¹ Naahokiweela nuulumo naApwiya niiraka: ² Mwaana antthu, onkhala ntthoko noohiiwelela, arina meetho oopheela wona massi khaanoona, nimaaru oopheela wiiwa massi khaaniiwa, kontha ntthoko noohiiwelela. ³ Wakhalaka we, mwaana antthu, otthonkomanihe tjitthutja orwee ottayi, ni wiitthonkomanihe wiira okhume othana, yoowehaka, kontha Kin'hala woorweeha ottayi yoowehaka, nipuro ninkhalaa orwaaka nipuro nikhwawe. Wan'nokhala yantjaka woona, ninookhalaru ntthoko noohiiiwelela. ⁴ Onaahala okumiha tjitthutjaa orweehaka ottayi awoonaka; on'hala okhuma othana yoowehaka, phanka ntthu nrwaa ottayi. ⁵ Opanke mwiithe wassirini, yoonaka, ni ovire vaava. ⁶ Tjitthutjan'nho on'hala okussa wanikhatani, yoowehaka. Okhuneele ekhovyaa, wiira ohoone etthaya, kontha kin'hala wookhaliha nthoonhero ntthoko naIsrael. ⁷ Kaahopanka phanka tjiireliyaaka. Nihuku nooteene kaahokumiha tjaari tjawaka phanka oorwaa ottayi, ni othana kaahottenla essiri nimatata. Kaahokumiha tjaari tjawaka npiphini, ni kaahokussa khweessa wanikhataniwaka yoonaka. ⁸ Vano, naahokiweela nuulumo naApwiya owitjissu, niiraka: ⁹ Mwaana antthu, ntthoko nowIsrael khanookohale, ntthoko noohiiwelela: Onvarani. ¹⁰ Waahimeerye: Apwiya Muluku aniira tjo: Ntekoola anaatjiya akhulupale oJerusalem, nintthoko nooteene noIsrael niri eriyaryaaya. ¹¹ Waahimeerye: Kinthoonherweenhu. Tjitjon'mo phanka tjipankalyaaka, phin'halaaya opankiya; ayena anaahala orwaa ottayi nootthukeliya. ¹² Nkhukupale nkhala eriyaryaayatja naahala okussa tjitthujawe wanikhatani, mwiipiphini, ni n'hala okhuma wassirini. Ayena anaahala opwessa essiri ni anaahala okussa tjitthutjaya. Yena naahala okhuneela ekhovyaawe, ni khan'hala woona etthaya nimeethwaawe. ¹³ Tootho kinaahla otaphula ntthavinaka ni naahala ophwanhiya munryankhoniwaka; ni vano, kinaahala onrweeha oBabilonia, elapo yaaCaldeu, massi yena khan'hala woona, n'hala okhwela vaava. ¹⁴ Kinaahala waamwaressela, mapuro ooteene, ooteene yaale an'hala onrukureerya wiira ankhavihere, naatthu ooteene, ni kinaahala waaveleeliha ekatana ottuliwaya. ¹⁵ Vano, anaahala otjuwela wiira kaApwiya, kaamwaressela ni kaavavaressa elapo yooteene. ¹⁶ Massi kinaahala wiinanela alopwana akhwaawe eriyaryaaya, nkatanani niitjoroope, wowiira attonke tjoovaratjaya tjooteene tjonlaponi on'halaaya orwaa, ni anaahala otjuwela wiira kaApwiya. ¹⁷ Naahokiweela nuulumo naApwiya, niiraka: ¹⁸ Mwaana antthu, olye noovurya nootjukulatja. ¹⁹ Vano, waahimeerye atthu onlaponi: Apwiya Muluku aniira tjo mwaha waatthu ankhala oJerusalem niilapo yo Israel: Ayena anaahala olya noovurya niwoova kontha elapo enaahala ohuvihiya ventji mwaha wotjitthu tjinvaraaya yaale ankhala mon'mo. ²⁰ Ni epooma tjinkhalaaya tjinaahala othamiya; etthayeeyo khin'hala oruweriya; ni n'naahala otjuwela wiira kaApwiya. ²¹ Naahokiweelatho nuulumo naApwiya niiraka: ²² Mwaana ntthu, ankhilini ala anaakhalaneenhu elapo yoIsrael mwiiraka: Mahuku ahintjenriya ni yowoona khayiiranyaale. ²³ Phimaana, waahimeeryatje: Apwiya Muluku aniira tjo: Kinaahala waamaliha ankhili ni atthu owIsrael khan'halatho ovarela nteko. Waahimeeryatje: Mahuku ahaattamela, yowoonyaa yooteene enaahala omaliheriya. ²⁴ Kontha khun'hala okhalatho woona woohiloka wala tjowaanhihera ntthoko naIsrael. ²⁵ Kontha Mi, Apwiya, kinawuuluma kinaavarela nteko moolumo anuulumaaka. Khan'halatho wunteelihiya. Kontha Mi kinaahala wuuluma n'mahukuniwinhu, ntthoko noohiiwelela, ni kinaahala ovarela nteko! ²⁶ Ni, naahokiweelatho nuulumo naApwiya niiraka: ²⁷ Mwaana antthu! Nkaweha, ntthoko naIsrael niniiraka: Yowoona enoonaawe yomahuku mentji oohoolo niyena nlalyeera mahuku oottayi. ²⁸ Phimaana, waahimeerye: Apwiya Muluku aniira tjo: Moolumwaaka khaannteelihiyatho; nuulumo nuulumalyaaka ninaahala wiiranyaa n'na nuulumo naApwiya Muluku.