¹ Vano wakhala wiira Muluku hoovuwenlihani ni Kristu, npheelatje tjitthu tjowiirimu Kristu okhanlyaawe nookomale nphantte weelopwana wa Muluku. ² Muupuwele tjitthu tjowiirimu, woohikhala jonlaponi. ³ Kontha n'hokhwa ni okumiinhuuyo ori woossunkiya ni Kristu wa Muluku. ⁴ Akhalaka Kristu khanle ekumiinhu, akhalaka owooniheriya, vano ninhu munrwaa wooniheriya niyena wowaarya. ⁵ Phimaana nkhwelakhwelihe tjowuutjivelatjani tjoottheka tjeeyareelo tjontuniyani: Tjitthu tjomuuluvani, tjooriipiha, tjootjivelatjiya, tjootjivelatjiya tjoohilokaloka, ni tjoolyaalyaatjiya tjiri anluku oohikhala. ⁶ Mwaha wotjen'nha tjitthun'nha orussiya wa Muluku on'wa mwaha waasaana oohiiwelela. ⁷ Ni waari tjen'nha tjitthun'nha wiira nihuku nimotja n'heettela mahuku avirale, waakhaleenhu nkhalelaka tjen'nha. ⁸ Massi vano n'haana mwiirulatjaka tjen'nha tjitthun'nha tjooteene: Orussiya, yowiiva, tjowuupuwela tjoohiloka, oruwana nimoolumo oohilokaloka ankhuma n'malakuniwinhu. ⁹ N'hootheryaneke akina naassikhwaawe, kontha hoohiyani nlopwana okhalayi ni tjoovaratjawe. ¹⁰ Ni hoowarihatjani nlopwana nkithi, wayooyo khanle ooreerihiya wiira otjuwelatja wonaanano, wonayeeli nthoonhihero wayoole npankale. ¹¹ N'natjo khaavo Grego wala Judeu owuulihiya wala ohuulihiya, wala Barbaro wala Cita, oopotthiya wala oohipotthiya, massi Kristu etthu yooteene ni ri naatthu ooteene. ¹² Phimaana mwiiwehawehe nan'lelo, toko othanliya wa Muluku, aattakattiifu ni oofentiya, nkhalanaka tjowuupiwela tjon'hina tjokiriri, otthonkomaniha, wiiyeviha, waamini nuuvilela. ¹³ N'vilelaneke akina naakhwaaya ovahana mahala ntthu ninkhwaawe. Akhalaka ntthu rina etthu yoomwaatja nkhwaawe, onlevenle womanan'na yaayo Muluku tjoolevenlalyaaweni. ¹⁴ Wotjen'nha tjitthun'nha tjooteene, ohaavo nfento, ekhanle yuulupalessa yooreera. ¹⁵ Wiira nrettele wa Muluku ohoolele mirimatjinhu. Nrettele yoola wiihaniyeenhu erutthu emotja paassi; Ni nkhaleke oossukhuru. ¹⁶ Nuulumo naKristu nikhale ninhu. Nuutjuwelatja wooteene, n'ssomihe ni mweettiherani akina naakhwaaya niwiipa, niitjipo tjomun'nepani. Mwiipe nuussukhuru wa Muluku nimirimatjinhu. ¹⁷ Wakhula etthu en'haleenhu ovara nimoolumo wala miteko, n'vare tjooteene mwantjina na Pwiya Yesu, n'vahaka mahala a Muluku eriyaryaawe. ¹⁸ Athiyana nkhale mwiihelelaka assiwan'nhinhu, toko tjinaatjivela aPwiya. ¹⁹ Nhu atheli mwaafenteke assaarinhu, ni n'haapanke yoonhala. ²⁰ Nhu asaana, mwiiwenleke assithumwaninhu weetthu tjooteene, kontha eyo phiyooreera waMuluku. ²¹ Nhu an'napaapa, n'hikhale mwaanhoonhihaka asaaneenhu, wowiira ayenatja ahivololatje. ²² Nhu ananteko mwiiwenleke mapatarawiinhu weetthu tjooteene, kahi ayenatja yoonaka watjulu paassi, massi ninrima weekhweeli, omoova Muluku. ²³ Onpheela ovareliye essyani, mwaavareleka ninrimeenhu wooteene toko aPwiya woohikhala waatthu. ²⁴ N'tjuwelaka wiira munkowaakhela etthuvo yaaPwiya wayeele eri yawinhu. Ni Pwiya Yesu wa yoole nonvareleenhu nteko. ²⁵ Kontha wakhula n'motja nkoopanka tjoohissariya nkowaakhela otthuveliya nlattu woohissariya epankalyaawe, ni khuuvo owehaniya.