumanaka, N'nepa waahokikela ni waahokeemessa, ni Kaahomwiiwa akuulumanaka. ³ Yena aahokiirela: Mwaana antthu, kinooveeleeliha waatthu oIsrael, atthu ahintthuna okiiwelela. Ayena hata atthwaaya okhalayi an'nokikossera npakha nihuku nolelo! ⁴ Amutjaaya atthu oohitthuna wiiwa ni oolipiha mirimatjaya. Kinooveleeliha waayenatja, wiira waahimeeryatje: Apwiya Muluku ela phin'himyaaya, ⁵ awiiwe, noohiwiiwa, kontha atthu oohiiwa. Anaahala otjuela wiira nrumeyi aahophiya eriyaryaayatja. ⁶ Ohoove hata moolumwaaya. Ohoove, hata ovire moorikarika. Ohoove moolumwaaya, wala tjihiwoopopihe ekhovetjaya, kontha atthu oohiiwelela. ⁷ Phimaana, on'hala wuullumatja moolumwaaka, wiiwa, noohiiwa, kontha khaaniiwenlatja. ⁸ Massi, wiiwe enoohimeeryaaka, ohikhale oohiiwelela phanka ntthokon'ne noohiiwelela. Otthukule malakwaayo ni olye enpheelaaka woovaha! ⁹ Vano kaahoweha, ni kaahotaphuleliya ntata: ntatanen'no, yaahaavo eliivuru. ¹⁰ Ayena yaahokitaphulela ohoolowaka. Eliivurwiiyo yaahantikhiya n'hina noota ni, mon'mo, tjantikhiye tjooweryaa, wunla nootjukulatja.