¹ Mwaakha wonassaapa, mweeri woneethanu mahuku yeettaka khuumi, mahumu oIsrael yaahowa wuuluma naApwiya ni yaahookoma ohoolowaka. ² Vano, naahokiweela nuulumo naApwiya, niiraka: ³ Mwaana antthu, waahimeerye mahumu oIsrael, wiiraka: Apwiya Muluku aniira tjo: N'waatjale okuulumana. Tjitjon'mo phanka tjinkhalaaka, akin'hala wuulumaniya ninhu! n'na nuulumo naApwiya Muluku. ⁴ Onaahala waalamula. Mwaana antthu, we onaahala waalamula. Ayena atjuwele tjoovara tjan'nathumwanaya. ⁵ Waahimeerye: Apwiya Muluku aniira tjo: Nihuku ninthalalyaaka Israel ni kitaphulaka ntatanaka wiira kiluphele ntthoko naJaco ni kiitjuwelihaka elapo yo Egito, Kiirale tjo: Mi kaApwiya, Mulukweenhu, ⁶ nen'ne nihukun'ne, kaahovussa ntatanaka nooluphela wiira kaanawaakumiha elapo yo Egito kaarweehaka elapo yaathanlelalyaaka, yeeyo etjanle eleeti nooravo; elapo tjinookhalaru phinipuro nooreeressa. ⁷ Kaahowiirelatja: 'Wiira khula ntthu ahiye tjitthu tjinoonaawe n'meethoni ni amuluku eethiru oEgito. N'hikhale atthu ontuniyani. Mi kaApwiya, Mulukweenhu'. ⁸ Massi ayena khaatthunale okiiwenla. Khula ntthu khaatthunale ohiya ota tjitthu tjintthuna meethweenhu, wala khamwaahiyale amuluku eethiru oEgito. Vano, kaaholakela okurussela orussiyawaka waayena, eriyari yolapo yo Egito. ⁹ Kaaholakela ninfento mwantjinanaka, wowiira tjootakhala tjihikhale n'meethonimwaya n'laponi mwaaryaaya. Kaahiitjuweliha waayena, n'meethonimwaya, kaakumihaka elapo yo Egito. ¹⁰ Vano, kaahaakumiha elapo yo Egito kaarweehaka moothakoni. ¹¹ Kaahaatjuweliha mittalatjaka niikettelotjaka, tjen'nho ntthu naahala okhala, iiwelela. ¹² Kaahaavahatho mahuku ontivela phanka nthoonherwaaya, wowiira atjuwele wiira kaApwiya, anaareeriha. ¹³ Massi ntthoko naIsrael khanikiiwelelale moothakoni. Khayeettelale mittalatjaka. Ohiyavaa, khaatthunale ekettelotjaka, tjen'nho ntthu tjaahalaawe okhala, iiwelelaka. Ayena ahohanhuriha mahukwaaka ontivela. Vano, kaahowiirela wiira kinaaahala waakurussela orussiyawaka, moothakoni, wiira kaamalihatje. ¹⁴ Kaavarale ninfentwaaka mwantjinanaka, wowiira meethwaaya ahiwehe tjonlaponi, wayaale yaakumihalyaaka elapo yo Egito. ¹⁵ Kaahovussatho ntatanaka wowaaluphela, moothakoni, wiira akaahala waarweeha elapo yaahalaaka waarweeha; elapo yowintjiva eleeti nooravo, yaari elapo yooreeressa woovikana tjooteene. ¹⁶ Kaaholuphela tjon'mo kontha yaanookhotta mittalatjaka; khayeettelale mahukwaaka ontivela, mirimatjaya tjaatthara amuluku eethiru. ¹⁷ Massi meethwaaka yaahowoonela othunku mwaha wookwanhuwatjawaya ni akaapitjihale woothakoni. ¹⁸ Kaahowiirela asaanaaya moothakoni: N'heettele ekettelo tjan'nathumwaninhu; n'heettele