1 Mwa nvyina na Yesu Kristu kinolelani exariya: nkinotha. Ankhili aka,anettihiwa n`Iroho Yawarya,annikikhalela-tho onamona. 2 Mrim`aka onnikiripa wawatta: kinnihawa nihiku ti nihiku wohihiyerera. 3 Vyivyo! Miyo ya katthuna otakhalihiwa ni Muluku ni omwalanihiwa ni Kristu,kaweryakaru vyivyo owopola amuvyi aka,ayariwe nloko nimovya ni miyo. 4 Awo t`ale ankhuma nloko na Isarayeli. Muluku ahakhaliha anaye, akhala eriyari ya n`uvuwa we,ahatana ni yawo,avaha ikano vye; ahahuvyiha onttittimiha yowo,alela wira arowa wavaha vyorera vye. 5 Awo t`ale ankhuma mmulokoni mw`axipap`anhu a khalai; mmulokoni mwenmo t`oyariweiye vathi-va Kristu,yowo ori mwanene itthu vyothene. Owo Muluku: attottopeliwe mahiku othene. Amen. 6 Nna nkinthuna olotha wira itthu alonttheiye Muluku khaimaliheriwe: tthiri kahiyo wira ale ankhuma nloko na Isarayeli,othene ya t`a nloko na Isarayeli. 7 Ata ale ankhuma nloko n`Abrahamu,kahiyo wira othene ya t`an`aye,okhala wira Muluku ahinlela Abrahamu wira: ``Ale ankhuma nloko na Isaki t`anrowa okhala ovyulu nnyu``. 8 Elo enlotha wira: Ana a Muluku kahiyo ale aniyariwa ni erutthu,masi ale pahi ayariwe mwahawa natiri a Muluku,yawo t`avyuweliwe okhala ana a exariya. 9 Tthiri Muluku ahinmanela Abrahamu natiri, iraka: `` Kinovira-tho vava mwahiyu, okathi yola: kinawaphwanya amwar`inyu Sara en`yanre mwana``. 10 Ni nanlelo: Ana aili ayanreiye Rebeka,yari maphapo,ana a Isaki, nkulupal`enhu. 11 Ehinakuve oyariwa an`awo,ehinaire yorera ou yotakhala,wira evyuweliwe sana otthuna wa Muluku,Rebeka ahileliwa wira: 12 ```Mwana opajerya oyariwa onorumela ettyako``. Vyivyo vyathikhinwawa wira: ``Kinthanlale Yakobe, kinhiyaka Esawu`` 13 Tthiri Muluku onathanla atthu nutthuna we,ahilipelaka vyawira vya,masi attharihaka mrim`aye oniwithana atthu awo. 14 Nna ninthuna olotha esyeni? Nilothe wira Muluku kahiyo axariya? Nari! 15 Okhala wira Muluku ahinlela Moisesi wira: ``Kinnarerela nrima nrima ale kinatthunaka warerela nrima: kinnamorela ikharari ale kinatthumaka wamorela ikharari``. 16 Tivo othanliwa khonra w`otthuna wa ntthu, ou ni wilipiha we, masi onra wa Muluku, onamorela atthu ikharari. 17 Ti vyivyo Muluku anlenleiye mwene Farawo,wira: ``Miyo kihokhalihani mwene wira mwa nyuwo konihere owerrya waka,ni wira mwa nyuwo kavyuwelihe nvyina naka atthu a nlaponi wothene``. 18 Tivo, Muluku onnamorela ikharari ale onatthunaiye wamorela ikharari,onniwumiha nrima ale onatthunaiye owumiha nrima. 19 Nna akinaku antthuna okilela wira: ``wari vyivyo,Muluku onaruwanelela-ni-tho anatampi? Tthiri, t`ani onwerya okhotta ontthun`aiye? 20 Alopwana! Nyuwo mwani ovanyihana ni Muluku? Mwapu w`oloko onwerya vyai onkoha nlipa-awupa wira: ``Nkupenle-ni vyivya?`` 21 Exariya, nlipa-awupa mwapu onniwerya n`uloko omovyaru wovottiwa wupa myapu mili: nkina wira wapeliwe mahiku ottittimiheya,nkina wira wapeliwe mahiku makina. 22 Nna, munwerya vyai onvanya Muluku? Owo, atthunne,anwerya wonihera onanariwa we n`uvyuweliha owerya we: nvyo ahavilela wawatta ale yaphwanela onanaruweliwa n`iwiphiwa. 23 Muluku ohira syisyo wira anisyuwelihe ovuwa we wulupale,weiwo akawenleiye ale amorenleiye ikharari,yale athanlaleiye ovuwihiwa okhuma khalai. 24 Yawo ti hiyo nitthaniwe ni Muluku,kahiyo eriyari y`aYuda pahi,nvyo eriyari-tho y`amalapo, 25 Vyivyo Muluku t`alontheiye nlivuruni wa Hoseya, iraka: ``Miyo kinowithana ale ahikhanle nloko naka, wira ekhale aka: kinowithana-tho ale ahinkivyiveliha, wira ekhale ovyiveliwa waka``. 26 Mmapuroni-mmwe wahinmwemo wira: `` Nyuwo kahiyo atthu aka``,mmapuroni mwenmo nnohinmwa-mo-tho wira: `` Nyuwo mwa ana a Muluku mukumi``. 27 Vyivyo-tho Yesaya olotha mwaha w`atthu a Isarayeli,wira: ``Ènamwi atthu a Isarayeli yantte nkhama etthaya y`olimani,atthu vakhani ahanle t`anrowa wopowa. 28 Muluku onomalihera sana ni wawakuveya molumo ye vathi-va``. 29 Yesaya yowo alotha-tho wira; `` Muluku owerya vyothene ahahiyale atthu vakhani,hiyo othene natthuna okhala nkhama o Sodoma, n`ulikanihiwa nkhama o Gomora``. 30 Nanvyo,nintthuna olotha esyeni? Nilothe wira yahikhala amalapo,yaharamenle exariya enkhuma wa wamini. 31 Masi atthu a Isarayeli,yatthara ikano vyatthuna wakhaliha anaxariya,yahojela orerihiwa n`ikano ivyo. 32 Nlatthu wa syeni? Khiyaramenle exariya yettelaka wamini, masi yaramenle okhalihiwa anaxariya mwaha wa vyawira vya. Tivo yakakattulinwawa v`anlukuni ninkakattula. 33 Vyawatikiwa vya Muluku vyinnilotha vya nluku nno,vyiraka: ``Kinya opweha o Siyoni nluku ninkakattula ni mwala w`otherana. Masi ule onamini nenno,khanrowa wuliwa muru``.