¹ David aahoteka enupa paara yena, nlaponiwawe. Yena hothenkatja nipuro wiira Nivuku naa Muluku ninkathiye ni aahotteka eheema. ² Vano, David ahiira: "Malevita paasi phampheela okussa Nivuku naa Muluku, kontha aa Pwiya ahaathanla wiira akusse ni evarelaka nteko mahuku oteene". ³ Vano, David ahathukumaniha an'na Israel oteene oo Jerusalem wiira niwaaniye Nivuku naa Pwiya wa nipuroni wathenkeliyaaya. ⁴ David ahothukumaniha nikhoto naa Arao ni malevita. ⁵ Wa nikhoto naa Coate, ahaavo Uriel, n'hoole, naassimutjaawe, alopwana eminya wo siriini. ⁶ Nikhoto naa Merari, ahaavo Asaias, n'hooleli, naassimutjaawe, eminyaa piili wo siriini. ⁷ Wa nikhoto naa Gerson, ahaavo Joel, n'hooleli, naassimutjaawe, alopwana eminya wo talathiini. ⁸ Nikhoto naa Elizafa, ahaavo Semaya n'hooleli naassimutjaawe, alopwana eminya piili. ⁹ Nikhoto na Hebrom, ahaavo Eliel, n'hooleli, naassimutjaawe, alopwana sutuiini. ¹⁰ Nikhoto na Uziel, ahaavo Aminadabe, n'hooleli, naassimutjaawe, alopwana eminya naathu khuumi neeli. ¹¹ David ahowiihana anamukutho Zadoque ni Abiatar, ni maleviita Uriel, Asaias, Joel, Semaias, Eliel, ni Aminadabe. ¹² Yena ahowiirela: "Nyuuva n'nokhala ahooleli anam'mutjini omalevita; mwiivaherere wa Pwiya, nyuuva ni assuninyu, wo wiira n'waane Nivuku naa Pwiya, Muluku oo Israe, wa nipuroni nithenkalyaaka. ¹³ Nyuuva khamwaakussale woopatjeravaa, phimaanan Pwiya Mulukuiihu, aahoniviruwela, kontha Khaninrweelale walaani khanin'wenlale ekettelotjawe". ¹⁴ Vano, anamukutho ni malevita ahiittakattifiha wo wiira ewaane Nivuku naa Pwiya, Muluku oo Israel. ¹⁵ Malevita ahokussa Nivuku naa Muluku m'makhatani waya niikopo ntoko Moises tjiiraliaawe wonayeeli nuulumo naa Pwiya. ¹⁶ David howuulumana ahooleli omalevita wo wiira yaathanle assun'naya wiira yoope ekaruma tjotjipo tjo mikhoi, cittaatti, ecimbalo, yoopaka tjinene ni yiipaka oteeliyeene. ¹⁷ Vano, malevita yaahonthala Hema, mwaana aa Joel, ni n'himaawe n'motja, Asafe, mwaana aa Berequia. Ayenatja yaahathanla amutji aa nikhoto naa Merri ni Eta, mwaana Cusaias. ¹⁸ Naayena, yaahaavo amutjaaya onayeeli: Zacarias, Jaaziel, Semiraote, Jaiel, Uni, Eliabe, Maaseias, Benaia, Maaseias, Matatias, Elifeleu, Micneias, Obede-Edom ni Jeiel, mapoorteero. ¹⁹ Athu owiipa Hema, Asafe ni Eta yathanliye wiira yoope ecimbalo yobroze. ²⁰ Zacaria, Aziel, Semiramote, Jaiel, Uni, Eliabe, Maaseias ni Benaia yoopa ekaruma tjo mikhoyi, yeeriliye yiipe ntju nooyeva. ²¹ Matitia, Elifeleu, Micneias, Obed-Edom, Jeiel ni Azazia yanawaahoolela, emoopaka sittaatti, yiipa ntju nuulupale. ²² Quenania, n'hooleli omalevita, pheettihera etjipo kontha phaassomiha etjipo. ²³ Berequia ni Elcana yaari maguaarda onivuku. ²⁴ Sebania, Josafa, Netanel, Amasai, Zacaria, Benaia ni Eliezer, anamukutho, yoopa mapenka ohoolo wa nivuku naa Muluku, ni Obede-Edom ni Jeias phassunka nivukun'no. ²⁵ Vano, David, mahumo ooIsrael ni ahooleli athueene ekonto yahowaana Nivuku Nowataaniha naa Pwiya enupa ya Obede.Edom nuutteeliya. ²⁶ Muluku aakhaviheraka malevita yaakussa Nivuku Nowaataaniha naa Pwiya, ayena yaavaha mukutho emope saapa yoomyakha miili ni ekhontoaa saapa. ²⁷ David ahowara elinho yooveviaala, ni malevita yaakussa nivuku, anawiipa ni Quenania, n'hooleli otjipo, naanawiipa, David ahowara etuunica yoliinho. ²⁸ Vano, Israel oteene ahowaana nivuku nowaataaniha na Pwiya ni tjooruma tjomapenka ni ecinbalo ni sittaatti. ²⁹ Massi, nivuku nowaataaniha na Pwiya waphiyalyaaya opooma wadavi, Mical mwaana a Saul, aahoweha watjanelani ni aahon'weha mwene Davi iinaka ni atthapenlaka, vano yena, aahontanhifu wanrimaniwawe.