¹ Okawanyaatjawaya anamikhora wamakoraita, Meselemias mwaana a Core, assaana a Asafe. ² Assaana a Meselemias: Zacarias owantjeriya, Jediael onayeeli, Zebadias oneeraru, Jatniel oneetjesse. ³ Elao oneethanu, Joana onasiita, Elioenai onasaapa. ⁴ Assaanaawe Obede-Edom: Semaias owantjeriya, Jozabade onayeeli, Joabe oneeraru, oneetjesse Sacar, oneethanu Natanael. ⁵ Onasiita Amiel, onasaapa Issacar, onakhentta Pauletai kontha muluku aahonreeriha Obede-Edom. ⁶ Tootho mwaamwanawe Semaias aahaayara assaana yaahoolela enupa yan'nathumwanaya, kontha yaari atthu ookhuluveliya. ⁷ Assaana a Semaias: Onti, Rafael, Obede, Elzabade naasun'nawe alopwana oolipiheriya tjitjon'mo Eliu ni Semaquias. ⁸ Assaana ooteene a Obede-Edom naasun'naya alopwana oophwanela ni oolipa n'mitekoni, sapiini neeli a Obede-Edom. ⁹ Ni assaana a Meselemias naasun'nawe khuumi nakhentta alopwana oothanliya. ¹⁰ Hosa, assaana a owantja Sinri. ¹¹ Owaakulela Hilquias, oneeraru Tebalias, oneetjesse Zacarias. Hosa assaanaawe ooteene yaari khuumi naararu. ¹² Wavirenle yaala ooteene yaahokawanihatjiya anamikhora woovirikana naakhulupale yaakhalenla naasun'nawe, wiira an'varele nteko Pwiya. ¹³ Ni yaahoriha eparakha yankaani niyuulupale n'matthokoni wan'nathumwanaya wakhula nkhora. ¹⁴ Ni yaahomorela eparakha wa Selemias. Ni wa Zacarias mwaamwanawe, namalakalaka owiiweehiya, yaahoriha eparakha ni eparakhaaya yaarwaale opuro nkhwaawe. ¹⁵ Ni mwaha wa Obede-Edom nphantte nkhwaawe, ni mwaha waasaanaawe, enupa yoosunkatjiya. ¹⁶ Mwaha wa Supim ni Hosa nphantte nkhwaawe ninkhora wa Salequete munttalani woowelela mayookhalenla ni mayookhalenla. ¹⁷ Onkhuma ntjuwa malevita siita, onkela ntjuwa atjesse othana tjitjon'mo nphantte nkhwaawe atjesse othana ni enupa tjoosunkatjiya eeli eeli. ¹⁸ Yowoona n'mamyaapuni tjonphantta nkhwaawe atjesse mun'ttalani ni eeli nphantte nkhwaawe. ¹⁹ N'no waari okawanihatjiya waanamikhora, assaana omakoraita naasaana a Merari. ²⁰ Malevita yaayo, Aias aahaana nritta tjoosunkatja npaani wa muluku ni woosunkatja tjitthu tjoottakattifihiya. ²¹ Assaana a Lada ni Gerson ahooleli aamutji a Lada yaari Gerson ni Jeieli. ²² Assaana a Jeieli: Zeta ni Joel mwaamun'nawe yaahaana nritta woosunkatja npaani wa muluku. ²³ Mwaha wanramita waizarita mahibronita ni mauzielita. ²⁴ Sebuel mwaana a Gerson, mwaana a Moises aari nkhulupale aanamasunkatja. ²⁵ Wonuulumo namwaamun'nawe Eliezer mwaamwanawe aari Reabias, mwaamwanawe aari Jesaias, mwaana a Jorao, mwaana Zicri yooyo aari mwaana a Selomote. ²⁶ Selomote naasun'nawe yaahaanatja miritta mooteene mwaassunkatjiya tjitthu tjoottakattifihiya, tjaareerihalyaawe mwene Davi ni mahooleli omwiimutjini ni mahooleli aatthu ekonto ekontotjene ni mahooleli aanakhotto. ²⁷ Tjen'nho tjaareerihiye nkhottoni wiira ewehawehiye enupa ya Pwiya. ²⁸ Tjitjon'mo tjitthu tjooteene tjaareerihale Samuel ni Saul mwaana a Quis ni Abner mwaana a Ner ni Joabe mwaana a Zeruia ni yooteene wakhula ntthu yaareerihaawe yaari n'matatani wa Selomote ni waasun'nawe. ²⁹ Wa maizarita, maquenania naassaanaawe yaari akhulupale ni anassariya wiisrael n'mitekoni tjoota. ³⁰ Mahebronita, mahasabia naasun'nawe alopwana entji, ekonto emotja niimiya saapa yaahohoolela wiisrael wonphantte nkhwaawe wojordao wonteko wooteene wa Pwiya ninteko wa mwene. ³¹ Mahebronita, Jerias aari nkhulupale waatthu yaayo yuntanihatjiye moomutjiniwaya. Mwaakha weettaka arupaini omwene wa Davi yaahiitjantikhihatja ni yaahiirelanatja yaayoru oolipa ni okuru wa Jazer wa Gileade. ³² Ni asun'nawe, alopwana owooneehessiya yaari ekonto piili niimiya saapa ahooleli omwiimutjini yaayo mwene Davi ahaahiyatja waarubenita, Gatita ni vakaani wonloko na Manasses wa tjitthu tjooteene tjamuluku ni anakosso a mwene.