mittalatjaya, wala n'haakokhorele amulukwaaya eethiru. ¹⁹ Mi kaApwiya, Mulukweenhu, mweettele ekettelotjaka; ni nkhale owiiwelela tjen'nho. ²⁰ N'ssunke mahukwaaka ontivela ttakattiifu, wowiira nkhale nthoonhero wami ninhu, wowiira ntjuwele wiira Mi kaApwiya, Mulukweenhu'. ²¹ Massi assaanaaya khaakiiwenlale. Khayeettelale ekettelotjaka, wala khaassunkale moolumwaaka, tjen'nho ntthu tjaahalaawe okhala iiwelelaka. Ayena khaavarenle nteko mahukwaaka ontivela. Phimaana kaahorussiya naayena moothakoni. ²² Massi Mi kaahohokolossa ntatanaka, ni kaaholakela ninfento wontjinanaka, wowiira ahikhale oohanhurihiya naatthu nlaponi Yaakiwehale kaawaanaka atthu owIsrael. ²³ Ni kaahaavussera ntatanaka moothakoni, kiluphelaka wiira kaanaahala waamwaressela nlaponi ni kaanaahala waakawaniha nlaponi. ²⁴ Mi kaaholakela opanka tjon'mo, kontha khayeettelale ekettelotjaka, anookhotta moolumwaaka noohanhuriha mahukwaaka ontivela. Meethwaaya yaaweheeha amuluku eethiru an'nathumwanaya. ²⁵ Kaahaavaha ekettelo tjahaari tjookhalela ni moolumo yaayo yaahaahalaaya okhala. ²⁶ Mi kaahaakhaliha oohikhala mwaha watjoovahatjaya, owakathi waavahalyaaya okuttho wakhulaowantjera oyariya n'mirimani yaahelaka wamooroni. Kaapankenle tjon'mo waatthulua muru, wowiira atjuwele wiira Mi kaApwiya!. ²⁷ Phimaana, mwaana antthu, ohimyatjeela ntthoko naIsrael; Apwiya Muluku aniira tjo: An'nathumwaninhu khaakipheelale, nookikhotta. Ni yaapankale tjo: ²⁸ Waawiihalyaaka elapo Yaavussenryaaka matata wiira kaavahenre, ni, woonalyaaya myaako tjoorekama tjooteene nimiri tjuulupale, vaava phwaavahalyaaya tjoovahatjaya ni yaahokipatjapatja ni tjoovahatjaya. Yaahopaha elunpani tjoonukhela ni yaahomwaressela tjoovaha tjonipha. ²⁹ Vano, Mi kaahowiirela: Nipuronin'na noorekama, n'nohala orwaa vayi. Tjitjon'mo, phiniihaniyaaya Bama npaka olelo. ³⁰ Phimaana, ohimeerye ntthoko naIsrael: Apwiya Muluku aniira tjo: Essiyani nhu ottharattharaka mittala tjan'nathumwaninhu. Ni essiyani okhalaka phanka anooluva, ntholatholaka tjitthu tjoohikhala. ³¹ Mwiivahaka tjoovahatjinhu mwaarihelaka assaaneenhu wamooroni npakha olelo, nhu n'nokhala atthu ontuniyani naamulukweenhu eethiru ooteene. Vano, essiyani yaahaalaaka woohiyani nkikokhakohaka, ntthoko naIsrael. Tjitjon'mo phanka tjinkhalaaka n'na nuulumo naApwiya Muluku Mi akin'hala woohiyani nkikokhakohaka. ³² Muupuwelweenhu khun'halatho okhala ekhweeli: Nhu n'niira: Nikhale phanka elapo tjikhwaawe, phanka makhoto eelapo tjikhwaawe ankokhorela miri nimaluku'. ³³ Tjitjon'mo phanka tjinkhalaaka n'na nuulumo naApwiya Muluku, kinaahala woohoolelani nintatanaka nooweryessa, moono wookassiriyeene on'halaaka