¹ Okathi Pedro ni Joao wulumaya na athu, anamukutho, n'holeli on'tempulu ni ma Saduceu, yahowattamen'la ² orussiyene, kon'tha Pedro ni Joao yanawassomiha athu mwaha wa Yesu, alaleaka ovuwen'lawawe n'hina mwa nookhua. ³ Vano, yahathuka ni yahahela n'kalaposso n'paka nihuku nikhuawe, wari oyhana. ⁴ Tjitjam'mo, athu entji yinwale nulumo yahothuna; wattamela athuene ekonto thanu. ⁵ wahirania, nihuku nikhuawe, aholeliayaale, mahumo anamalepa ekanoyahothukumana o Jerusalem. ⁶ Anas, namukutho mulupale, Caifas, Joao, Alexandre, ni otene yari muimpwinkoni wanamukutho. ⁷ Waheliyawe Pedro ni Joao eriari ya waia, yahon'koha: "Ekuruni ni n'tjinani n'nopakanen'nhu n'nha?" ⁸ Vano, Pedro, otjaria N'neepa Nttakattifu, howirela: "Nhu, akhulupale athu, ⁹ mahumu, hii, nen'no nihukun'no, ninakohakohiya mwaha wa ethu yorera epankiye wanlopuana n'motja oweren'ya, wo manan'na avonihiyawe. ¹⁰ Ehana etjiuweliaka ni nhenhuuva ni athu otene o Israel, mwa ntjina na Yesu Cristu o Nazare, yole nhu muinkhomelalen'nhuni yole nvussale Muluku n'nokhuani, n'lattu wa Yooyo n'lopuanoola hovona eriariwinhu. ¹¹ Yesu cristu phi nluku owuvikanani nhu, n'toko anamateka, n'nontanhifu, apankiye nluku nolipa. ¹² Khuvo wopua wa nkinaku; kontha khanivo ntjina nikhuawe vathi erimu, avahiye apinatamu, wira mwaha wa yoyo nopoliye. ¹³ Wanaliaya ulumatja wa Pedro ni Joao ya hotjuwela wira yari athu ohissoma, yahotjivelia; yahotjuwela wira Pedro ni Joao nahokhala ni Yesu. ¹⁴ Ni, wanaliaya nari na yena n'lopuana avonihiye, khayona yohimia yo vanhiha. ¹⁵ Anereliye arumei okhuma mun'thukumanoni, yahulutja yayoru, ¹⁶ yiraka: "Naahala wapan'kani hi alopwanaala? Kon'tha n'thonhero worerawapankiye ni yayo, enatjuwelia nathu otene ankhalao Jerusalem, ni hi nihikhotte yeyo. ¹⁷ Massi, wira ehittonkiye nathuala, nahimeriye wira ahimulumeletho n'thu n'tjinan'no". ¹⁸ Ayena ahomuihana Pedro ni Joao ahahimeriya wira ahulumetho, wala ehisomihetho, n'tjina na Yesu. ¹⁹ Pedro ni Joao yahakhula yiraka: "Essariya, eriyari ya Muluku, Ohiya omwin'welela Yena ni win'weleleni nhu. ²⁰ Kon'tha hi khanin'hala omaala ohimiya mwaha wa tjithu tjonalehu ni tjin'walehu". ²¹ Ni, opopihiyaka Pedro ni Joao, yahohin'ya orwatja. Ayena khayonale ethu yophela wattarussa, kontha athu otene yanan'ttithimiha Muluku yeele yiraniaale. ²² N'lopwana avonihiye ahana muakha arupaini. ²³ Anathukuliyene, Pedro ni Joao yahoruatja owan'nhaya yahohimia tjotene anamukutho ni mahumu yawiren'liaya. ²⁴ Win'waliaya n'nha, yahon'khuwela Muluku ni n'tju nowin'wania yiraka: "Pwiya, thi nhu m'pan'kale erimu, ethaiya, ni pahari, ni tjithu tjotene tjirivo, ²⁵ Nhu, ni N'nepa N'ttakattifu, ni malaku apapehu Davi, nan'tekoen'nhu, n'hira: "kontha elapo tja malapo tji horwa, ni athuayo anupuwela tjithu tjohikhala? ²⁶ Ma pewe onlaponi yahothukumana, ni aholeli yahothukuma ahinthunaka Pwiya ni yole n'thanlalenhu". ²⁷ Vano, Herodes ni Poncio Pilatos, n'khayi na malapo ni athu o Israel, athukumanale epoma yela ahinphelaka nantekoen'nhu, Yesu, Nhu yole n'thalalen'nhu. ²⁸ Ayena ahothukumana wira epanke tjotene n'nhe ntataninhu tjaphelaliaya opanka nankhalayiiru. ²⁹ Vano, Pwiya, mwawehe wopopihawaya ni muavahe Anan'tekoen'nhu ehimie nulumoninhu wo hoova. ³⁰ N'taphulelaka n'tataninhu wira evone, wo wira npanke mithonhero ni miririya mwa n'tjina na Yesu". ³¹ Wamalihaliya ovekela, nipuro nariya na hotathiya, ni otene yahokhala otjaria ni N'nepa N'ttakattifu, yera elaliyaka Nulumo na Muluku ni kuru. ³² Athu ya thunale yaritji n'rima m'motja ni rooho, khavo ira n'nha tjithutjaka; ohieeyo, tjithun'nhe yarina vamotja. ³³ Ni kuru tjulupale, arumei yanaliliya enamona mwaha wo vuwenla a Pwiya Yesu, ni mahala yari na yeena. ³⁴ Kharivo n'thu eriyariyaaya aphela ethu, kon'tha yale yarina ekarumatjaya wala enupa, yanatumiha ni yanawana nsurukhu watumihaliaya ³⁵ yanahiya va mettoni wa rumei. Ni anakaweliya wa kuta n'thu, wa yele yaphelawe. ³⁶ Jose, oo Levita, oyareliya o Chipre, yole avahiye n'tjina na Barnabe na rumei, thi tjo, mwana omaliha. ³⁷ Narina ekarumatjawe, hotumiha ni owana n'surukhu ni ahohiya va mettoni wa rumei.