¹ Tootho assaana a Arao yaahokawanyaatja. Assaana a Arao: Nabade, Abiu, Eleazar ni Itamar. ² Massi Nadabe ni Abiu yaahokhwatja athumwanaya ahinaaya ni khayaarina assaana. Eleazar ni Itamar yaahaana okhulupale. ³ Ni Davi ahaakawanihatja, nari Zadoque assaana a Eleazar ni Aimeleque assaanaawe Itamar mwaavaraawe miteko. ⁴ Ni assaana a Eleazar yaahophwanhiya, toko ahoolelyaawe, entji woovirikana assaana a Itamar ni yaahuntanyaatja tjo: Assaana a Eleazar ni yaahaana atthu khuumi nasita woomutjini waathiyana ni asaana a Itamar atthu khentta owuumutjini an'nathumwaane. ⁵ Yaahuntanyaatja mwaha woparakha waatthu naakhwaaya. Kontha assaana a Eleazar ni assaana a Itamar yaahaavo ahooleli, naakhulupale onupa yamuluku. ⁶ Semaias mayowantikha, mwaana a Natanael omalevita aahowantikha ohoolo wamwene aakhulupale ohoolo wa Zadoqe namukuttho ni Aimeleque mwaana Abiatar ni mahooleli aamutji aanamukuttho ni malevita yaanawantikha amutji a Eleazar ni a Itamar akhwaawe, ⁷ Ni eparakha yowantjera yaakhumale wa Jeoiaribe, yonayeeli wa Jedaias. ⁸ Yoneeraru wa Harim, yoneetjesse wa Seorim. ⁹ Yoneethanu wa Malquias, yonasiita wa Miamim. ¹⁰ Yonasaapa wa Coz, yonakhentta wa Abias. ¹¹ Yonanaane wa Jesua, yonakhuumi wa Secanias. ¹² Yonakhuumi namotja wa Eliasibe, yonakhuumi napiili wa Jaquim. ¹³ Yonakhuumi natthaaru wa Hupa, yonakhuumi natjesse wa Jesebeabe. ¹⁴ Yonakhuumi na thanu wa Bilga, yonakhuumi nasiita wa Imer. ¹⁵ Yonakhuumi nasaapa wa Hezir, yonakhuumi nakhentta wa Hapises. ¹⁶ Yonakhuumi nanaane wa Petaias, yonasiriini wa Jeezquel. ¹⁷ Yonasiriini namotja wa Jaquim, yonasiriini napiili wa Gamul. ¹⁸ Yonasiriini natthaaru wa Delaias, yonasiriini natjesse aw Maazias. ¹⁹ Alatja yaari owaalikeliya muntekoniwaya, wiira akele npaani mwa Pwiya toko tjaahimyalyaawe nlamulo na Arao athumwaane tjitjon'mo toko tjaarumiyaawe ni Pwiya muluku oIsrael. ²⁰ Ni assaana a Levi yaahaanle; Subael, wassaana a Arao, ni waassaana a Subael, Jedias. ²¹ Ni assaana a Reabias, Isaias ohoolela. ²² Mazarita, Selamote, ni mwaana a Selomote, Jeate. ²³ Ni assaana a Hebrom, Jerias owantjera, onayeeli Amarias, oneeraru Jaaziel, oneetjesse Jecameao. ²⁴ Mwaana a Uziel, Mica, mwaana a Mica, Samir. ²⁵ Mwaamun'nawe Mica, Issias, ni mwaana a Issias, Zacarias. ²⁶ Assaanaawe Merari: Mali ni Musi, mwaana a Jaazias, Beno. ²⁷ Assaana a Merari wa Jaazias: Beno ni Soao, Sacur ni Ibri. ²⁸ Ni a Mali, Eleazar, yooyo khaarina assaana. ²⁹ Mwaana a Quis, Jerameel. ³⁰ Assaana a Musi: Mali, Eder ni Jeremote. Ala yaari assaana aalevita toko enupa tjaassimutjyaaya. ³¹ Naayenatja yaahorihatja eparakha, toko assun'nawe assaana a Arao ohoolo wa mwene Davi ni a Zadoque ni a Aimeleque naahooleli aamutji aanamukuttho naalevita nkhulupale an'nathumwanawe woovirikana assun'nawe.