wootaphulelani. ³⁴ Kinaahala wookumihani eriyari waatthu akhwaawe ni kinaahala woothukumanihani nlaponi tjikhanle tjookawanihiya. Mi kin'hala opanka tjon'mo nintata nooweryessa noorussiya. ³⁵ Vano, Mi kinaahala woorweehani moothakoni mwaatthu ni, phun'halaaka woolamulani ekhove niikhove. ³⁶ Tjitjon'mo tjaalamulalyaaka an'nathumwaninhu woothakoni elapo yoEgito, tjitjon'mo phin'halaaka woolamulani n'na nuulumo naApwiya Muluku. ³⁷ Kin'hala woovirihani vathi wonkopwaaka ni kinaahala wookhanhenrihani wiiwenla wowaataana. ³⁸ Kinaahala waarapiha eriyariinhu atthu oohitthuna etthu naale ahinkipheela. Mi kinaahala wookumihani koorweehakani elapo en'haleenhu okhala phanka amalapo, massi ayena khan'hala okela elapo yoIsrael. Vano, n'naahala otjuwela wiira Mi kaApwiya. ³⁹ Nhu atthu ontthoko naIsrael, Apwiya Muluku aniira tjo: Khula ntthu wanhu haana arwaaka waamulukwaawe eethiru. Mwaakokhorele, mweehitthune okiiwenla, massi n'hitakhalihetho ntjinanaka ni tjoovahatjinhu naamulukweenhu eethiru; ⁴⁰ Kontha, mwaakwaaka ttakattiifu, onoothoni womwaako woIsrael n'na nuulumo naApwiya Muluku, ntthoko nooteene naIsrael ninaahala okikhorela. Kinaahala okhala ootteeliya woopheela tjoovahatjinhu nimihokorokho tjowantjera atjoovahatjinhu, nitjitthutjinhu ttakattiifu tjooteene, nen'ne nipuron'ne. ⁴¹ Kinaahala owaakhenlani phanka elunpani yoonukhelihiya, kookumihakani mwaatthuni kootakanihakani elapo tjoota tjimwaresseliyeenhu. Kinaahala wiitoonhihera ottakattiifu wowiira elapo tjoone. ⁴² Vano, koowiihakani elapo yoIsrael, elapo evussenryaaka ntata wiira kaavahe an'nathumwaninhu, nhu n'naahala otjuwela wiira Mi kaApwiya. ⁴³ Vaava, n'naahala wuupuwela mittalatjinhu tjootakhala nimitekotjinhu tjooteene tjen'nho tjookalihani ontuniyani n'nhokhanaka n'meethoniwinhu mwaha wotjitthu tjoteene tjivaraleenhu. ⁴⁴ Kontha n'naahala otjuwela wiira kaApwiya koopankakani tjon'mo wonfento nontjinanaka, woohikhala mwaha womittalatjinhu tjootakhala, wala mwaha watjoovaratjinhu, ntthoko naIsrael n'na nuulumo naApwiya Muluku''. ⁴⁵ Vano, nuulumo naApwiya naahokiweela, niiraka: ⁴⁶ Mwaana antthu, orukunuwele nphantte onkhuma ntjuwa ni wuulume; Okhuwele etakhwa ya Neguebe. ⁴⁷ Wiirele etakhwa ya Neguebe: N'na nuulumo naApwiya: Apwiya Muluku aniira tjo: Kinaahala orihela mooro eriyariinhu. Onaahala paha nri nkithi nuuyo wowuuma. Malimi omooro khan'hala ottiphyaa niikhove tjooteene nphantte onkhuma ntjuwa ni onkela ntjuwa tjinaahala ovya. ⁴⁸ Vano, enama yooteene enaahala woona wiira kaApwiya, kapaha mooro ni khun'hala ottiphyaa'''. ⁴⁹ Vano, kaahowiirela: ''Awiya Muluku, ayenatja ankiirela tjo: Khantjuwela milikaniho'''.