¹ Saulo, amumulaka n'lelo anamova ni okhua na arumei a pwiya, ahorua n'paka wanamukutho, ² ni aholepela niwarakha wira aruee o sinagoga tjo Damasco, yowira, nanphuanhale n'thu ari yoo n'ttalooyo, athuke aruanaka o Jerusalem. ³ ettaka aruaakan'no, athamenlaka o Damasco, wowakuviatja ahona n'thuko wo wirimu wariaka, ⁴ ni, ahomorela vathi, hinwa ntju nimotja ni mwirelaka: "Saulo, Saulo, onkomolaniherani?". ⁵ Saulo ahakhula: "Tipani we, Pwiya?" a Pwiya ahira: "Mi Yesu, yoole we on'momolanihaa; ⁶ vano ovuwe okele n'pomamoo, ni anahimeria yophela opanka". ⁷ Alopuana yaruale ni Saulo yahokhala wohi nulumo, yinwaka ntjuu, ehimoonaka nthu. ⁸ Saulo ahovuwa vathi, wathukun'liawe mentho, khona ethu. Vano, ahovaren'lia moono ahowania o Damasco. ⁹ Mahuku mararo ahokhala wohoona, khaaliale ni khavuriale. ¹⁰ Ahavo n'rumei o Damasco ihaniaka Ananias. Ahirelia mui n'ttorani: "Ananias!" Ni yena hira: "Timivano, Pwiya"! ¹¹ A Pwiya yahomuirela: "Ovuwe, oruee eparapara mono welopuana, ni owan'nhawe Judas wankohe n'lopuana n'motja ihaniaka Saulo, n'lopuana o Tarso; yena navekela; ¹² ni, mun'ttorani, homona n'lopuana ihaniaka Ananias awaka an'taphulelaka n'tata yenani, avone wonawawe". ¹³ Ananias vano, ahakhula: "Pwiya, kinawiin'wa athu entji mwaha wawe yoo n'lopuanooyo, tjonanara tjipakaliawe wa athu orera n'rima o nJerusalem. ¹⁴ Yenani noorumia nanamukutho wira aathuka yaale anlompa Ntjinaninhu." ¹⁵ Vano, a Pwiya ahomuirela: "Oruwe, kontha oyoo Mi kinonthanla wira akusse N'tjinanaka wa malaponi ni mamwene, ni assaana o Israel; ¹⁶ kontha Mi kinanthonhihera tjinkela ohawa mwaha wa ntjinanaka". ¹⁷ Vano Ananias horua, ahokela npani, ahontaphulela n'tata, amwireka: "Muun'na Saulo, a Pwiya Yesu, okhuemenlale n'phironi wakhumaa, hokiruma, wira ohokolele woona ni otjariye ni N'nepa N'ttakattifu". ¹⁸ Wowakuviawene, ethu n'toko makahampa yahom'mora m'methoni wawe, ahohokolela woona; ahovuwa ni ahorua opattissiya; ¹⁹ aholha ni aholipiheriya. Ni ahokhala na rumei o Damasco mahuko meen'tji. ²⁰ Ahantja on'himiya Yesu n'sinagoga, iiraka Yena Muaana aa Muluku. ²¹ Yaale otene yamuinwa yahokhala owatjivela ni yiira: "Kahiyena yolola n'lopuana akuanhula wa yaale ya khuwela nen'no n'tjinan'noo? Ni wale vaa wira ayhuuke ni aruane wanamukutho?". ²² Saulo, iilipheraka, analaleia ni anamualikaniha ma Judeu yakhala o Damasco, alawihaka wira Yesu Criistu. ²³ Anaviraale mahuku mentji, ma Judeu yahuupuwela wiira emuiinve. ²⁴ Mupuweleloaya wahotjuwelia ni Saulo. Ayeena yanarua ohiyu nuu thaana apheelaka omuinva; ²⁵ vano arumeiaawe yahonkussa nuu hiu yahon'hela n'cestuni enviranaka watjulu muuru. ²⁶ Waphiyalaia o Jerusalem, Saulo ahophela otakaneela na rumei, oteene yanamoova, khayankupali wira nrumei. ²⁷ Barnabe, ankussaka, ahonkussa woo mapostolu; ahahimeria manan'na awonaliawe a Pwiya wakelawe, ni an'himeraliaya, n'toko o Damasco anaalalia wohoova n'tjina na Yesu. ²⁸ Ari na Yeena o Jerusalem, akelaka ni akhumaka, ulumaka wohoova mwntjina na Pwiya Yesu ²⁹ ni ulumaaka ni helenistas; vano ayena yanamananiha omuinva. ³⁰ Vano assun'nale watjuwenliayan ahowaniya n'paka o Cesarea e ni ahorumia o Tarso. ³¹ Tjoo, ekapela, o Judeia, Galileia ni o Samaria, yahana n'rettele ni yahotekiya, ettaka ephiro ya pwiya nu maalihiya ni N'neepa N'ttakattifu; athuaayo yeera yintjenriaka. ³² Vano, Pedro, ettaka n'ttethe wotene, ahophiya n'paka epooma yo Lida aruaka owotola athu An'luku. ³³ Yahon'phuanha vavale n'lopuana ihaniaka Eneias, akhala orupathi miakha naane, anowun'takia. ³⁴ Pedro hiira: "Eneias, Yesu Cristu ovonihe. Ovuwe okusee n'koriooyo". Wowakuviawene ahovuwa. ³⁵ Vano, otene yakhala o Lidia ni o Sarona, amoonaka n'lopuanoole, yahivaherera wa Pwiya. ³⁶ Ahavo o Jope nrumei ihaniya Tapita, nintaphulelia tjoo "Dorcas". yoola nthianola miteko tjomana ni anawonela ekiriri amassikhini. ³⁷ Yaale mahikuale ahoweren'ya n'paka okhua. Owakathi onkussaliaya, yomuin'nhaathi e kuartu yontjulu. ³⁸ O Lida waari wakhiviru no Jopen ni arumei yahin'wa wira Pedro arri wonwo, yahorumiya arumei eeli, anlepelaka: "Awe wohipitja". ³⁹ Pedro ahovuwa ahorua na yena. waphiyaliawe, ahokussiya o kuartun'we. minan'khueli tjotene yari wakgiviru wa yerna yunlaka, anthonhiheraka ekuwotjaia Dorcas tjapankawe wariawe na yena. ⁴⁰ Pedro aharuma okhuma khuma otene o kuarun'we, ahokokhora ni ahovekela. ni, ahomuattamenla eruthuawe, ahira: "Tapita, ovuwe". Yena ahothukula men'tho, amonaka Pedro, ahon'koma. ⁴¹ Pedro, an'vaha n'tata, ahon'vussa, ni, awihanaka makristau ni minan'kueli, ahathonhera n'kumi. ⁴² Yola muahoola wahotjuwelia o Jope wotene, athu en'tji yahathuna a Pwiya. ⁴³ Pedro hokhala mahuku men'tji o Jope, ni n'lopuana ihaniaka Simao, otjivatjiviya.