¹ Yale mahukuaale, arumeyi yeera yintjeraniaka, yahan'tjera ukassari ma Judeu ye eluka grega ehithunaka eluka hebraica, kon'tha minan'khueliaaya yanaliyaliya yii kawiyaka eyolia. ² Oo khumi neeli, yahowihana athu oteene aarun'mwe ni yahowirela: "Khunreera wira hi nihiye nulumo naa Muluku wira nathenkatje meetja. ³ Thimana, assun'na, kihathanla alpuana saapa eriyarin'nhu omakhalelo oreera, otjariia n'neepa wo wutjuwelatja, yayo pin'hala ovahatjeria ntekoola. ⁴ Vano hii, nin'kowivaherera n'maa vekeloni ni n'nulumoni". ⁵ Muaha yiolee wahatjivela athu yaale. vano ayeena yahonthala Estevao, n'lopuana otjariia ni n'nepa n'ttakattifu, Filipe, Procoro, nicanor, parmenas, ni Nicolau, proselitos owantiokia. ⁶ Ni yahithonheratja eriari yo maapostolo, yavekelale ni yavaraka ni matata awessereriaka yaale. ⁷ Tjoo, Nulumo na Muluku nahovavaria, ni arumei yahintjereria o Jerusalem ni anamukutho entji yahokhala owinwelela nu wamiini. ⁸ Ni Estevao, otjaria mahala ni kurru, anapanka miriria ni mithonhero tjulupale eriari yaa athu. ⁹ Yahokhumenla akhuawe yari o sinagoga othukulia ni ocirineu ni malexandrinos, ni yaale yaari oo Cilicia ni Asia. aala athuala yera ewanaka ni Estevao. ¹⁰ Wanari tjon'mo, khayakhuitinri okhotta otjuwelatja ni n'nepa yoole yeena wulumaawe. ¹¹ Vano yahanholiha athu wira ettonke: "Nihomuinwa Estevao amulumaka onhala Moises ni Muluku". ¹² Yakhanhen'rihaka athu, mahumu, anamalepa ekano, ni, nun'kohakoha, yahon'kussa othikini wo ma Judeu. ¹³ Yahomotheriatja yahira: "Oola n'lopuanoola khan'hiya wuluma nulumo novanhiha nipuro nettakattifu ni kettelo. ¹⁴ Kon'tha ninamwin'wa iraka wira Yesu o nazare nahala okuanhula nen'no nipuroon'no ni naahala opittikula elamalelo Moises tjinivahaliawe". ¹⁵ Vano othene yon'komale o sinedrio yahon'mweheha n'methoni wawe, ekhalaka n'toko ekhove yon'laikha