¹ Enaviraleeyo yena aahokhuma waatenas, arwaaka Okorinto. ² Aahonpwanha n'judeu n'motja, ntjinanawe Aquila, aakhala Oponto, aawaale wiitalia, ni Priscila, amwaarawe yaahowa npaka waaritjaaya. ³ Kontha yaavaratja etthu emotja, aahohala naayenatja,ni aanovara nteko; Kontha yaahaana nteko woopanka etenta. ⁴ Ni yena aanawuuluma nkapela khula saapatu; Aakhanhenraka majudeu nimagregu. ⁵ Silas ni Temoteo wakhuruwatjalyaaya Omacedonia, n'nepa waahon'khanhenra Paulo, an'vahaka namoona waamajudeu wiira kristu aari yesu. ⁶ Anontanhifuru, yena hotatha ekuwo, ni aahowiirelatja: Ephomeenhu ekhale n'muruniwinhu; Mi kiri ooreera; Ni okhuma nen'navaa kin'hala orwaa waamalapo. ⁷ Nakhumale, aahorwaa wa Tito nassariya, an'varela nteko muluku, ni enupaawe yaahaattamana ekapela. ⁸ Ni Crispo, n'hooleli okapela, aahowaamini apwiya niinupaawe yooteene; Naacorintio entji, aniiwale, yaahaamini ni yaahopattissiya. ⁹ Paulo aaholohihiya ohiyu naapwiya: Ohoove, massi wuulume, ni ohimaale. ¹⁰ Kontha miivano kiri niwe, ni khaavo ntthu n'hala oweessenra ntata oopankaka yootakhala, kontha mi kihaana atthu entji epoomeela. ¹¹ Yena aahohala vale mwaakha n'motja nimyeeri ssita, assomihaka nuulumo namuluku. ¹² Galio n'hooleli o Acaia, majudeu yyahun'wa woomwaamini Paulo, ni yaahon'hokoleelihatja okhattya. ¹³ Yiiraka: Nawaakhottiha atthu wiira amweettele muluku niikettelo. ¹⁴ Paulo apheelaka wuulumatja, Gaio aahowiirela majudeu: Onapankale yootakhala wala yowoopiha, majudeu, niissariya kaanawoovilelani. ¹⁵ Massi wakhalaka wiira mwaha womoolumo, nimatjina, ni kettelo tjirinatjeenhu, mwiitjoone yaayoru; Kontha wotjitthu tjen'nha akintthuna okhala namaphuka. ¹⁶ Ni yena aahaakumiha okhattyaa. ¹⁷ Massi magrego, arwaaka wa Sostenes, n'hooleli okapela, yaahon'ralihatja nkhattyaa, ni Gaio wotjitthu jen'nhe khiivo yaakhalihalyaawe ettiitthu. ¹⁸ Paulo, wahallyaawe mahuku mentji, aahaalwha assun'nawe, ni aahorwaa Ossiiria, ni yaaritji nkhayi niyena Priscila ni Aquila; Nacassale ekharari Ocencreia, kontha aahopanka tjoothnla. ¹⁹ Ni aahophiya wa Efeso, niwaahiyatja vaavaa, massi yena, nari nkapela, uuluma nimajudeu. ²⁰ Ni yena anlepelaka wiira akhale naayenatja owakathi vakaani, yena khaatthunale. ²¹ Vano aahaaleehatja, iiraka: Ekwaha ekhwaawe, muluku atthunavale, kinaawa. Ni yena aahokhuma weefeso. ²² Nawaale Ocesareia, aahowela, ni aahossenliha ekeretja, aahorwaa wantiookiya. ²³ Navirale owakathi vakaani, aahokhuma, aviraka moorikarika elapo yoo Galacia ni Frigia, aawehaka arumeyi ooteene. ²⁴ Ni aahophiya weefeso njudeu n'motja, ntjinanawe Apolo, aakhala elapo iihaniya Alexandria, nlopwana ootjuwela wuulumatja, niwantikha. ²⁵ Ni yena aafuttihiye naapwiya; Oolipa mun'nepani, aanawuuluma ni aanaassomiha tjitthu tjaapwiya; Wiiraawe atjuwelaka mpattisso wajoao paassi. ²⁶ Ni aahan'tja wuuluma iiwiyaka nkapela; Aquila ni Priscila, wiiwatjaaya, yaahon'kussatja, yaahonlakihera tjiri oratta ephiro ya muluku. ²⁷ Ni yena apheelaka ovira wa Acaia, assun'nawe yaahon'lipihera, ni arumeyi yaahantikha wiira amwaakhenle; Yooyo, naphiyale, aahaalipihera ventji yaale yaarina waamini womahala. ²⁸ Kontha yena aanaattehatteha waatthuni ottheka wo majudeu, athoonheraka tjowantikhiya wiira yesu kristu.