¹ Vahiirania, okathi omwene waruaaniyaaya owan'nyawe, yen homwiirela profeeta Nata: "Nkoona, mi kinkhala enupa yoocedro, massi nivuku nowaataana naa Pwiya niri n'heemani". ² Vano, Nata homwiirela Davi: "Orwe opanke yeele eri wanrimaniwa, kontha Muluku niri niwee. ³ Massi yoole ohiyuule, nuulumo na Muluku nahon'weela Nata, niiraka: ⁴ "Orwe ni wan'himeerye nantekoaaka Davi: "Aa Pwiya yiirale tjo: We khun'hala oteka enupa wiira kikhale, ⁵ kontha Mi akinakhala n'nupani okhumela okathi waankumihaliaaka Israel weegipto mpaka elelo. Kinkhala n'heemani, mapuro mentji. ⁶ Mapuro oteene mweettalyaaka, nan'na Israel, kihuuluma nuulumo oo Israel yaathanlalyaaka wiira yaahoolele athuaaka, iiraka: N'hikitekelenleni enupa yoo Cedro?. ⁷ Vano, wamwiirele nantekoaaka Davidi: "Aa Pwiya yiirale: "Mi kihookumiha waaliheraa epwittipwithi, weettaa ottuli wo pwittipwithi, wo wiira okhale n'hooleli athuaaka oo Israel. ⁸ Mi kihokhala ni weeyova mapuro yeera ophiye ni kihaamalamaliha awananiaa ooteene yaari ohoolowa, ni kinaahala ntjinanaa wun'nuwiha ntoko matjina aahooleli muulupale ontuniyani. ⁹ Mi kinaahala othoonya nipuro wiira athuaaka oo Israel ni kinawaahiya vaavale wo wiira ekhale wanipuroniwaya ni ehikhale ehaawihiyaka; khaanohlatho ohuvihiya naatakhali, ntoko khalayi, ¹⁰ okhumela mahuku yahelaliaaka anamiphuka milatto waa athuaakaoo Israel. Vano, kinaahala waayeviha awananiin'nya; ni kinawuuhimeeryatho, Mii, Pwiya, kinawuutekela enupa. ¹¹ Vano mahukuaayo yakhumenlaka wo wiira orwe wan'napaapa, kinaavussavussera nikhotono onavirale, mwaamwna m'motja m'motja, ni Mi kinavussa omweeneaawe; ¹² yena naahala oteka enupa paara Miivano ni Mi kinanva ehitje mahuku ooteene. ¹³ Mi kin'hala okhala apaapaawe ni yena n'hala okhala mwaamwanaka; akin'hala okumiha ekiriritjakatjaka mwa yena, ntoko tjikumihalyaaka tja Saul, hoolelale ohinaaya ohoolela weeyova; ¹⁴ Mii kinanthoonyera mpaaniwaka muumweneniwaka mahuku ooteene, omweneaawe onkookhala mahuku oteene. ¹⁵ Nata hon'himeerya David, hon'himeerya mulumoaala ooteene ni honttonkela nttoran'no. ¹⁶ Vano, mwene Davidi hokela, hokhala ohoolo wa Davidi ni hiira: "Kipani mii, Pwiya Muluku, amutjiaaka taapani wo wiira akiwaane mpaka vaa? ¹⁷ Kontha vakaani wa menthoniwinyu, Muluku, mwaahimeerye amutji anantekoeen'nyu wa yooreera yoohoolo, ni kithoonyere nikhoto nomeelo, Pwiya Muluku. ¹⁸ Kihimyekeni mi, Davidi? N'honttittimiha nantekoeen'nyu. Nhu n'hokhala ontjuwela nantekoeen'nyu. ¹⁹ Pwiya, nlatto wa nantekoen'nyu wo wiira avare othunawinhyu, n'hokhala mpankaka tjithu tjuulupaleru wiira mooniherye oweryawinyu. ²⁰ Pwiya, khavotho nkina ookhala ntoko nyuuva ni khaavotho Muluku woohikhala nyuuva, ntoko tjiniweehu. ²¹ Elaponi ntuniyanimu yookhala ntoko athuen'nyu oo Israel nyuuva, Muluku, n'woopolalen'nyu elapo yo Egipto wiira akhale athuin'nyu, ni n'hun'nuwiha ntjinaninyu wa tjithu tjuulupale ni tjooreera tjipakalen'nyu? Nyuuva n'hoomola elapo eriyari waathuin'nyu yaale n'woopolalen'nyu weEgipto. ²² N'hompaka Israel, Athuin'nyu mahuku ooteene, ni Nyuu, Pwiya, N'hokhala Mulukuaaya. ²³ Vano vaa, Pwiya, nkhuluveliho mpankalen'nyu mwaha wa nantekoeen'nyu ni amutjiaawe, ekhale mahuku ooteene. Mpanke ntoko tjihimalen'nyu. ²⁴ Wira ntjinaninyu nikhale mahuku ooteene ni nikhale nun'nuwihiyaka. Athuaayo yiireke tjo: "Pwiya aanakhotto Muluku oo Israel, ni enupa ya nantekoeen'nyu Davidi ekhale yoolipa ohoolowinyu. ²⁵ Kontha Wee, Mulukuaaka, n'honthonyera nantekoeen'nyu wiira n'naahala ontekela enupa; phimaana kihophuanya, Nantekoeenyu, ophunya ethu yoopheela wuulepelani. ²⁶ Vano, Pwiya, Nyuuva Muluku ni n'howerya opanka nkhuluveliho wooreena mwa nantekoeen'nyu. ²⁷ Vano, Ohuutjivelani oreeriha enupa ya nantekooenyu, ni wo wiira ekhale mahuku ooteene eriyariwinyu; kontha Nyuuva, Pwiya, n'honreeriha ni naareerihiya mahuku ooteene.