¹ Nhu akunha mwaavaheke anantekweenhu yooreerela ni yossariya, ntjuwelaka wiira tjitjon'mo n'haana aPwiya wiirimu. ² Nkhaleke nanlelo n'mavekeloni, n'wehawehaka nimiteko tjomahala. ³ N'vekeleke owakathi yooyo, tootho wahii, wiira Muluku anitthulele nkhora womoolumo, wowiira nuulumatjere essiiri tja Kristu, wayooyo tthukeliyaaka. ⁴ Ni n'vekeleke wowiira miivano kuulumeke ratta, toko tjinpheelaaka ovara. ⁵ Mweetteke nuutjuwelatja ohoolo waatthu akhanle ntuniyani, nvareke owakathi wooteene nuutjuwelatja. ⁶ Moolumweenhu ooteene akhaleke ootjivela, oolukiya maakha, wowiira ntjuwele omwaakhula wakhula n'motja. ⁷ Tiquico naahala wootjuwelihani tjitthu tjooteene wohissimaaka. Yena mun'na oofentiya, n'hooleli onfento nintthu niiwananyaa womiteko tjaaPwiya. ⁸ Mi kihonvahenra wookhuluvela wowiira nhu ntjuwele etthu en'niiraneela ni tjitjon'mo amaalihe mirimatjnhu. ⁹ Wamotja ni Onesimo, mun'na oofentiya ni owaamini. Ayenatja anaahala wootjuwelihani tjooteene tjnvariya. ¹⁰ Aristarco, npatthanyaaka onkalapoosso, nawoossenlihani, tjitjon'mo toko Marco muulupalyaawe Bernabe (wayooyo noovahani tjowiitthutja, wakhala wiira yena naawa wanhu, n'mwaakhenle). ¹¹ Ni Yesu, iihaniye tootho nassariya. Wo yaala yuulale pakhalale aniiwananaaka n'mitekoni womwene wa Muluku. Yaala phankhala ookimaaliha. ¹² Epafras, nanteko aKristu Yesu ni n'mwaanaleenhu elapo emotja, nawoossenlihani, awanaka ninhu n'mavekekloni, wowiira nkhale oomalela, otjaliya nuutthuna wa Muluku. ¹³ Maana kinamoona wiira yena naavara nteko woolipa wanhu, wayaale ooLaodiceia ni yaale ooHierapolis. ¹⁴ Lucas, namavoniha oofentiya, ni Demas, nawoossenlihani. ¹⁵ Mwaassenliheke assun'na ooLaodiceia, ni ninfa niikeretja eri owan'nhinhu. ¹⁶ Mwassomaka yowantikhiya, wiira tjitjon'mo essomiye ekeretja yaaLaodiceia, nssomeke nanlelo yowantikhiya yooLaodiceia. ¹⁷ N'mwiirele Arquipo: Okhale oviriyanaka womiteko tjaakhelalya waaPwiya, wowiira omalihere. ¹⁸ Esalaaman'nho tjon'matataniwaka, Paulo. Wuupuwele mikhoyitjaka. Mahala akhale ninhu.