¹ Wawehalyaaka erimu yaari watjulu myuru, yaahokhumenla etthu watjuluwaya, yookhala phanka nluku nooreeressa, yoolikana niihitje. ² Vano, Apwiya yaahuuluma ninlopwana oowara ekuwo yoovevyala ni yaahiira: Orwee eriyari yomarootha, vathi womalaikha, ni okusse n'matatanimwaa makhala omooro yaattamenlale malaikha, ni omwaressele npooma. Vano, wiiraka kiwehaka nlopwana aahokela. ³ Malaikha yaanoweemela, moono woolopwana wonupa, nlopwana wakelalyaawe nihutte naahokhuneela epuwa. ⁴ Waarya waApwiya waahokhuma n'malaikhani, yaaheemela wankhora wonupa ni yaahotjara nihutt; epuwa yaanootjara niwaarya waApwiya. ⁵ Niiwanyaa ntju omapupha omalaikha nipuwa nooteene, nintju naMuluku oowerya-tjooteene uulumaka. ⁶ Owakathi Muluku waamwiirenlyaawe nlopwana oowara ekuwo yoovevyaala wiira: Okusse mooro eriyari womarootha yaattamenlale malaikha, nlopwana aahokel ni khweemela nphantte womarootha. ⁷ Vano, nlaikha nimotja naahotaphulela ntatanaya mooro wari naayena, yaahokussa makhala ni yaahonvaha nmatataniwawe yool aawarale yoovevyaala. Nlopwana aahokussa makhala ni aahokhuma. ⁸ Kaahoona, nimalaikha, yoolikana nintata nantthu vathi womapuphaaya. ⁹ Vano, kaahoona marootha matjesse yaari nphantte womalaikha, khula nlaikha ninroothanaya; maroothaayo yaakhala phanka nluku noopipila. ¹⁰ Yaakhala oolikana: khula nrootha oomatjesse yaakhala phanka nimotja n'hina monikhwaaya. ¹¹ Owakathi weenheenhaaya, yaarwaa miphantte tjoomitjesse woohirukunuwa, massi yeettela waaweha muru; khaarukunuwenle nphantte nkhwaawe wiiraaya yeettaka. ¹² Erutthutjaya ooteene, epararitjaya, matat ni mapupha, yaakhuneeliye nimeetho; ni meethwayo yaakhuneela marootha oomatjesse wowaarukureerya. ¹³ Ni kaahiiwa wiira maroothaayo yiihaniya ''oorukureerya''. ¹⁴ Khula nlaikha naarina ekhove tjesse: noopatjera naarina ekhove nonlaikha, nonayeeli naarina ekhove yantthu, noneeraru naarina ekhove yokharamu, ni noneetjesse naarina ekhove yonaka. ¹⁵ Ni malaikha yaari ookhala yoonalyaaka vamotja nimuro Quebar, yaahowela otjulu. ¹⁶ Malaikha owakathi weettaaya, maroothaayo yaarwaa nphanttyaayatja; ni, owakathi malaikha waavussaaya mapuphaaya vathi, maroothaayo khayaahiya nttalaaya, massi yaakhala nphantte yooyo. ¹⁷ Malaikha yeemelaka, nimarootha yaanaweemela ni, yantjaka weetta, nimarootha yaanaweetta, kontha N'nepa wookhala waari mon'mo. ¹⁸ Vano, waarya waApwiya waahokhuma wankhora wonupa ni waahorwaa waari malaikha. ¹⁹ Malaikha yaahovussa mapuphaaya, awelaka, woonaaka akhumaka, marootha yaahopanka tjitjon'mo. Yaaheemela wankhoora nphantte onkhuma ntjuwa enupa yaApwiya ni waarya waMuluku oIsrael wahaaweelatja watjuluwaya. ²⁰ Yaayo phaakumi awoonalyaaka vathi waMuluku oIsrael, waattamenla emuro Quebar, ni kaahotjuwela wiira yaari malaikha. ²¹ Khula nlaikha naaarina ekhove tjesse nimapupha matjesse ni, vathi womapupha, yaahaavo yoolikana nimatata aatthu. ²² Ni ekhovetjaya tjaalikana naale yaawehalyaaka mowoonani omuro Quebar ni khula nlaikha neettela ohoolowaya.