¹ Vano, mwaakhuwele ahooleli owIsare ² ni mwiire: Anumwaninhu yaari phaapani. Havara naakharamu; eriyari yaakharamu ooyevatja, yena huunuwiha assaanaawe. ³ Yena howuunuwiha wakhula mwaamwanawe wowiira akhale oolipa, kharamu funttale wiihephela ni, noohoolo aahokhala owaavaraatthu. ⁴ Elapo tjooteene aahiiwanyaa. Yena aahovarihiya munryankhoni ni, aahorweehiya elapo yoEgito. ⁵ Waakhanlyaawe oonaka phanka naahokolyaa, mirukutjawe tjaahokhala tjoohinteko. phimaana, aahonkussatho mwaamwanawe nkhwaawe wiira ankhalihe kharamu oolipa. ⁶ Yooyo aanothamalyaa naassikhwaawe. Aari mwankaani ni aahofuntta wiitothela; ni aanaakhuura atthu. ⁷ Yena anawaavara anankhweli ni aanohiirihatja epooma. Elapo yooteene yaahotthawiya mwaha wonrunkulwaawe. ⁸ Massi elapo tjowaattaman'na tjaahonweela; aahorukureeriya. Yena aahovarihiya munryankhoni. ⁹ Aahokussiya arweehiyaka oBabilonia. Aahorweehiya ottayi wiira ntjuunawe niiwanyee oIsrael. ¹⁰ Anumwaninhuyaari phanka nri wowaaliya nphomeniwinhu n'maatjini. Yaaniima tjinene ni yaahintjivana eritta mwaha womaatji mentji. ¹¹ Yaahaana eritta tjoolipa, tjaakhuluveliya; niikhalelwaaya. ¹² Massi nryuuyo waahuuma phumorelaka vathi; ni ethututjaya tjaahuuma. Erittatjaya tjoolipa tjaahuntakyaatja ni tjaahuuma; tjaahovya nimooro. ¹³ Phimaana, n'nava, waaliye moothakoni, etthaya yowuuma ni yoohimaatji. ¹⁴ Mooro waahokhuma nrittani ni waahopaha mihokorokhotjaya. Khuuvotho nritta woopheela ohoolela. N'na phinuulumo nin'hala wuulumeliya.