¹ Vano, n'nepa waahokikussa ni waahokirweeha wankhora wonupa yaApwiya. Kaahowoona alopwana siriini nathanu. Kaahomoona Jazanias, mwaana Azur, ni Pelatias, mwaana Benaias, ahooleli aatthu, eriyaryaayatja. ² Muluku aahokiirela: Mwaana antthu, ala phaatthu anvara tjitthu tjoohikhala ni ankumiha moolumo oohikhala npooma. ³ Aniira tjo: Khunakhala okathi woorehenryatja enupa; epoomeela ekhantarawu nihi niinama. ⁴ Phimaana, waathoonheratje. Waathoonhere, mwaana antthu. ⁵ Vano, n'nepa waApwiya waahokiweela ni waahokiirela: Wiire: Apwiya aniira tjo: Phanka tjiniireenhu, oh Israel, essiyani Mi otjuwelaka enuupuweleenhu. ⁶ N'howintjiviha anankhwiihu epoomeela, naayena, n'haatjariha nparapaarani. ⁷ Phimaana, Apwiya Muluku aniira tjo: Atthu awiivakatjaleenhu, erutthutjaya mweessaka eriyari Jerusalem, phiinama, niipoomeela phinkhantarawu. Massi n'naahala oriheliya ota wopoomeela. ⁸ Nhu n'noova ekatana, phimaana, Kinaahala woowiiherani ekatana, n'na nuulumo naApwiya Muluku. ⁹ Kinaahala wookumihani eriyari epooma ni kin'hala woovahenrani n'matatani mwaatthu oottayi ni kinaahala woolamulani. ¹⁰ N'nohala omora niikatana. Kin'hala woolamulani n'hina momwiinano oIsrael ni n'naahala otjuwela wiira KaApwiya. ¹¹ Epoomeela khin'hala okhala ekhantarawiinhu, wala nhu khan'nohala okhala enama n'hinamwaya. Kin'hala woolamulani n'hinamwaya mwiinano oIsrael. ¹² Vano, nnhu n'naahala otjuwela wiira KaApwiya, yaale aheettelaleenhu ekettelotjaya, ahitthunaleenhu wiiwenla moolumwaaya. Woovirikanaaya, mwaaniiwaka ekettelo tjonlaponi tjoowoorukureeryani. ¹³ Wiiraaka kilalyaaka, Pelatias mwaana Benaias, phaakhwaawe. Vano, kaahooroma ni kaahunla nintju nuulupale kiiraka: Apwiya, n'nohala okwanhula woomalela Israel ooteene. ¹⁴ Nuulumo naApwiya naahokiweela, niiraka: ¹⁵ Mwaana antthu, assihimaa! Assihimaayo! Assimutjyaa nintthoko naIsrael nooteene! Ooteenetjaya phayaale ankhala oJerusalem yiirale: Ayenatja ari ottayi naApwiya! Etthayeela nivahiye okhala yawihu. ¹⁶ Phimaana, waahimeerye: Apwiya Muluku aniira tjo: Onookhalaru wiira kihaakumiha nlaponi, ni, ni onookhalaru wiira kihaamwaressela ntthayani, hata tjitjon'mo, Mi kiinupaaya wooowakathi vakaani womapuro orwaalyaaya. ¹⁷ Phimaana, waahimeerye: Apwiya Muluku aniira tjo: Kinaahala wootakanihani naatthu ni kin'hala wookhalihani mapuro yoomwaressenlyaakani; kinaahala woovahani etthaya yoIsrael. ¹⁸ Vano, ayenatja anaahala orwaa ni anaahala okumihatja tjitthu tjoohikhala ni tjoonanara tjooteene nipuron'na. ¹⁹ Kin'hala waavaha nrima n'motja ni kinaahala waahela nrima nphyaa. Kinaahala waakumiha nrima wonluku ni kin'hala waavaha nrima wonama, ²⁰ wowiira yeette Nketteloniwaka, assunke moolumwaaka ni avarele nteko. Ayena an'hala okhala atthwaaka niMi kin'hala okhala Mulukwaaya. ²¹ Massi yaale aneetta nimirima tjoorukureeriya nitjitthu tjoohikhala, Kinaahala waamoriha n'mitekoniwaya tjon'muruniwaya, n'na nuulumo naApwiya Muluku. ²² Malaikha yaahovussa mapuphaaya, nimarootha yaanaaveleela, ni waarya waApwiya waari naayena. ²³ Vano, waarya waApwiya waahowela okhuma eriyari epooma ni waahokhala omwaako ori nphantte wopooma. ²⁴ N'nepa waahokivussa ni waahokikussa npakha oBabilonia, mowoonani won'nepa waMuluku, ni woona waarivo waahorimeela. ²⁵ Nimi kaahaattonkela atthu tjitthu tjooteene Apwiya tjaakithoonheralyaaya.