¹ Naahokiweelatho, nuulumo nApwiya, niiraka: ² N'nopheela ohimyani, nhu n'novarela nteko nuulumo elapo yoIsrael: An'nathumwaane yaaholya mihokorokho tjikithi ni meeni aassaanaaya yaahokhala ookhwa. ³ Phanka tjinkhalaaka n'na nuulumo naApwiya Muluku khunkookhumenlatho okathi woopheela wuuluma nen'no nuulumon'no wiIsrael. ⁴ Okumi wooteene wawaka, okumi wathumwaane hata okumi wamwaana, tjooteene tjawaka! Erooho en'hala ottheka, enaahala okhwa! ⁵ Enpheela ohimeeriya ntthu enari yooreera avarelaka essariya ⁶ hilyaka n'mwaakoni, wala meethwaawe ahaaweheehaka amuluku eethiru ntthoko naIsrael, ni hikhale onphwanhiha mwaara amwaattaman'nwaawe, ni hinrupane nthiyana nari ni mweeri, yena nlopwana ophwanela. ⁷ En'himya wiira ntthu hinon'hukhumu nkhwaawe, ahokolossaka yeemesseriyaawe ni waatjima, khanin'nha, massi naavaha eyoolya oovoliya ni naawariha ekuwo atthu ari tjiitjo. ⁸ Ntthu hinliviha woovikana nssurukhu waatjimihalyaawe hiphwanhaka etjaaira ntumiha niissiyani. Oniiriiya ntthuuyo nvara yossariya ni naakhalela n'nema atthu. ⁹ Yoola ntthuula eettela ekettelotjaka ni assunkaka moolumwaaka, vano, ekhuluvelwaawe ntthuula ekhweeli: Yena weekhweeli naahala okhala! Tjon'mo phinuulumaaya Apwiya Muluku. ¹⁰ Vano, yena wakhala wiira haana mwaana, nvara tjoonhala tjikhanle tjoottonkiya, ¹¹ hata athumwaane ahipatjale ovara, mwaana alyaaka n'mwaako ni aarupanaka amwaara amwaattaman'nwaawe. ¹² Nlopwanoola nawaathanha amassikhini naatthu oohikhalana, nawin'nha, khan'hokolossa yaatjimalyaawe, meethwaawe anaaweheeha amuluku eethiru ni nvara tjitthu tjoohikhala, ¹³ naatjima nssurukhu wooliviha woovikana ni naaphwanha etjaaira wayeele entumihaawe. Nlopwanoola waanaaphwanela okhala. Khawanphwanela! Yena, weekhweeli naahala okhwa ni ephomyaawe en'hala okhala niyena kontha hovara tjitthu tjoohikhala. Okhwawawe on'hala omwaatja mwaneene. ¹⁴ Ntthu narina mwaamwanawe ni mwaanooyo oonaka etanpi tjinvara athumwaane, hata awehaka, yena khanvara. ¹⁵ Yoola mwaanoola khanlya n'mwaakoni, khanaakokhorela amuluku eethiru ntthoko naIsrael ni khanaarupana amwaara amwaattaman'nwaawe. ¹⁶ Yoola mwaanoola khanon'hukhumu ntthu, khankussa yoweemesseriya, wala khankussa tjitthu tjowin'yiya; wooirikanaaya naavaha eyoolya atthu oovoliya niitala ni waawariha atthu ekuwo ari tjiitjo. ¹⁷ Ntatanawe khankumiha mwaamassikhini, khanliviha woovikana, wala khanphwanha etjaaira yintji, massi nssunka ekettelotjaka ni neettela moolumwaaka; yoola mwaanoola khan'hala okhwa mwaha wotanpi yaathumwaane: weekhweeli naahala okhala! ¹⁸ Athumwaane, yaanaahukhumu akhwaaya, yaanawin'ya ni yaanawaapanka yoohikhala atthu ni anaahala okhwa mwaha watjoovaratjaya. ¹⁹ Watjooneene, nhu n'niira tjo: Essiyani mwaana ohikhalanaka tjoovara tjaathumwaane. Kontha mwaana naavara yossariya ni naassunka ekettelo tjooteene; ni naavarela nteko. Yena, weekhweeli, naahala okhala! ²⁰ Yoole n'hala okossa phin'hala okhwa. Mwaana khan'hala okussa tjookossa tjaathumwaane ni thumwaane khan'hala okussa tjookossa tjamwaamwanawe. N'nema nineettanaawe ntthuuyo, phin'halaawe okhalana; ni watakhala nrima on'hala okhalana yooyo. ²¹ Massi, ntakhali ahiya etanpitjawe tjooteene tjivaralyaawe, eettelaka essariyatjaka, yena weekhweeli, naahala okhala, khan'hala okhwa. ²² Tjivaralyaawe tjooteene khatjin'halatho wuupuwenliya wayena. Yena naahala okhala mwaha won'nema nineettelaawe. ²³ Watjon'mo, kintthapa okhwa wantakhali Apwiya Apwiya Muluku phinuulumaaya wahikhanle yena wiituthuwa mwaha watjoovaratjawe wowiira akhale. ²⁴ Massi, ntthu nassariya ahiya nttalaawe womaana, avaraka tjootakhala, phanka tjootakhala tjooteene ntakhali tjinvaraawe, yena naahala ophwanela okhala. N'nema nooteene naavaralyaawe akin'hala wuupuwela mahuku an'halaawe okipatja. Phimaana, naahala okhwa wotanpi tjivaralyaawe. ²⁵ Massi nhu n'niira: Nttala waApwiya khunakhala wossariya! Mwiiwe, ntthoko naIsrael! Mittalatjaka tjiri tjoohissariya. Khatjinakhala mittalatjinhu tjiri woohissariya. ²⁶ Ntthu nassariya ahiyaka n'nemanawe avaraka yootakhala ni akhwaka mwaha woyeeyo, vano, yena naahala okhwela yeeyo evaralyaawe. ²⁷ Massi, ntthu oovara tjootakhala ahiya tjoovaratjawe ni avaraka tjooreera, vano, naahala ossunka okumyaawe. ²⁸ Kontha yena hokhala ni hohiya tjitthu tjooteene tjivaralyaawe. Yena, weekhweeli, naahala okhala ni khan'hala okhwa. ²⁹ Massi ntthoko naIsrael niniira: Nttala waApwiya khunakhala wossariya!. Essiyani nttalaaka ohikhalaka wossariya, ntthoko naIsrael. Mittalatjinhu phiri tjoohissariya. ³⁰ Phimaana kin'hala woolamulani khula ntthu nimittalatjawe, ntthoko naIsrael Apwiya Muluku phiniiraaya. Mwiituthuwe ni n'hiye tjoovaratjinhu, wowiira tjen'nho tjihoomoriheni. ³¹ N'hiye tjitthu tjooteene tjivaraleenhu: ni nkhalane nrima nkithi nin'nepa nkithi. Essiyani enpheeleenhu okhwela, ntthoko naIsrael. ³² Kontha khaavo nonpheeliheraaka okhwa Apwiya Muluku phiniiraaya tjon'mo vano, mwiituthuwe ni n'naahala okhala!.