¹ Namukutho mulupale ahokoha: "Tjen'nha tjithun'nha tjeekhueli?" ² Estevao hira: "Assun'naka ni an'npapa, n'kiwe: Warya wa Muluku hakhumeen'la apapeehu Abraao owakathi wariaya o Mesopotamia, ahinaya okhala o Hara." ³ Ni yahireliya : "Ohiye elapoaa ni nassimutjiya, ni orwe elapo en'halaka Wuthonhihera". ⁴ Vano Abraao ahohiya ethaia o caldeus wira akhale o Hara. wonwo, anakhuale apapawe, Muluku ahaviriha yeela ethayeela enkhaleen'nhuiila. ⁵ Yena khavahale erissikhi, wala nipuro nohela n'nhaa, ahakhuluveliha wira nahala wavaha ethayeele ni nikhotonawe, Abraao wariawe hinan'puanha muana. ⁶ Muluku ahomulumana wo manan'na yaala: Kontha nikhotonawe yahala okhala owakathi vakani ethaya yoorua, yahalaaya okhalihiya epotha ni ehuvihiyaka miakha eminha tjesse. ⁷ Hira Muluku: "Kinahala ohukhumu elapo nin'halaya okhala epotha. Ni, envirale iyo, anahala owa ni anahala okikokhoreela nipuro nen'na". ⁸ Vano, havaha watana wo wulihiya, ni Abraao hokhala papawe Isaque ni homuliha nihuku nona naane. Isaque ari papawe Jaco, ni Jaco ari papa omakhoto kumi neeli. ⁹ Assulupale yahana ehatje ahin'phelaka Jose yahatumihera an'na Egito, massi Muluku ari ni yoyo, ¹⁰ ni ahon'thukulua ni mahuvihoawe, an'vahaka ehathuwa ni otjuwelatja eriyari ya Farao, m'pewe oo Egito. Farao ahompan'ka n'holeli o Egito ni nupawe. ¹¹ Yahavo, vano, etala Egito otene nu Canaa, wahokhumenla mahuviho mulupale ni an'napapeehu khayaphuanha eyolha. ¹² Vano Jaco ahin'wa wiriaka Egito yahavo eyolha, aharuma wopatjera, an'napapeehu okhalai. ¹³ Ekuaha yoo na pili, Jose ahithonhihera nassun'nawe, nipuro nakhumawe ahohimeria Farao. ¹⁴ Jose aharuma assun'nawe ahokolosseraka owani wira yan'himerie Jaco, apapawe, wira awe Egito, n'khai na asssimutjawe ootene, tjoo, sapini na thanu athueene. ¹⁵ Tjoo, Jaco ahorwa Egito, ahokwela wen'we hata nan'na papeehu okhalai. ¹⁶ Yahokussia o Siquem ni ossikhiya mahiye Abraao ya thumaliawe ni n'surukhu, wa assana a Emor, o Siquem. ¹⁷ Yahattamen'la owakathi yo wirania elhuluvelihiyo Muluku yapankaliawe ni Abraao; athuale yahintjiva ni ya hun'nuwa we Egito, ¹⁸ n'paka ovuwen'la n'we mwene n'khuawe, ahatjuwela ethu mwaha wa Jose. ¹⁹ Yooyo mweneooyo ahathepia athuehu ni ahahuviha an'napapehu okhalai, akhanhen'rihaka wariha assanaya, wira ahikhale akumi. ²⁰ Yoyo owakathiuyo, Ahoyaria Moises. Yena aari orera eriari ya Muluku, ni ahamwihiya mweri miraru enupa yan'napapawe. ²¹ Vano warihiawe, mwana a Farao ahonkussa ni an'khalihaka n'toko mwana. ²² Moises ahossomihiya otjuwelatja wotene wo wegipto; ni ari tho kuru ni mulumoawe ni miteko. ²³ Warinawe mwakha arupani, ahophela owootola assihimawe, assana o wisrael. ²⁴ Amoonaka israelita ahuvihiyaka, Moises ahomwakiha ni ahivitha ni ahomwiva egiociule. ²⁵ Akhaliha n'toko assun'naweaayo yanatjuwela wira Muluku anahala wathukula ni matatawe, ayena khayatjuwelenle. ²⁶ nihuku nikhuawe, ahowattameen'la an'na israelita awanihanaka ahophela owakiha, iraka: "Alopwana, n'nohuvihaneelani, n'nari amutjiru?" ²⁷ Vano, an'huviha mwattamanoawoole ahonkakha, iraka: "Opankale n'khulupaleehu wee tipani? ²⁸ N'phela okinva n'toko tjimwinvalia egipcio ntjana?" ²⁹ Winwaliawe yeele, Moises ahothiawa. ahokhala nan'wa ethaya yoo Midia, wayaraliawe assana eeli. ³⁰ Waviraliaya mwakha arupaini, nahon'weela n'laikha mu thakoni mwaako wo Sinai, muin'rini opharela mooro. ³¹ Moises wonaliawe mooro, yahontjivela yele yoniheriawe, aphelawe wattamenla wira oone, nahinwiya ntjuu na Pwiya, niiraka: ³² "Mi Muluku an'napapaa, Abraao, Isaque ni a Jaco". Moises ahova ni khathunaale oweha. ³³ A Pwiya ahira: "Orule makupassaayo, nipuro oriaan'no ethaya yettakattifu. ³⁴ Mi kueli kin'noona mahuviho a athuaka ari Egito. kin'niwa okhuwelawaya ni kinakhurua wira kathukule; owe phiyaru ni Mi kinawuruma Egito". ³⁵ Oola thi Moises, wankhottaliaa wiraka: "Tipani opankale n'khulupalehu?", ula Muluku phinrumale n'toko pwiya ni namathukula, ni n'tata nan'laikha nan'khumenlale o Sarca. ³⁶ Moises hakumiha Wegito napankale mitikiniho ni mithonhero epahari yocheria ni muthakoni, mwakha arupaini. ³⁷ Phi Moises ahimeriaale athu Owisrael: "Muluku nahala on'vussa profeta eriariwinhu ni Wassun'naa, profeta n'toko mi." ³⁸ Yola phari mwinthukumanoni ni muthakoni, ni n'laikha namulumana omwako Sinai, nan'napapeehu okhalai, akhenlale nulumo ne ekumi wira anihimerie. ³⁹ Phi nlopwa yola an'napapehu akhotaliaya omwin'welela; ahinaya yahonkhotta, mirimatjaia tja hohokolela Egito. ⁴⁰ Yole owakathiule ahirelia Arao: "Onipankele amulukuehu anhala onettihera. Vano Moises, nikumihale ethaya yo Egito, khanintjuela ethu enkhumenlale yena". ⁴¹ Yale mahukuaale, ahopankiya ttontto onama ni ahokokhorelia ttonttoole, attelia ni miteko tjom'matataniwaya. ⁴² Muluku ahahiya, n'toko tjantikhiya elivuru yo ma profeta: "Mokikokhorela mahuku arupaini muthakoni, enupa tja Israel? ⁴³ Nhuva n'hothuna etabernaculu ya Moloque ni thontto ya muluku Refa, ni natarato epankalen'nhu wira n'kokhorele: "Mi kinaukussani ottai, n'paka o Babilonia." ⁴⁴ An'napapehu okhalai yahana Etenda nassunkiya nivuku no namona, ntoko yena tjahimaliawe, an'himeriaka Moises, wira apanke ntoko tjanthonhiheraliawe. ⁴⁵ Ayena yahakhenliya Etenda nan'napapeehu, ayena yahokussa ni Josue wira yakhale ethaya Muluku yawomolaliawe eriyari yan'napapeehu, mpaka mahuku a Davi; ⁴⁶ Yole athanliye ni Muluku, ni ahonlepela wira aphwanhe etenda wa Muluku a Jaco. ⁴⁷ Salomao hoteka enupa ya Muluku. ⁴⁸ Muluku khankhala enupa yopankiya ni matata apinatamu, n'toko tjihimaliawe profeta: ⁴⁹ "Erimu ehitjeayaaka, ethaiyeyo phiri eparapara tjo Metto tjaaka. Enupani yophela nhu okitekela, ahira a pwiya; wala nipuroni nophela Mi omumula? ⁵⁰ N'tatanaka kanipankale tjithu tjotene?". ⁵¹ Nhu, athu olipiha n'rima ni ohulihiya wa n'rimani ni owinwiya, n'nakhota N'neepa Nttakattifu; nhu n'notjatja n'toko an'napapeen'nhu okhalai. ⁵² Maprofeta taavi an''napapeenhu okhalai ahiwomolanihaliaya? Ayena ahowinva Maprofeta yawale hinathi owa na chariya; ni nhu n'hokhala anamatumiha ni anan'nhatha; ⁵³ nhu, athu mwakhen'lale ekettelo wo himeria ni malaikha, ni khan'sukale". ⁵⁴ Vano, winwaliaya n'nhe tjithun'nhe, wahaweria n'rima ni yiira ekhuraka men'no ahinphelaka Estevao. ⁵⁵ Massi yena, narieene otjariya ni N'neepa N'ttakattifu, ahoweheha wirimu ahona oweria wa Muluku, ni Yesu, nemelale, moono won'lopwana wa Muluku. ⁵⁶ Estevao hira: "Wehani, kinawona erimu yohulia, ni Mwana a N'thu nemelale moono won'lopwana wa Muluku". ⁵⁷ Vano, ayena yahonhakula ni ntju nowin'wania, yahottiyelatja marruaya ni yahin'wanana otene ahinphelaka yena; ⁵⁸ yahonrihela otawaya epoma ni yahon'homakatja; yale yakhalen'lale vavale yahorula ekuwotjaya ahonhiyeratja mwavano n'motja ihaniaka Saulo. ⁵⁹ An'homakatjakaan'no Estevao, yena an'lepelaka Pwiya iira: "Pwiya Yesu, mwakhen'le n'nepaaka". ⁶⁰ Yena ahokokhora ni ahokhuwela ni ntju nowinwania: "Pwiya, n'hakhaliheethu athu an'pakatja etampiila". Wahimaliawe nulumo'ne, ahokhua.