¹ Saulo ahonen'la okhwawawe. Vano vavale nen'ne nihukun'ne wahantjeria womolanihiya ekeretja yari o Jerusalem; ni amwamini otene yahovavariela n'ttethe wo Judeia ni o Samaria, wahiya arumei. ² Alopwana okiriri yahorwa on'sikha Estevao ni wahottononeliya tjinene. ³ Massi Saulo anawomolanihatjinnene ekeretja; ni anakela enupa ni nupa, anawapurulela ota alopwana na thiyana, ni anawakussa wira athukele. ⁴ Amwamini ya vavariale, yanalaleya nulumo. ⁵ Filipe ahokhuruwela epoma yo Samaria ni ahahimeria Cristu. ⁶ Vano athuaale winwaliaya ni wonaliaya ethonhero Filipe tjapan'kawe, yanaviriyana yele yahimiawe. Vano, minepa tjotakhalan'nhe tjanawakhuma ⁷ athu entji ekhuwelaka ni ntju nowinwania; ni athu ohetta ni owuntakia yahovonihiya. ⁸ Wahokhala otteliya epomele. ⁹ Massi ahavo nlopwana m'motja epomele ihaniyaka Simao, khalaiva ari nanhanka ni awatutussa athu o Samaria, watjuwen'liawe wira yena ari nthu ofaita. ¹⁰ A Samariyale, okhuma yankani n'paka yulipale, yanaviriyanessa; ayena: "Nlopwanoola phiyole nihaniya Ekuru Thulupale tja Muluku. ¹¹ Yananviriyana kontha anowatutussera niithu emotja ni mitekotjawe tjo nhan'ka. ¹² Vano, yahokupali wira Filipe analaleiya ehapari yonanano wo mwene wa Muluku ni n'tjina na Yesu Cristu, yahopattissiya vavale alopwana na thiyana. ¹³ Simao ahothuna napattissiyene, ahokhala ni Filipe. Wonaliawe ethonhero ni kuru tjipakiya ni wahontjivela. ¹⁴ Winwaliaya arumei yari o Jerusalem, wira O Samaria ahakhen'la nulumo na Muluku, yahoruaneliya Pedro ni Joao. ¹⁵ Yayo, wakhuruwen'liaya, yahassualela, wira yakhenle N'nepa N'ttakattifu. ¹⁶ M'paka yole owakathiule, N'nepa N'ttakattifu wari winaya wakhuruwela; ayena yapattissiye mwa ntjina na Pwiya Yesu. ¹⁷ Vano Pedro ni Joao yahessenriya matata, nayena yahakhen'la N'nepa N'ttakattifu. ¹⁸ Wonaliawe Simao wira N'nepa N'ttakattifu yavahatjiye nu wataleliya matata a rumei, havaha n'surukhu. ¹⁹ Yena hira: "N'kivahe yeyo ekuruiiyo, wira yole n'halaka omwatalela n'tatanaka, akhenle N'nepa N'ttakattifu". ²⁰ Massi Pedro howirela: "We orimele ni n'surukhuoyo, kontha onupuwela okhala evaheriyo ya Muluku ni n'surukhu. ²¹ We khunam'phantti wa yola n'tekola, n'rimooyo khuri worera ni Muluku. ²² Vano, wituthuwe tjo nhalatja, ni walepele a Pwiya wira yoleven'le wa yele waphela n'rimoyo. ²³ Kinawona wira ori otjaria ni tampi". ²⁴ Simao hakhula ni hira: "N'kivekelele mea lepelaka a Pwiya, wira ehiranie yele emphela okikhumela". ²⁵ Ayena, nakhalen'le ossahiti ni yulumaka nulumo na Pwiya, Pedro ni joao yahohokolelatja o Jerusalem, elliaka ehapari mitjoko tjin'tji tja na samaritano ²⁶ Vano, n'laikha na Pwiya nihomwirela Filipe ni nihera: "Ovuwe ni orwe wakusse n'ttala onkhuruwela o Jerusalem orwaka o Gaza". (Yeyo eparapareeio eri muthakoni.) ²⁷ Yena hovuwa ni horwa. Ni homona n'lopwaana o wetiopia, ohuniya n'holelio Candace, apwiyamwene an'netiope, yanopakhiriya ni mihakhutjaiyan'nhe, yawa o Jerusalem wira ayikokhore. ²⁸ Yanahokolya ni, anonkomale n'carruageniwayan'mwe, ahantja onsoma Isaias. ²⁹ N'nepa wahon'himeria Filipe: "Orwe wattame'le ecarruage". ³⁰ Vano, Filipe ahothiawa npaka wenwe ni homwin'wa anssomaka Isaias, nim hira: "on'ninwa enssomeeio?". ³¹ Etiope ahakhula: "Tjani vava, wohikhala n'thu okettihera?" Yena honlepela Filipe wira awele n'carruagenim'mwe ni on'kome ni yena. ³² N'sitari yo wantikhiya etiopioole wassomawe: "Yena ahokussiya ntoko epwittipwithi eruaka win'viya, ni, n'toko ekhon'twaa enari nuule norattela, yari yomalene ni khayahulale malakuaya. ³³ Nu wiyevihawaya yahokumihiya essariya; tipani n'hala ohimeria nikhotoninhu? Kon'tha Ekumiaya ehokumihiya va tuniyani". ³⁴ Vano, ohunioole honkoha Filipe ni ahira: "kinawulepela, profetani onomulumaa? Weyova, wala n'thu n'khuawe?". ³⁵ Filipe ahantjera wuluma ni, akussaka yoyo n'sitariuuyo tjo wantikhiy, ahon'lalera Yesu. ³⁶ Nan'lelo yettakan'no ni parapaara, yahophiya ni puro nari matji ohuniole ahira: "N'kaweha, ahavo matji va; enkikikkhitjera essiani yira kipattissiye?" ³⁷ ---. ³⁸ Vano, etiopioole ahoruma wemessiya n'kukutta, oyeliwaya yahokhuruwelatja n'matjini ni Filipe ahom'pattissa. ³⁹ Wakhumaliaya m'matjinin N'nepa wa Pwiya wahonkussa Filipe, ohunioole khamonaletho, ahohokolela ekwahawele nu tteliya. ⁴⁰ Massi Filipe iphwanhale wa Azoto ni, analaleia ehapari epoma tjotene, m'paka wa phiyaliaya o Cesarea.