¹ Kinpheela n'tjuwele wiira yootepa wuunuwa ekhotto en'hooleelaaka wanhu, wayaale oolaodiceia ni wa ooteene yaale ahinkitjuwela. ² Wowiira mirimatjinhu tjikhale tjoolipiheriya mwaha wootthukeliya, munfentoni, nimihakhu tjeekheeli mowiiweeha nuutjuwelatja wanteko waMuluku, ri Kristu. ³ Wa yooyo tjihovithiya mihakhu tjooteene tjootjuwelatja ni wowiiwelela. ⁴ Kinoohimeeryani tjon'mo wiira hikhale n'motja wanhu n'hala othepiya nimoolumo oohiloka. ⁵ Ni kinoohikhalaru ninhu mwiirutthuni, wala mun'nepani, kinaatteeliya mwaha wooweha olipawinhu mowaamini mwa Kristu. ⁶ Tjitjon'mo toko tjimwaakhelaleenhu Kristu, pwiya n'mweette Yena. ⁷ N'khale oolipa niyena owaaliya nuulipihatjiya, n'nari mowaamini, toko tjihimeeriyeenhu, ni mweettelaka miteko tjomahala. ⁸ Mwiiweheke wiira hikhale nopotthani nuutjuwelatjawawe nimiteko tjomahala, toko elamalelo yaatthu, wala erumeelo tjontuniyani, woohikhala ni Kristu. ⁹ Kontha wayena n'naakhala, mwiirutthuni, niikhalelo yooteene yaMuluku. ¹⁰ Ni wayooyo, n'ru wokuru nuuwerya, n'hokussatjya wooreerela. ¹¹ Eriyaryaawe, n'huulihatjiya tootho, woohikhala wuulihatjiya nimatata aapinaatamu yookumihiya mwiirutthuni, massi wuulihiya eriyari ya Kristu. ¹² Nhu n'vithiye niyena munpattissoni ni wa yooyo n'hunwenla mowaaminini mwa ekuru yamuluku, vuwenlale mwaatthu ookhwa. ¹³ Mwakhwakavale munthukumaneenhu ni mowuulani mowiirutthuniwinhu, hoovahani okumi, wamotja niyena, anilevenlaka tjoonhalatjihu tjooteene. ¹⁴ Yena heemessenra tjowantikhiya tjooteene tjowootheriya wahi nketteloniwaya. Yena hokumiha tjooteenen'nho, akhomelaka wanssalapani. ¹⁵ Yena haakwanhulatja ahooleli ovathi ni oowerya, ni ahaahiya watthuni entji, aatthemaka wanssalapani. ¹⁶ Phimaana khaavo noolamulani mwaha woolya wala owurya, wala nihuku nossukuhuulu, wala okhuma womweeri wala mwaha wonihuku nossaapatu. ¹⁷ Tjooteene n'nho ntthuutji wotjitthu tjoohoolo, massi ekhweeli Kristu. ¹⁸ Hikhale nootanhifuni, oothaka wiiyeviha nuukokhorela malaikha. Yaayo atthwaayo anoonyaa molohihiyani, muupuwelwaaya woottheka woottheka ohaakhaliha owiittottopa. ¹⁹ Ni khan'khaliherana n'muruni. N'ru yooyo erutthu yooteene, mwaha wookhala wamotja nuutakaneelatja, waakhela okhaviheriya ni wuunuwa woovahiya ni Muluku. ²⁰ Wahonya wiira n'khwatjale wamotja niKristu naatthu ontuniyani, kontha ninkhala toko otthuna wotuniya, toko: ²¹ N'hitheke, n'hittehattehe, n'haakwanhe? ²² Tjoohimiya tjooteene ni tjoossomihiya tjaatthu tjinuulumiya moorimeela tjinvareliyaaya. ²³ Ekettelon'nho tjihaana otjuwelatja, wiiyeviha woohikhala, nuukhalela niirutthu, massi khanafayita mootthunani mweerutthu.